Nəsimi rayon İcra Hakimiyyətinin təşkilatçılığı ilə rayon ictimaiyyəti nümayəndələrinin, ali və orta təhsil müəssisələrinin, səhiyyə ocaqlarının, ağsaqqallar, veteranlar və gənclər təşkilatlarının, dini qurumların nümayəndələrinin, Milli Məclis üzvlərinin, nazirlik və komitə rəhbərlərinin, elm və mədəniyyət xadimlərinin, qeyri hökumət təşkilatlarının və media nümayəndələrinin iştirakı ilə Azərbaycan Dövlət Musiqili Teatrında Ümummilli lider Heydər Əliyevin xatirəsinə həsr olunmuş anım mərasimi keçirilib.
Nəsimi RİH-dən baki-xeber.com-a verilən xəbərə görə, tədbiri Nəsimi Rayon İcra Hakimiyyətinin başçısı Asif Əsgərov açaraq Heydər Əliyevin həyatına və əvəzsiz xidmətlərinni diqqətə çatdırıb.Daha sonra mərhum prezidentin əziz xatirəsi 1 dəqiqəlik sükutla yad edilib.
Natiq qeyd edib ki, Azərbaycanın çoxəsrlik dövlətçilik tarixində özünün müstəsna əhəmiyyəti, sambalı, xalqımızın nəinki bu günü, həm də gələcək taleyinin müəyyənləşdirilməsi baxımından Heydər Əliyev epoxası bənzərsizdir: ”Bu epoxanın hər bir mərhələsi müasir tariximizin bütöv bir salnaməsini təşkil edir ki, onun da hər bir səhifəsi, hər bir sətri ulu öndərimiz Heydər Əliyevin qüdrətli əlləri ilə yazılıb. Azərbaycanın və böyük türk dünyasının müdrik lideri Heydər Əliyevin fəaliyyəti öz əhəmiyyəti etibarilə ölkəmizin hüdudlarından çox-çox kənara çıxaraq, zəngin məna tutumu ilə bəşəri zirvəyə yüksəlib. Ulu öndərimiz zamanı qabaqlayan, onun fövqündə dayanan elə bir dahi şəxsiyyətdir ki, o yalnız öz dövrü üçün yaşamayıb, yalnız öz dövrünün qayğıları ilə məşğul olmayıb”.
Asif Əsgərov çıxışına davam edərək bildirib ki, XX əsr Azərbaycan tarixinin ən parlaq siması olan Heydər Əliyevin siyasi obrazı Azərbaycan xalqının dövlətçilik şüurunun, tarixin sınağından şərəflə çıxmış bütöv bir idarəçilik məktəbinin, müasir ictimai-siyasi fikrin ən davamlı keyfiyyətlərinin canlı mənzərəsidir.
Daha sonra tədbirdə ulu öndərin keçirdiyi mənalı ömür yoluna həsr olunmuş videoçarx nümayiş olunub. Tədbirdə tanınmış incəsənət xadimləri - Səid Rüstəmov adına Xalq Çalğı Alətləri orkestri, Əməkdar artistlər Zakir Əliyev, İnarə Babayeva, Lalə Məmmədova, Şirzad Fətəliyev, Almaz Orucova, Babək Niftəliyev, Gülüstan Əliyeva, Azərbaycan Televiziyası Radiosunun solistləri Zabitə Alıyeva, Sərxan Bünyadzadə çıxış edib.
