“Azərbaycan Mətbuat Şurası yarandığı gündən media məkanındakı neqativ hallara, sui-istifadələrə qarşı mübarizə aparmaqdadır. Bu mübarizəyə ictimaiyyətin diqqətini cəlb etmək üçün zamanında “reket jurnalistika” ifadəsi düşünülüb. “Reket juranlistika”ya qarşı mübarizə Komissiyası da yaratmışıq”. Bunu APA-ya Mətbuat Şurasının sədri, Milli Məclisin deputatı Əflatun Amaşov deyib.
Ə. Amaşov xatırladıb ki, komissiyanın rəyləri əsasında peşə prinsiplərinə tam etinasız yanaşan kütləvi informasiya vasitələrinin adları “qara siyahı”ya daxil edilir. “Qara siyahı” mütəmadi olaraq yenilənir və bu barədə cəmiyyətə məlumat verilir: “Əlbəttə, “reket jurnalist”, “reket mətbu orqan” deyilərkən biz məsələnin hüquqi tərəfləri üzərində dayanmırıq. Ancaq o da nəzərə alınmalıdır ki, belə kütləvi informasiya vasitələrinin “Azərbaycan Jurnalistlərinin Peşə Davranışı Qaydaları”na sayğısızlığı həm də hüquqi müstəvidə dəyərləndirilə bilən hadisədir. Bu cür şübhələrimiz olduğu təqdirdə müvafiq materialları hüquq-mühafizə orqanlarına təqdim edirik”.
Ə.Amaşov bildirib ki, rəhbərlik etdiyi qurumun tədbirləri ictimai qınağa əsaslanır. Barəsində Mətbuat Şurasına şikayət edilən nəşrin peşə prinsiplərinin hansı bəndlərini pozduğu diqqətə çatdırılır və məsələ bu qaydada ictimailəşir: “Ancaq təcrübə göstərir ki, bir çox hallarda ictimai qınaq tədbiri yetərsiz olur. “Bizim dövr” və “Gündəlik Bakı” qəzetlərinin baş redaktorları və onlarla birgə müxtəlif şəxslər saxlanılıb. Hazırda məsələ araşdırılmaqdadır. Konkret nəticəyə araşdırmanın yekunlarından sonra gəlmək mümkündür. Əgər sözügedən şəxslər həqiqətən də qanunları pozublarsa, müvafiq qaydada məsuliyyət daşımalıdırlar. Peşə prinsiplərinə etinasızlıqlarına gəldikdə, onu deyə bilərəm ki, onların rəhbərlik etdikləri media orqanları barədə şikayətlər indinin özündə də az deyil”.
DTX-nin "reket" jurnalistlərə qarşı keçirdiyi əməliyyat alqışlanmalıdır
“Dövlət Təhlükəsizlik Xidməti (DTX) əməkdaşlarının insanları şantaj edərək onlardan hədə yolu ilə pul alan "reket" jurnalistlərdən ibarət mütəşəkkil dəstəni ifşa etməsi Azərbaycan cəmiyyəti tərəfindən alqışlanmalıdır”. Bu barədə isə millət vəkili Çingiz Qənizadə bildirib.
Millət vəkili bildirib ki, bu əməliyyatlar Azərbaycan cəmiyyətini "reket" jurnalist bəlasından xilas etmək üçündür: "Dövlət Təhlükəsizlik Xidmətinin əməkdaşları daha bir "reket" baş redaktoru həbs etdi. Peşəkar jurnalistlər, qeyri-hökumət təşkilatları, cəmiyyət Azərbaycanda "xərçəng" xəstəliyi kimi bəla olan "reket" jurnalistlərə qarşı hüquq-mühafizə orqanlarının apardığı belə əməliyyatları alqışlamalı və müdafiə etməlidirlər".
"Reket" jurnalistlərin ifşası mənəvi terrorun qarşısını almaq deməkdir
Mətbuat Şurasının İdarə Heyətinin üzvü Vüqar Rəhimzadə isə deyib ki, Dövlət Təhlükəsizliyi Xidməti əməkdaşlarının vətəndaşları şantaj edən "reket" jurnalistlər şəbəkəsini ifşa etməsi təqdirəlayiqdir.
Onun sözlərinə görə, "reket" jurnalistlərin fəaliyyəti Azərbaycan jurnalistikasına xələl gətirən haldır: "Elə mətbuat orqanları var ki, peşə davranış qaydalarını mütəmadi olaraq pozur, jurnalistika prinsiplərinə tamamilə zidd hərəkətlər edirlər. Mətbuat Şurası yarandığı gündən bu hallarla mübarizə aparır, öz mövqeyini ortaya qoyur. Azərbaycan Mətbuat Şurasının tətbiq etdiyi "qara siyahı"da 100-ə yaxın bu cür mətbuat orqanının adı var. Dövlət Təhlükəsizliyi Xidməti əməkdaşlarının keçirdiyi əməliyyat nəticəsində ifşa olunan şəxslərin rəhbərlik etdiyi həmin qəzetlərin adları da "qara siyahı"da olub. Mətbuat Şurasının apelyasiya şurasına həmin qəzetlər müraciət edəndən sonra onların adları bir müddət "qara siyahı"dan çıxarıldı. Amma Şuranın sonuncu iclasında həmin qəzetlərdən birinin adı yenidən həmin siyahıya əlavə edildi".
V.Rəhimzadə bildirib ki, davamlı olaraq bu cür şantaj xarakterli əməllərlə məşğul olanlar qanun qarşısında cavab verməli, məsuliyyətə cəlb edilməlidir: "Reket" fəaliyyəti ilə məşğul olan bu cür insanlar jurnalistika adından istifadə edərək insanları təhdid edirlər. Bu həm Azərbaycan cəmiyyətinə, həm də Azərbaycan jurnalistikasına qarşı təhqirdir. Onlar insanları təhqir etməklə yanaşı, onların şəxsi həyatına, ailə həyatına qərəzli mövqedən yanaşır, öz məqsədlərinə çatmaq üçün müəyyən şantaj xarakterli əməllərə əl atırdılar. Bu şəxslər həmin çirkin əməllərini birinci dəfə deyil, mütəmadi edirdilər, ayrı-ayrı insanları şantaj etməklə məşğul idilər. Hamı onların fəaliyyətini görürdü, hansı əməllərə əl atdıqlarını bilirdilər. Buna görə də bu məsələ hüquqi çərçivədə öz həllini tapmalı idi. Dövlət Təhlükəsizliyi Xidməti əməkdaşlarının keçirdiyi bu cür əməliyyat Azərbaycanda jurnalistikanın sağlamlaşmasına, cəmiyyətə qarşı yönəlmiş mənəvi terrorun qarşısını almaq üçün atılan addımlardandır".
"Reket" jurnalistlərin ifşası cəmiyyətin sağlamlaşmasına xidmət edir
“Mətbuatdan sui-istifadə halları, "reket" jurnalistlərin fəaliyyəti son dövrlərdə daha da aktuallaşıb. Bunu "Səs" qəzetinin baş redaktoru Bəhruz Quliyev deyib.
Onun sözlərinə görə, Azərbaycanda "reket" jurnalistika 90-cı illərin əvvəlindən başlayıb: "Həmin vaxt hələ internet resurslarından istifadə məhdud idi. O vaxtlar Azərbaycanda "reket ordusu" formalaşdı. Ölkədə xaos, anarxiyanın tüğyan etdiyi bir dövrdə Azərbaycan mətbuatında da belə bir problem ortaya çıxdı və "reket" jurnalistlər cəmiyyətdə özünə yer elədi. Sonrakı dövrlərdə bunun acı nəticəsini çəkməyə başladıq. Bu gün də ənənəvi jurnalistika "reket" jurnalistikadan əziyyət çəkir. Bu gün əsl jurnalistika ilə "reket" jurnalistika cəmiyyətdə fərqləndirilmir, insanlar ayırd edə bilmirlər. Amma müsbət haldır ki, bu gün ənənəvi mətbuat öz işi ilə məşğuldur, peşə fəaliyyətini diqqətlə yerinə yetirir, Azərbaycan qanunvericiliyinə uyğun fəaliyyət göstərir. "Reket" şəbəkə isə bunun tam əksinə hərəkət edir, yaranmış vəziyyətdən sui-istifadə edir, Azərbaycanda azad söz, azad fikir, azad mətbuatdan öz mənafeləri üçün yararlanmağa çalışır. Bu gün "reket" jurnalistlər sosial şəbəkələrdən modern formada istifadə edirlər".
Dövlət Təhlükəsizliyi Xidməti əməkdaşlarının insanları şantaj edən "reket" şəbəkəsini ifşa etməsinə gəlincə, B.Quliyev bu əməliyyatı yüksək qiymətləndirib: "Belə əməliyyatlara, bu cür təbliğatlara hətta ənənəvi mətbuatın özü də qoşulmalı, həmin "reket" jurnalistlərin ifşası üçün hüquq-mühafizə orqanlarına yardımçı olmalıdır. Bu mübarizə bizim cəmiyyətin sağlamlaşmasına xidmət edən addımlardandır. Vətəndaş cəmiyyətinin formalaşmasında mətbuatın da böyük rolu var. Əgər cəmiyyətdə qeyri-sağlam ünsürlər olarsa, cəmiyyət başqa istiqamətə yönələr. Ona görə də DTX-nin gördüyü tədbirlər çox uğurludur və əminəm ki, bu tədbirlər Azərbaycan mətbuatının sağlamlaşmasına xidmət edəcək. Amma biz də bu mübarizəyə qoşulmalıyıq və bu çirkabdan qurtulmalıyıq".
Baş redaktor bildirib ki, bu cür tədbirləri Azərbaycan mətbuatına qarşı əməliyyat adlandırmaq olmaz: "Ümumiyyətlə, bu şəxsləri Azərbaycanın mətbuat nümayəndəsi adlandırmaq olmaz. Onların mətbuat nümayəndəsi adlandırılması bizim beynəlxalq imicimizi aşağılayacaq. Həmin şəxsləri jurnalist adlandırmaq məsələyə qeyri-peşəkar yanaşmadır. Dövlət mətbuatın inkişafında maraqlıdır. 2013-cü ildə Prezident İlham Əliyev "Jurnalistlərin dostu" elan edildi. Bu o deməkdir ki, dövlət rəhbərliyi mətbuatın sağlamlaşmasında, demokratik fəaliyyətində və inkişafında maraqlıdır. Bu da birbaşa cəmiyyətin, hüquqi dövlətin inkişafına xidmət edən amildir".
