Yadigar Məmmədli: "Media təmsilçilərinin hər hansı bir ölkəyə, o cümlədən qardaş ölkəyə səfəri bu baxımdan mühüm əhəmiyyət kəsb edir"
Xəbər verildiyi kimi, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) təşkilatçılığı ilə respublikanın aparıcı KİV təmsilçilərindən ibarət 15 nəfərlik nümayəndə heyətinin Türkiyənin paytaxtı Ankara şəhərinə səfəri başlayıb.
Nümayəndə heyətinin səfər çərçivəsində Türkiyənin rəsmi dövlət qurumlarında, informasiya məsələlərinə məsul olan təşkilatlarda, həmçinin aparıcı KİV-lərin redaksiyalarında görüşləri nəzərdə tutulub.
Səfər proqramı dekabrın 12-də Azərbaycanın mərhum prezidenti Heydər Əliyevin Ankara şəhərindəki abidəsinin ziyarət edilməsi ilə başlayıb. Ankarada Heydər Əliyev adına parka gələn KİV təmsilçiləri burada mərhum prezidentin abidəsini ziyarət edib, önünə gül dəstələri qoyublar.
Daha sonra Türkiyə Cumhuriyyəti Baş Bakanlığının Basın Yayın və İnformasiya Genel Müdirliyində nümayəndə heyətinin qurumun başqanı Mehmet Akarca ilə görüşü keçirilib.
Nümayəndə heyətinin rəhbəri, KİVDF-nin icraçı direktoru Vüqar Səfərli KİV təmsilçilərinin Ankaraya səfərinin məqsədi, həmçinin, Azərbaycanda KİV-in durumu və KİVDF-nin fəaliyyəti barədə məlumat verib. Nümayəndə heyətinin növbəti görüşü Türk İşbirliyi və Koordinasiya Agentliyində (TİKA) baş tutub.
Məlumat üçün qeyd edək ki, səfər proqramı dekabrın 16-dək davam edəcək.
Bütövlükdə, Azərbaycan KİV nümayəndələrinin Türkiyə səfəri iki ölkə münasibətlərinin inkişafında necə rol oynayacaq? Məsələyə münasibət bildirən Demokratik Jurnalistlər Liqasının sədri Yadigar Məmmədlinin sözlərinə görə, bunun münasibətlərin inkişafına müsbət təsirləri olacaq: "Media təmsilçilərinin hər hansı bir ölkəyə, o cümlədən qardaş ölkəyə səfəri bu baxımdan mühüm əhəmiyyət kəsb edir. Bundan əvvəl media təmsilçiləri əsasən Avropa ölkələrinə səfər edirdilərsə, sevindirici haldır ki, belə səfərlər Türkiyəyə də edilir. O mənada ki, Türkiyəyə edilən belə səfərlərin sayı artır. Məlum olduğu kimi, Azərbaycandan Ankaraya səfər edən bir qrup KİV təmsilçisi orada mühüm görüşlər keçirib. Orada ölkənin siyasi rəhbərliyi ilə görüşlər keçiriblər. Nəzərə alsaq ki, iki ölkə bir-birinə çox yaxındır, o baxımdan media təmsilçilərinin səfəri əlaqələrin daha da dərinləşməsinə xidmət göstərəcək. Türkiyədən də qrup şəklində jurnalistlər Azərbaycana gəlir. Təbii ki, bütün bunlar ikitərəfli münasibətlərə çox müsbət təsir göstərir".
Vidadi ORDAHALLI
