Ramil Məmmədov: "Aldıqları informasiya barədə öz ölkələrinin əlaqədar qurumlarına raport edəcəklər ki, bunun da bizə yalnız xeyri var"
Azərbaycan müdafiə naziri, general-polkovnik Zakir Həsənovun təsdiq etdiyi plana əsasən, dekabrın 7-də xarici dövlətlərin silahlı qüvvələrinin Azərbaycanda akkreditə olunan hərbi attaşeləri üçün illik yekun toplantı keçirilib.
Müdafiə Nazirliyinin mətbuat xidmətindən bildirilib ki, toplantıda 30 ölkədən 32 nümayəndə iştirak edib. Müdafiə naziri adından toplantı iştirakçılarını salamlayan Beynəlxalq Hərbi Əməkdaşlıq İdarəsinin rəisi, general-mayor Hüseyn Mahmudov onlara regiondakı hərbi-təhlükəsizlik vəziyyəti, Ermənistanın Azərbaycana qarşı işğalçılıq siyasəti, eləcə də Silahlı Qüvvələrimizdə aparılan islahatlar, inkişaf perspektivləri, beynəlxalq hərbi əməkdaşlıq çərçivəsində həyata keçirilən fəaliyyətlər barədə ətraflı məlumat verib. İdarə rəisi hərbi attaşelərin suallarını cavablandırıb.
Bakı Hərbi Attaşelər Assosiasiyasının duayeni, Rumıniya Respublikası Silahlı Qüvvələrinin hərbi attaşesi, polkovnik Rodin Lazariou həmkarları adından bu cür tədbirlərin keçirilməsinə görə Azərbaycan Respublikası Müdafiə Nazirliyinin rəhbərliyinə minnətdarlığını bildirib və gələcəkdə də səmərəli əməkdaşlığın davam edəcəyinə ümidvar olduğunu vurğulayıb.
Belə görüşün keçirilməsi cəbhədə real vəziyyət barədə məlumatlandırmaq baxımından nə kimi əhəmiyyətə malikdir?
Ekspert Ramil Məmmədov qəzetimizə açıqlamasında bildirdi ki, bü cür görüşlərin keçirilməsi olduqca əhəmiyyətlidir: "Məlumdur ki, düşmən bizimlə bütün sahələr üzrə müharibə aparır. Diplomatiya, informasiya müstəvisində onların cavabları layiqincə verilir. Hərbi müstəvidə də layiqli cavablarını alıblar. Aprel döyüşləri bunu bir daha sübut etdi. Ancaq buna baxmayaraq, düşmən məkrli niyyətlərindən əl çəkmir. Cəbhədə məqsədli şəkildə təxribatlar törədir və bunun da hamısını Azərbaycanın üzərinə atmağa çalışır ki, danışıqlardan yayınmasını sığortalaya bilsin. Hesab edirəm ki, cəbhədəki real vəziyyəti ölkəmizdə akkreditasiya olunan hərbi attaşelərə çatdırmaq baxımından bu formatda olan görüşün böyük əhəmiyyəti var. Çünki onların hər biri ayrı ölkəni təmsil edir. Aldıqları informasiya barədə öz ölkələrinin əlaqədar qurumlarına raport edəcəklər ki, bunun da bizə yalnız xeyri var".
Məhəmmədəli QƏRİBLİ
