Azər Həsrət: "Azərbaycan jurnalistikası belə ünsürlərdən təmizlənməsə, bizə yenə də yuxarıdan aşağı baxacaqlar"
Son günlər Dövlət Təhlükəsizliyi Xidmətinin (DTX) bəzi qəzetlərə qarşı keçirdiyi əməliyyatın təfərrüatı məlum olub.
Dövlət Təhlükəsizliyi Xidmətindən verilən məlumata görə, qabaqcadan əlbir olan bir qrup şəxsin gizli qaydada informasiya alınması üçün nəzərdə tutulmuş texniki vasitələrdən istifadə etməklə qadınları digər şəxslərlə görüşdürüb münasibətlərinin gizli videoçəkilişlərini aparması, onları şantaj etməsi, habelə ayrı-ayrı şəxslər barəsində rüsvayedici və böhtan xarakterli məlumatları mütəmadi olaraq mətbu orqanlarda dərc etdirib bu fəaliyyətin dayandırılması müqabilində vətəndaşlardan külli miqdarda pul tələb edilməsi və alınması, bu üsulla müxtəlif idarə və təşkilatlarda çalışan şəxslərdən, sahibkarlardan dövri haqq toplanması barədə daxil olmuş müraciətlər Dövlət Təhlükəsizliyi Xidmətində araşdırılarkən Azərbaycan Respublikası ərazisində "reket" nəşrlər yaradıb, bu nəşrlərin jurnalistləri adı altında fəaliyyət göstərən bir qrup şəxs və onlarla şəbəkə halında əlbir olan digər şəxslərdən ibarət cinayətkar dəstənin silsilə cinayət əməlləri ifşa edilib, qanunsuz fəaliyyətinin qarşısı alınıb.
DTX tərəfindən aparılan araşdırmaların nəticələri üzrə hədə-qorxu ilə tələb etmə, əməliyyat-axtarış fəaliyyətini həyata keçirmək səlahiyyətinə malik olmayan şəxslər tərəfindən gizli qaydada informasiya alınması üçün nəzərdə tutulmuş texniki vasitələrdən istifadə etməklə belə tədbirlərin keçirilməsi faktları üzrə cinayət işi başlanıb, "Bizim dövr" qəzetinin baş redaktoru Surxay Əliyev və onun tapşırıqları əsasında fəaliyyət göstərən digər şəxslər müvafiq cinayətləri törətməkdə şübhəli şəxs qismində cinayət məsuliyyətinə cəlb edilmişlər. Cinayət məsuliyyətinə cəlb edilən Surxay Əliyev və digərləri zərərçəkmiş şəxslərə qarşı çoxsaylı cinayət əməlləri barədə ətraflı məlumatlar vermiş, onların hazırladığı şantaj xarakterli materiallar, eləcə də ayrı-ayrı vətəndaşların intim münasibətlərinə dair gizli aparılmış videoçəkilişlər müəyyən edilib.
Qeyd edək ki, birinci əməliyyatın ardınca, DTX daha bir qəzet baş redaktorunu saxlayıb. "Gündəlik-Bakı" qəzetinin baş redaktoru Habil Vəliyevin də anoloji əməllərdə təqsirkar olduğu bildirilir.
Hazırda istintaq-əməliyyat tədbirləri davam etdirilir.
"Reket"liklə məşğul olan şəbəkəyə yönəlik aparılan bu cür əməliyyatlara media nümayəndələrinin münasibəti necədir?
Media eksperti Azər Həsrət qəzetimizə açıqlamasında bildirdi ki, əslində, bu proses çoxdan başlamalı idi: "Ancaq etiraf edək ki, bizim bu istiqamətdə göstərdiyimiz çabalar heç bir fayda vermirdi. Səbəbi də bəllidir. Həmin şəbəkənin arxasında konkret qüvvə dururdu. Şəxsən mən həm fərd olaraq, həm də Mətbuat Şurası İdarə Heyətinin üzvü kimi demək istəyirəm ki, bu məsələdə əməliyyatı həyata keçirənlərə sona qədər dəstək verməyə hazıram. Mənə elə gəlir ki, digər media təmsilçiləri də anoloji addımları atmalıdır. Dövlətin bu istiqamətdə atdığı addımlar ictimai dəstəyə layiqdir. Azərbaycan jurnalistikası belə ünsürlərdən təmizlənməsə, bizə yenə də yuxarıdan aşağı baxacaqlar. Çünki mediaya soxulan bu cür elementlər daim bizi hörmətdən salıb".
Məhəmmədəli QƏRİBLİ
