Yadigar Məmmədli: "Belə doktrinanın qəbulu işləri daha da təkmilləşdirər"
Prezident Vladimir Putin Rusiyanın İnformasiya Təhlükəsizliyi Doktrinasını təsdiq edib. Sənəd dekabrın 5-də imzalanaraq qüvvəyə minib. Yeni doktrinanın istiqamətlərindən biri informasiya texnologiyalarının istifadəsi zamanı yarana bilən hərbi münaqişələrin strateji planda qarşısının alınmasıdır.
"Strateji sabitlik və ədalətli strateji tərəfdaşlıq sahəsində informasiya təhlükəsizliyinin strateji məqsədi informasiya məkanında qeyri-gərgin dövlətlərarası münasibətlərin davamlı sistemini yaratmaqdır", - sənəddə deyilir. Doktrinada qeyd olunub ki, bir sıra ölkələrin xüsusi xidmətləri dünyada sabitliyi pozmaq üçün "informasiya və psixoloji təsirlər"dən istifadə edir ki, bu da digər dövlətlərin suverenliyi və ərazi bütövlüyünün pozulmasına gətirib çıxarır. Bununla yanaşı, Rusiyanın mühüm obyektlərində koordinasiya olunmuş hücumların sayı artır, ölkəyə qarşı xarici kəşfiyyat isə güclənir. Rusiya prezidenti tərəfindən təsdiq edilmiş doktrinanın daha bir istiqaməti Rusiya Silahlı Qüvvələrinin informasiya təhlükəsizliyi sisteminin təkmilləşdirilməsidir. İnformasiya Təhlükəsizliyi Doktrinasında qeyd olunub ki, Rusiya KİV-i xaricdə açıq ayrıseçkiliklə üzləşir: "Rusiyalı jurnalistlər üçün öz peşəkar fəaliyyəti ilə məşğul olmağa maneələr yaradılır. Xarici KİV-lər Rusiya dövlət siyasətini qərəzli qiymətləndirir və belə materialların sayı artmaqda davam edir".
Belə bir doktrinanın Azərbaycanda hazırlanmasına ehtiyac varmı?
Media ekspert Yadigar Məmmədli qəzetimizə açıqlamasında bildirdi ki, belə bir doktrinanın Azərbaycanda olmaması heç də deyilən sahənin nəzarətdən kənar qaldığına dəlalət edə bilməz: "Ancaq informasiya təhlükəsizliyinin tam təmin olunması baxımından olduqca zəruridir. Biz hazırda müharibə şəraitində yaşayan ölkəyik. Belə hadisələrdən, informasiya təxribatından immunitetin yaradılmasına böyük ehtiyacımız var. Son bir ildə biz həssas olan hadisələr yaşadıq. Aprel ayında cəbhədə baş verən 4 günlük müharibə zamanı mediamızın peşəkar davranışının şahidi olduq. Mediamız tam dövlət maraqlarından çıxış etdi. Bununla yanaşı, əlaqədar qurumlar və Mətbuat Şurası da medianın üzərində nəzarəti həayata keçirir. Belə doktrinanın qəbulu işləri daha da təkmilləşdirər".
Məhəmmədəli QƏRİBLİ
