Dekabr ayının 2-də Qırğız Respublikası Parlamentinin sədri Çınıbay Tursunbekovla Azərbaycan Respublikasının Qırğız Respublikasındakı fövqəladə və səlahiyyətli səfiri Hidayət Orucovun görüşü olub.
Çınıbay Tursunbekov Azərbaycan səfirini Parlamentdə görməyindən şad olduğunu, Hidayət Orucovun Qırğızstanın səmimi dostu olaraq yadında qaldığını bildirib.
Parlament sədri son illər ölkələr arasında əlaqələrin yüksələn dinamikasından məmnunluğunu bildirib. O, bu ilin sentyabr ayının 26-da Azərbaycanda uğurla keçirilən referenduma görə səfiri təbrik edərək, bu uğurun xalqın öz Prezidentinə inam və sevgisinin bariz nümunəsi olduğunu qeyd edib.
Qırğız Parlamentinin spikeri bu il sentyabr ayının 29-30-da Azərbaycanda V Bakı Beynəlxalq Humanitar Forumunun yüksək səviyyədə keçirildiyini, Qırğızstanın Baş nazirinin müavininin rəhbərlik etdiyi nümayəndə heyətinin Bakıdan xoş təəssüratla qayıtdığını bildirib, dünyada baş verənlər fonunda belə tədbirlərin keçirilməsinin vacibliyi bildirib.
Səfir Hidayət Orucov Çınıbay Tursunbekovu Parlamentin sədri seçilməsi münasibətilə təbrik edib. O, bu ilin dekabr ayının 11-də Qırğızstanda "Qırğız Respublikasının Konstitusiyasına dəyişiklik edilməsi haqqında" Qanun layihəsi ilə bağlı keçiriləcək referenduma uğurlar arzu edib.
Azərbaycanla Qırğızstan arasında münasibətlərin bütün sahələrdə inkişaf etdiyini qeyd edən səfir ölkə Parlamentləri, dostluq qrupları, həmçinin hakim partiyalar arasında əlaqələrin daha da gücləndirilməsinin vacibliyini vurğulayıb.
Qırğızstan Parlamentin sədri ölkəsinin Azərbaycanı təkcə sıx əməkdaşlıq etdiyi ölkə kimi yox, həm də pis gündə yanında olan qardaş kimi qəbul etdiyini xüsusi qeyd edib. O, bu il Qırğızstanda keçirilən "II Ümumdünya Köçərilər Oyunları"nda Azərbaycan Prezidentinin tapşırığı ilə böyük nümayəndə heyətinin iştirak etməsinin ölkələri üçün çox böyük önəm daşıdığını xüsusilə vurğulayıb.
Səfir Hidayət Orucov Azərbaycanın bundan sonra da qardaş Qırğızstanı dəstəkləyəcəyini bildirərək, dünya şöhrətli qırğız şairi Çingiz Aytmatovun bir çox yubiley tədbirlərinin ölkəmizdə keçirildiyini, hətta 80 illik yubileyində Prezident İlham Əliyevin onu "Dostluq" ordeni ilə təltif etdiyini xatırladıb.
Görüşdə 2017-ci ildə Azərbaycanın Qırğızstanda, Qırğızstanın isə Azərbaycanda mədəniyyət günlərinin keçirilməsi məsələləri müzakirə edilib.
Səfir, bütün sahələrə olduğu kimi, Səfirliyimizin Azərbaycanla Qırğızstanın regionları arasında da əməkdaşlıq əlaqələrinin yaranması üçün davamlı iş apardığını deyib. O, artıq Qırğızstanın Çuy vilayətinin Kant şəhərinin merinin başçılıq etdiyi nümayəndə heyətinin Qubada səfərdə olduğunu və Quba ilə Kant şəhəri arasında əməkdaşlıq haqqında niyyət protokolunun imzalandığını, həmçinin bu ilin dekabr ayının 16-da Quba rayonun icra başçısının rəhbərlik edəcəyi nümayəndə heyətinin Qırğızstana səfərə gələcəyini və səfər çərçivəsində memorandumun imzalanacağını diqqətə çatdırıb.
Spiker regionlararası əlaqələrin yaranmasının çox vacib məsələ olduğunu, xalqlarımızın bir-birini daha yaxşı tanımağa imkan verəcəyini qeyd edib.
Görüşdə digər qarşılıqlı maraq doğuran məsələlər müzakirə olunub.
Xəbər xidməti
