Azərbaycan tarixinin elə səhifələri var ki, o səhifələr əsrlər uzunu yaşayacaq. Xalqımızın tarixi taleyində böyük rol oynayan, dövlətçilik tariximizə yeni nəfəs verən qüdrətli insan Heydər Əliyevin xatirəsi hər zaman xalqımız üçün əzizdir.
Azərbaycanın müasir dövlətçilik tarixinin hər səhifəsində Heydər Əliyevin əzəmətli izləri görünür. Müstəqil Azərbaycan dövlətinin memarı Heydər Əliyevin xatirəsinə Azərbaycanın hər bir yerində böyük ehtiram var.
Bilirik ki, H.Əliyevin adının əbədiləşdirilməsi sahəsində böyük işlər görülüb. Respublikamızın rayon və şəhərlərində möhtəşəm Heydər Əliyev Mərkəzləri inşa olunub, parklarda dahi şəxsiyyətin heykəlləri ucaldılıb. Bu, xalqın Heydər Əliyev ruhuna bəslədiyi sayğının nümunəsidir.
Sumqayıt Azərbaycanın gözəl şəhərlərindən biridir. Hər dəfə yolum bu şəhərə düşəndə mütləq şəhərdə fəaliyyət göstərən mədəniyyət ocaqlarına baş çəkirəm. Bu günlərdə yenə Sumqayıtda oldum. Şəhərdə olarkən "Cek Cəmiyyəti" İctimai Birliyinin sədri, Sumqayıt Şəhəri Təhsil İdarəsinin metodisti, pedaqoq Əlhəddin Paşayevin təklifi ilə bu ilin sentyabr ayında açılışı olan Heydər Əliyev Mərkəzində oldum.
Bəri başdan deyim ki, Heydər Əliyev Mərkəzi gerçək bir azərbaycançılıq ünvanıdır. Burada mədəniyyətimiz, elm və təhsilimiz, vətənimizin tarixi, Heydər Əliyev irsi layiqincə təbliğ olunur. Azərbaycançılığın geniş şəkildə təbliğ olunduğu, yaşadıldığı Sumqayıt şəhərində yerləşən Heydər Əliyev Mərkəzi məktəbli və tələbələrin daimi ziyarət yeridir. Sözsüz, Heydər Əliyevin keçdiyi həyat yolu bir örnəkdir. Gənclər bu örnəyi müqəddəs bilir və o yolla gedir.
Mərkəzdə olarkən burada şahidi olduqlarım həqiqətən də məni sevindirdi. Azərbaycanın gələcəyi olan gənclərin yetişməsi üçün burada çox böyük işlər görülür.
Mərkəz əməkdaşları bildirdi ki, müstəqil Azərbaycanın qurucusu olan Heydər Əliyevə ümumxalq məhəbbətinin təcəssümü olan və onun zəngin həyat yolu, xalqı və vətəni qarşısındakı misilsiz xidmətlərinin dərindən öyrənilməsi istiqamətində fəaliyyət göstərən Sumqayıt şəhər Heydər Əliyev Mərkəzi 2013-cü ilin 3 may tarixindən fəaliyyətə başlayıb.
Bildirdilər ki, Sumqayıt şəhər Heydər Əliyev Mərkəzində dünya şöhrətli siyasi xadim Heydər Əliyevin həyat və fəaliyyətindən bəhs edən fotoşəkillər, kitablar və sənədlərdən ibarət muzey fəaliyyət göstərir. H.Əliyevin zəngin həyatı və fəaliyyətindən bəhs edən videomateriallardan ibarət arxiv yaradılıb, Mərkəzin təşkilatçılığı ilə sənədli filmlər hazırlanaraq ziyarətçilərə nümayiş etdirilir.
Dahi şəxsiyyətə sonsuz hörmət və ehtiramlarını ifadə etmək üçün sakinlər, məktəblilər, gənclər, ayrı-ayrı kollektivlər və şəhərin qonaqları müntəzəm olaraq Mərkəzi ziyarət edir.
Mərkəz əməkdaşları qeyd etdi ki, qurum fəaliyyətə başladığı gündən burada ödənişsiz olaraq rəsm, şahmat, kompyuter dərnəkləri fəaliyyət göstərir. Məktəblilərin iştirakı ilə müasir Azərbaycan tarixi, Heydər Əliyevin həyat və fəaliyyəti, Prezident İlham Əliyev tərəfindən məharətlə aparılan dövlət siyasəti nəticəsində ölkəmizin bugünkü inkişafı barədə tarixi faktların təqdim edildiyi dərslər keçirilir.
Onu da vurğulayaq ki, Sumqayıtdakı Heydər Əliyev Mərkəzində əlamətdar və tarixi günlərə həsr edilən, gənclərin iştirakı ilə "dəyirmi masa"lar, seminarlar, müsabiqələr, maraqlı debatlar keçirilir. Siyasi mövzularda disputlar təşkil olunur.
Məlumata görə, Mərkəzin qarşısında klassik musiqi proqramları təqdim edilir. Heydər Əliyev irsinin öyrənilməsi və təbliği məqsədilə elmi-praktik konfranslar təşkil olunur.
Mərkəz əməkdaşları onu da vurğuladı ki, Sumqayıt şəhər Heydər Əliyev Mərkəzində yeni ailə quranların nikah mərasimlərinin keçirilməsi artıq ənənəyə çevrilib. Gənclərin nikahları "ASAN xidmət"in və ya VVAQ şöbəsinin əməkdaşları tərəfindən məhz Mərkəzdə rəsmiləşdirilir və onlara nikah şəhadətnaməsi təqdim edilir.
O da qeyd edildi ki, qaçqın və məcburi köçkün rayonlarından olan, Sumqayıtda məskunlaşan gənclərin nikah mərasimləri də Mərkəzdə keçirilir.
27 sentyabr 2016-cı il tarixində Sumqayıtda Heydər Əliyev Mərkəzinin binasının açılışı olub. Açılış mərasimində Azərbaycan Respublikasının Prezidenti İlham Əliyev iştirak edib. Ölkə başçısına məlumat verilib ki, Heydər Əliyev parkında inşa olunan Mərkəzin binasının tikintisinə ötən ilin noyabrında başlanıb. Üç mərtəbədən və mansarddan ibarət olan binanın ümumi sahəsi 5 min kvadratmetrdir. Mərkəzdə H.Əliyevin həyatının və çoxşaxəli dövlətçilik fəaliyyətinin müxtəlif dövrlərini əks etdirən materiallar nümayiş etdirilir.
Heydər Əliyev Mərkəzində müxtəlif tədbirlərin keçirilməsi üçün 420 yerlik böyük konfrans zalı yaradılıb. Mərkəzdə kompyuter və digər ən müasir avadanlıqla təchiz olunan xidməti otaqlar var.
Azərbaycan Respublikasının Prezidenti İlham Əliyev açılış mərasimindəki çıxışında bildirib: "...Biz bu gün Sumqayıtda bir çox gözəl obyektlərin açılışını qeyd edirik. Onların arasında əlbəttə ki, öz əzəməti, möhtəşəmliyi ilə seçilən Heydər Əliyev Mərkəzidir. Bu Mərkəz həm memarlıq, həm də funksionallığı baxımından çox gözəl abidədir, ulu öndərin adına yaraşan bir Mərkəzdir.
Heydər Əliyev müstəqil Azərbaycan dövlətinin banisidir. Məhz onun rəhbərliyi ilə Azərbaycan inamla müstəqillik həyatına qədəm qoyub. Əgər 1991-ci ildə Heydər Əliyev hakimiyyətdə olsaydı, heç vaxt Azərbaycan problemlərlə üzləşməzdi, heç vaxt bizdə vətəndaş müharibəsi olmazdı, heç vaxt torpaqlarımız işğal altına düşməzdi. Bizim xoşbəxtliyimiz isə ondan ibarətdir ki, 1993-cü ildə xalqın tələbi ilə Heydər Əliyev hakimiyyətə gəldi və ondan sonrakı müstəqillik dövrü sabitlik, tərəqqi və inkişaf dövrüdür. O ağır illərdə Azərbaycanda aparılan islahatlar, təhlükəsizliyin təmin edilməsi, neft kontraktının imzalanması, dövlətçiliyin möhkəmləndirilməsi, yeni Konstitusiyanın qəbulu ölkəmizin gələcək inkişafını müəyyən etmişdir. O vaxt ölkəmizin gələcək inkişafı ilə bağlı strateji seçim edilmişdir ki, Azərbaycan dövləti müstəqil həyatını qoruyacaq, ölkədə azərbaycançılıq məfkurəsi təmin ediləcək, Azərbaycan öz beynəlxalq əlaqələrini qarşılıqlı hörmət əsasında quracaq, dərin iqtisadi-sosial islahatlar həyata keçiriləcək və Azərbaycan xarici investorlar üçün açıq qapılar siyasəti aparacaq. Bu strateji seçim özünü doğrultdu. Biz bu gün bunu bir daha əyani şəkildə görürük. Bu gün Azərbaycan dünya miqyasında çox böyük hörmətə malik olan bir ölkədir. Bizimlə hesablaşırlar, bizim fikrimiz, rəyimiz nəinki regional müstəvidə, dünya miqyasında böyük önəm daşıyır".
Ölkə başçısı Azərbaycanın inkişafını önə çəkərək görülən işlər barədə də danışıb. O vurğulayıb ki, Azərbaycanın inkişafı üçün böyük işlər görülür və yenə də görüləcək: "Mən son 13 il ərzində çalışmışam ki, bu yüksək etimadı öz işimlə, fəaliyyətimlə doğruldum. Şadam ki, bu gün Azərbaycan doğrudan da dünyada seçilən ölkələrdəndir. Təhlükəsizlik təmin edilir, Azərbaycan xalqı sülh, əminamanlıq şəraitində yaşayır, beynəlxalq nüfuz artır, ordu quruculuğu uğurla gedir. Aprel döyüşləri bir daha Azərbaycan Ordusunun gücünü göstərdi. Baxmayaraq ki, dünyada iqtisadi böhran davam edir, Azərbaycan iqtisadi sahədə inamla inkişaf edir, bütün sosial layihələr icra olunur. Enerji siyasətimiz nəinki ölkəmiz üçün, regionumuz, dünya üçün böyük əhəmiyyət daşıyır. Azərbaycan enerji təhlükəsizliyinin təmin edilməsində lider dövlətdir. Biz nəhəng sənaye layihələrini icra edirik.
Bildiyiniz kimi, Azərbaycanda bu il "Multikulturalizm ili" elan edilib. Ölkəmizdə bütün xalqların, dinlərin nümayəndələri bir ailə kimi yaşayır. Bax, budur bu gün Azərbaycan reallıqları. Xalq bu reallıqları yüksək qiymətləndirir və referendumun nəticələri məhz buna əsaslanır. Bizə gələcəkdə kimsə xaricdən nə isə diktə etmək istəyəndə iki dəfə fikirləşməlidir. Birincisi, biz heç kimlə diktat dili ilə danışmırıq. Bu yanaşmanı qəbul etmirik. İkincisi və ən önəmlisi, biz heç kimdən asılı deyilik. Bizim apardığımız siyasət bundan ibarətdir ki, ancaq öz gücümüzə arxalanaq, nə siyasi cəhətdən, nə maliyyə cəhətdən heç kimdən asılı olmayaq, heç kimə borclu olmayaq və öz taleyimizi özümüz həll edək".
Sumqayıtda yerləşən Heydər Əliyev Mərkəzinin fəaliyyəti, burada görülən misilsiz işlər xalqa, dövlətə, azərbaycançılığa böyük xidmətdir.
Bu il Azərbaycanın dövlət müstəqilliyinin 25 yaşı tamam oldu. Heydər Əliyev Mərkəzinin binasının bu il istifadəyə verilməsi də dövlət müstəqilliyimizə böyük töhfədir.
Heydər Əliyev azərbaycançılıq ideologiyasının banilərindən biri kimi tarixə düşüb. Azərbaycançılıq, dövlətçilik maraqlarını hər şeydən uca tutan dahi şəxsiyyətin həyatı xalqa həsr edilib.
Qeyd edək ki, Sumqayıt çoxmillətli şəhərdir. Burada müxtəlif xalqların təmsilsiləri, dinlərin nümayəndələri qardaşlıq şəraitində yaşayır. Heydər Əliyev Mərkəzində də bütün xalqların övladlarının maariflənməsi üçün böyük şərait yaradılıb. Azərbaycan Respublikasında yaşayan bütün xalqlar azərbaycançılığa xidmət edir və Heydər Əliyev irsinə sayğı göstərir.
Heydər Əliyev Mərkəzində dövlətçilik tariximizin hər səhifəsi öyrədilir. Gənclər bu Mərkəzdə öyrəndiklərini gələcək fəaliyyətində ifadə edəcək.
Azərbaycançılıq ideologiyasının yaşadıldığı, təbliğ edildiyi Sumqayıt şəhəri Heydər Əliyev Mərkəzi dəyərlərimizin qorunduğu məkan kimi diqqəti cəlb edir. Hesab edirəm ki, bu qurumun fəaliyyəti Azərbaycan tarixinin, dövlətçilik ənənələrimizin təbliğində xüsusi rol oynayır.
12 dekabr Azərbaycanın böyük dövlət xadimi, mərhum Prezident Heydər Əliyevin xatirə günüdür və bu tarixdə xalqımız öz böyük oğlunu yad edir, onun ruhuna dualar oxuyur.
İradə SARIYEVA
Yazı Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə dəstəyilə çap olunur.
