Qırğız Respublikasındakı səfirliyimizdən aldığımız məlumata görə, Qırğızıstanın "Turar" nəşriyyatı ulu öndərin xatirəsinin anım günü ərəfəsində Hidayət Orucovun "Heydər Əliyevin milli siyasəti" kitabını qırğız dilində nəfis şəkildə çap edib.
Dünya şöhrətli siyasətçi, görkəmli dövlət xadimi Heydər Əliyevin siyasi bioqrafiyasının az işlənmiş, lakin olduqca önəmli bir səpkisinin - milli siyasət sahəsindəki fəaliyyətinin araşdırılması və şərhinə həsr edilən monoqrafiya ilk dəfə 2001-ci ildə Azərbaycan və rus, sonralar türk, ingilis, ərəb (iki dəfə) və gürcü dillərində nəşr olunub.
Qırğız Respublikasının çoxmillətli və çox konfessiyalı, həmçinin rus dilinin ölkənin ikinci rəsmi dili olduğu nəzərə alınaraq, əsərin rus dilinə tərcüməsi də kitaba daxil olunub.
Müəllif yola saldığımız əsrin son onillikləri ərzində milli varlığımızın məruz qaldığı ciddi tarixi təlatümlər fonunda Heydər Əliyev milli siyasətinin formalaşması və ardıcıl olaraq həyata keçirilməsini izləyir.
Əsərdə ifrat dərəcədə mərkəzləşdirilmiş sovet rejiminin məhdud imkanlarından maksimum məharətlə istifadə edərək Azərbaycanda milli şüurun dirçəlişi, ziyalıların, xüsusilə də milli ruhun əsas daşıyıcıları olan humanitar sahənin fikir adamlarının repressiya və təzyiqlərdən qorunması, mədəniyyətin, elmin, təhsilin inkişaf etdirilməsi, zəngin milli özgürlüyün qorunub-saxlanılması, dövlət idarəçiliyinin bütün sahələrində milli kadrların xüsusi çəkisinin artırılması, güclü sənaye və kənd təsərrüfatı potensialı yaradılması, bugünkü müstəqil Azərbaycanda həyata keçirilən çoxcəhətli və genişmiqyaslı milli siyasət üçün bir tarixi hazırlıq işi kimi qiymətləndirilir. Monoqrafiyada, həmçinin, bu siyasətin milli müstəqillik konsepsiyası və praktikası, demokratik Azərbaycan cəmiyyətinin dünyaya inteqrasiyası prosesi araşdırılır.
Əsərin fəlsəfi-siyasi publisistika üslubunda səlis və aydın dildə yazılması bütünlükdə xüsusi peşə hazırlığı keçməyənlər üçün çox çətin bir sahənin - milli siyasət sahəsinin problemlərinin geniş oxucu auditoriyası tərəfindən rahat anlaşılmasına imkan yaradır.
Kitab siyasətçilər, siyasi tədqiqatlarla məşğul olan elmi işçilər, ali məktəb müəllimləri, tələbələr, ümumiyyətlə geniş oxucu auditoriyası üçün nəzərdə tutulur.
Müəllif "Heydər Əliyevin milli siyasəti" kitabına yazdığı "Qırğız oxucuya" geniş başlıqlı ön sözdə ümummilli liderin şərəfli ömür yolu, Azərbaycanın tarixindəki müstəsna rolundan bəhs etməklə yanaşı, onun keçmiş SSRİ-nin əsas rəhbərlərindən biri, bütün İttifaqda yüksək nüfuza malik şəxs, dünya şöhrətli siyasi xadim, əvəzsiz dövlət adamı kimi xarakterizə edir, həmçinin Azərbaycana qayıdışı, dövlətin dirçəlişi və xalqımızın birliyi üçün gördüyü təkrarolunmaz işlərdən müfəssəl bəhs edir.
Heydər Əliyevin türk dünyasına məhəbbəti, TDƏŞ, TÜRKSOY, TÜRKPA kimi türk xalqlarını birləşdirən beynəlxalq təşkilatların yaranması üçün apardığı işlər, ölkəmizin Qırğızstan və ümumiyyətlə Mərkəzi Asiya ölkələri ilə sıx əməkdaşlıq əlaqələrinin qurulması və inkişafı yolunda fəaliyyəti, həmçinin qırğız xalqına da xüsusi diqqət və məhəbbətlə yanaşdığını dilə gətirir. Sitat: "Ulu öndər Heydər Əliyev deyirdi: "Manas" - bizim ümumi dilimizdə yazılıb. Biz kökü bir, dili bir olan xalqlarıq".
Ön sözdə Ermənistan-Azərbaycan, Dağlıq Qarabağ münaqişəsinin sülh yolu ilə həlli istiqamətində Heydər Əliyevin təşəbbüslərindən danışan müəllif deyib ki, BMT Təhlükəsizlik Şurası Ermənistan hərbi qüvvələrinin işğal olunmuş Azərbaycan torpaqlarından qeyd-şərtsiz çıxarılması, məcburi köçkünlərin ev-eşiklərinə qaytarılması ilə əlaqədar dörd qətnamə qəbul edib. Lakin işğalçı Ermənistan dövləti hələ də bu sənədləri və digər nüfuzlu beynəlxalq təşkilatların qətnamələrini yerinə yetirmir və bununla da dünya ictimaiyyətinə meydan oxuyur.
Müəllif ön sözdə ulu öndərin, həmçinin Azərbaycançılıq ideyasının gerçəkləşməsində, həyata keçirilməsində, dünya azərbaycanlılarının bir araya gələrək təşkilatlanmasında misilsiz xidmətlərindən, ötən əsrin otuzuncu illər repressiyalarının qurbanları olan yurddaşlarımızın Qırğızıstanda qardaş-bacılar kimi qarşılanmasından, indi ölkədə yurddaşlarımızın fəaliyyətindən ətraflı söz açır.
Azərbaycan həqiqətləri, ölkəmizin dünya miqyasında sayılıb-seçilməsində, nüfuz sahibi olmasında Heydər Əliyevin və Prezident İlham Əliyevin əvəzolunmaz xidmətlərini şərh edib.
Ön sözdə hazırda Azərbaycanla Qırğızıstan arasında əməkdaşlığın möhkəmləndirilməsinin və inkişafının dövlət başçıları İlham Əliyevlə Almazbek Atambayevin siyasətinin prioritet istiqaməti olduğu vurğulanır.
Kitabın fotoalbom hissəsində ulu öndərin prezidentliyi dövründə müxtəlif məqamları, ölkə və beynəlxalq təşkilatların liderləri ilə keçirdiyi görüşləri, Qırğız Respublikasına səfəri, həmçinin Prezident İlham Əliyevin Qırğız Respublikasına işgüzar səfərini, türk dövlətlərinin başçılarının ölkəmizə səfərini əks etdirən tarixi şəkillər yer alır.
Əsəri qırğız dilinə Bekten Dıykanbayın çevirib. Elmi redaktoru Qırğız Respublikasının fövqəladə və səlahiyyətli səfiri, professor Nurlan Aytmurzayevdir.
Baki-xeber.com
