Akif Aşırlı: "Hesab edirəm ki, Əflatun müəllim bunu düzgün qiymətləndirdi"
Xəbər verildiyi kimi, Milli Məclisin deputatı, Azərbaycan Mətbuat Şurasının sədri Əflatun Amaşov parlamentdəki büdcə müzakirələri zamanı elektorn KİV-ə - aparıcı saytlara da dövlət büdcəsindən vəsait ayrılmasını təklif edib.
Ə.Amaşov deyib ki, büdcə layihəsində bəzi sahələr üzrə xərclər azaldılsa da, bu, media sektoruna şamil olunmasın.
Deputat KİV-in İnkişafına Dövlət Dəstəyi Fondu üçün gələn ilin büdcə layihəsində nəzərdə tutulan 4 milyon manatın 5 milyona çatdırılmasını təklif edib.
Mətbuat Şurasının sədri qeyd edib ki, həmin 1 milyon manat hesabına hazırda normal fəaliyyət göstərən 30-dək ciddi xəbər saytına dövlət dəstəyini reallaşdırmaq olar.
Ə.Amaşov jurnalistikanın ölkədə ictimai rəyin formalaşmasında və ölkənin dünyada təbliğində mühüm rol oynadığını deyərək bildirib ki, bu sahə ilə bağlı qənaət rejiminə keçilməməlidir: "Son 1 ildə istər qəzet kağızı, istərsə də çap xərcləri kifayət qədər bahalaşıb. Ümumilikdə, KİV-in satışı çox zəifdir, reklamlardan gələn gəlirləri də kifayət qədər aşağıdır. 2016-cı ildən ölkəyə gətirilən qəzet kağızlarına ƏDV-nin tətbiqinə də başlanıb. Bütün bunlar vəziyyətə neqativ təsir göstərir. Hazırda internet media da ictimai fikrin formalaşmasında əsas vasitəyə çevrilib. Azərbaycanda 30-dək xəbər portalı normal qaydada fəaliyyət göstərir. Gələcəkdə bu rəqəmin artacağı istisna deyil. Buna görə də bu tip media vasitələrinin nəzərə alınması vacibdir. Ümumiləşdirmə apararaq təklif edirəm ki, KİVDF-yə ayrılmış 4 milyon manat vəsait artırılmalıdır. Məhz internet medianın maliyyələşdirilməsi üçün ən azı 1 milyon manat ayrılmalıdır. Reklamı və heç bir gəliri olmayan, amma həmişə peşəkarlıq və vətənpərvərlik umulan bu biçarələr bəs nə ilə yaşamalıdır?".
KİV-ə ayrılacaq vəsaitin artırılmasına ekspertlər necə yanaşır? Məsələyə münasibət bildirən "Xalq Cəbhəsi" qəzetinin baş redaktoru Elçin Mirzəbəylinin sözlərinə görə, indiki dövrdə KİV-ə ayrılan vəsaitin artırılmasına ehtiyac var: "Çünki kifayət qədər peşəkar media qurumları var. Onlara bu istiqamətdə yardım edilməsinə ehtiyac var. Ona görə ki, medianın reklamla bağlı ciddi problemləri var. Bu da onların fəaliyyət göstərməsi üçün müəyyən çətinliklər yaradıb. O üzdən, mətbuata dövlət yardımının artırılması ilə bağlı təklif doğru yanaşmadır. Belə bir addım atılsa, bu, mətbuatın, internet medianın inkişafına, peşəkarlığın artırılmasına ciddi töhfə verəcək".
"Şərq" qəzetinin baş redaktoru Akif Aşırlının fikrincə, mətbəə və digər xərclər artdığı üçün mətbuata ayrılan vəsait artırılmalıdır: "Əflatun müəllim mətbuatın bugünkü durumunu bildiyi üçün belə bir təkliflə çıxış etdi. Çünki mətbuat KİV olaraq strateji bir məhsuldur. Mətbuat dövlət və dövlətçilik üçün, cəmiyyətin inkişafı, maariflənməsi, informasiya təminatı üçün mühüm əhəmiyyət kəsb edir. Bununla bağlı çox vacib yerdə dayanır. Mətbuatın mövqeyi zəifləyəndə, bu, cəmiyyətin digər strukturlarına da sirayət edir. O üzdən, mətbuatın maddi təminatı daha yaxşı olmalıdır. Ona görə də hesab edirəm ki, Əflatun müəllim bunu düzgün qiymətləndirdi. Manatın devalvasiyasından sonra çap mətbuatında vəziyyət o qədər də ürəkaçan mənzərə ilə qarşılaşmadı. Kağız bahalaşır, mətbəə xərcləri getdikcə artır. Yaxın zamanlarda da mətbəə xərclərinin artmasının şahidi olacağıq. Çünki enerji daşıyıcılarının qiymətinin artması buna təsir göstərir".
Vidadi ORDAHALLI
