Azər Allahverənov: "Aİ ilə Azərbaycan arasında viza rejiminin sadələşdirilməsi bu iki tərəf arasında miqrasiya proseslərinin intensiv xarakter almasına səbəb ola bilər"
Avropa İttifaqı (Aİ) ilə viza rejiminin sadələşdirilməsi barədə sazişin uğurla icra olunmasından sonra Azərbaycan Avropa ilə viza prosedurunun tamamilə aradan qaldırılması üçün fəaliyyət planı tələb edəcək.
Bunu xarici işlər nazirinin müavini Mahmud Məmməd-Quliyev deyib: "Azərbaycan və Aİ viza rejiminin sadələşdirilməsi və readmissiya barədə iki saziş imzalayıb. Mənə məlum olduğu qədər, Azərbaycan tərəfindən ciddi qayda pozuntusu qeydə alınmayıb. Ölkəmizdən Avropaya gedən miqrantların sayı azdır. Əgər hər şey yaxşı davam etsə, Aİ və Azərbaycan arasında vizasız rejimin icra olunmasının növbəti mərhələsi başlayacaq. Prosedur belədir: əvvəlcə viza rejimi sadələşdirilir, sonra tamamilə aradan qalxır".
Nazir müavini qeyd edib ki, hazırda Azərbaycanla Aİ arasında vizasız rejim yalnız diplomatik pasport sahiblərinə şamil olunur.
Məsələ ilə bağlı fikir bildirən miqrasiya sahəsi üzrə ekspert Azər Allahverənov "Bakı-Xəbər"ə açıqlamasında qeyd etdi ki, Aİ ilə Azərbaycan arasında viza rejiminin sadələşdirilməsi bu iki tərəf arasında miqrasiya proseslərinin intensiv xarakter almasına səbəb ola bilər: "Nəticə etibarilə kifayət qədər sayda insan ya Avropaya, ya da əksinə, Azərbaycan tərəfinə gələ bilər. Amma burada başqa bir məsələ də var. Eynilə hər iki tərəf arasında sadələşdirilmiş viza rejimi olduqda və ya vizasız gediş-gəliş olduğu halda, bu, miqrasiyanın statistik göstəriciləri ilə yanaşı, digər sahələrə də təsir edə bilər. Bu proses iqtisadi, mədəniyyətlərarası dialoq müstəvisində də özünü göstərə bilər".
Həmsöhbətimizin sözlərinə görə, insanlar tərəfindən vizanın alınması proseduru əlavə çətinliklərlə üzləşmək kimi dəyərləndirilir: "Həqiqətən də Aİ ölkələrinə viza almaq üçün müəyyən şərtlər və tələblər var. Ancaq viza olmasa, insanlar daha rahat şəkildə, sadəcə, təyyarə biletini almaqla Avropa İttifaqına doğru hərəkət edə bilər. Viza rejimi prosedurunun dəyişdirilməsi müsbət haldır".
A.Allahverənovun fikrincə, hər iki tərəf vizanın sadələşdirilməsi və ya aradan qaldırılmasına maneə törədən amilləri aradan qaldırmalıdır. Bunlar həll olunarsa, prosesin özü rahat şəkildə həllini tapacaq.
Günel CƏLİLOVA
