Azərbaycan Respublikasının Prezidenti İlham Əliyev və xanımı Mehriban Əliyeva dekabrın 2-də Zərdab rayonuna səfərə gəliblər. Dövlətimizin başçısı və xanımı xalqımızın ümummilli lideri Heydər Əliyevin Zərdab şəhərinin mərkəzi meydanındakı abidəsi önünə gül dəstələri qoydular.
Zərdab Rayon İcra Hakimiyyətinin başçısı Lütvəli Babayev Prezident İlham Əliyevə və xanımı Mehriban Əliyevaya son illərdə rayonda görülən işlər, həyata keçirilən layihələr barədə məlumat verdi.
Bildirildi ki, son illərdə Zərdabın sosial-iqtisadi göstəriciləri xeyli yaxşılaşıb. Rayonda çoxlu sosial infrastruktur obyektləri tikilib, kənd təsərrüfatı sahəsində istehsal müəssisələri yaradılıb, yeni suvarma sistemləri qurulub.
Zərdab Rayon Mərkəzi Xəstəxanasında yaradılan şəraitlə tanışlıq...
Prezident İlham Əliyev və xanımı Mehriban Əliyeva Zərdab Rayon Mərkəzi Xəstəxanasının əsaslı təmirdən sonra istifadəyə verilən yeni binasında yaradılan şəraitlə tanış olublar. Zərdab Rayon Mərkəzi Xəstəxanasının binası 1988-ci ildə inşa edilib. Uzun müddət baxımsız vəziyyətdə qalan binada 2013-cü ildə əsaslı təmir işlərinə başlanıb. Görülən işlər nəticəsində xəstəxananın binası müasir görkəm alıb, zəruri avadanlıqla təchiz olunub.
Səhiyyə naziri Oqtay Şirəliyev dövlətimizin başçısına və xanımına məlumat verdi ki, xəstəxana əsaslı təmir və yenidənqurmadan sonra 125 çarpayılıq tibb müəssisəsi kimi fəaliyyət göstərəcək. Hazırda xəstəxanada 530 işçi çalışır ki, onlardan 57-si həkim, qalanları isə orta tibb işçiləridir.
İki korpusdan və doqquz yardımçı binadan ibarət olan xəstəxananın əsas korpusunda cərrahiyyə, ginekologiya, doğum, terapiya, dializ, şüa-diaqnostika, intensiv terapiya, poliklinika və digər şöbələr fəaliyyət göstərəcək. Digər korpusda isə yoluxucu xəstəliklər bölməsi fəaliyyət göstərəcək.
Müasir tibbi avadanlıq və ləvazimatlarla təmin olunan Zərdab Rayon Mərkəzi Xəstəxanasında ətraf rayonlardan gələnlərə də tibbi xidmət göstəriləcək. Xəstəxananın laboratoriyası analizlərin dəqiq aparılması üçün zəruri avadanlıqla təchiz edilib.
Xəstəxananın müasir reanimasyon və kardioloji avadanlığı, həmçinin əməliyyatxana üçün səyyar rentgen aparatı vətəndaşlara yüksək səviyyədə tibbi xidmət göstərməyə imkan verir. Bütün bunlar bir daha göstərir ki, müasir Azərbaycanı modern texnologiyaların tətbiq olunduğu məkana çevirmək məqsədini qarşıya qoyan Prezident İlham Əliyevin diqqət və qayğısı sayəsində ölkəmizdə yenidən qurulan səhiyyə müəssisələri regionlarda ilk dəfə açıq ürək əməliyyatı və qara ciyərin köçürülməsi kimi mühüm nailiyyətlərə imza atıb. Ötən illər ərzində regionlarda yüzlərlə tibb ocağının, müalicə-diaqnostika mərkəzinin inşası və ya yenidən qurulması səhiyyə sisteminin köklü şəkildə inkişafından xəbər verir.
Zərdab Rayon Mərkəzi Xəstəxanasında yaradılan şəraitlə tanışlıqdan sonra dövlətimizin başçısı və xanımı tibb ocağının kollektivi və rayon ictimaiyyətinin nümayəndələri ilə görüşüblər.
Prezident bildirib ki, sosial siyasət bizim əsas istiqamətimizdir: “Sizi ürəkdən salamlayıram. Zərdab rayonunda olmaqdan çox məmnunam. Bu gün Zərdab rayonunun həyatında çox əlamətdar gündür. Uzun fasilədən sonra Mərkəzi Rayon xəstəxanası artıq vətəndaşların sərəncamına verilib. Çox gözəl işlər görülüb. Əsaslı təmir aparılıb və indi bu xəstəxana ən yüksək standartlara cavab verir. Həm artıq burada abadlıq işləri görülüb və gözəl müasir avadanlıqla təmin edilib. Əminəm ki, burada göstəriləcək tibbi xidmət də yüksək səviyyədə olacaq. Mərkəzi rayon xəstəxanasının istifadəyə verilməsi bunu göstərir ki, biz öz sosial siyasətimizi bu gün də uğurla icra edirik. Sosial siyasət bizim əsas istiqamətimizdir. İnsanların sağlamlığı, insanların ömrünün uzun olması, sağlam həyat tərzi bütün bunlar bizim üçün prioritetdir. Azərbaycan vətəndaşları bu gün ən müsair tibbi xidmətə layiqdirlər və bunu görürlər. Ölkəmizdə son dövrlər 600-dən çox müasir tibb ocağı tikilib və ya əsaslı təmir edilib, ölkəmizdə pulsuz müayinədən keçmə siyasəti aparılır. Hər il milyonlarla insan yeni yaradılmış tibb ocaqlarında diaqnostikadan keçir. Onlara lazımi xidmət göstərilir və beləliklə insanlarımız dövlət hesabına öz sağlamlıqlarını qoruyurlar. Mən əvvəlki illərdə dəfələrlə xəstəxanaların açılışlarında bildirmişdim ki, hər bir insan hər il müayinədən keçməlidir. Artıq biz buna nail olmuşuq. Bu il 4 milyondan çox insan bizim ölkə üzrə bütün müasir xəstəxanalarda müayinələrdən keçib. Zərdab rayonunda insanların sağlamlığı üçün digər tədbirlər də görülüb. 4 il bundan əvvəl mənim iştirakım ilə Zərdab şəhərinə içməli suyun verilməsini biz qeyd etmişik. Ondan əvvəlki illərdə içməli su qrafik üzrə verilirdi, gündə 4-5 saat. Özü də keyfiyyət o qədər yaxşı deyildi. Ancaq artıq 4 ildir ki, fasiləsiz, Ümumdünya Səhiyyə Təşkilatının standartlarına uyğun içməli su verilir".
Xəstəxananın kollektivi adından çıxış edən Esmira Tağıyeva və rayon ictimaiyyəti adından danışan Fiqurə Abbasova göstərdiyi diqqət və qayğıya görə Azərbaycan Prezidentinə minnətdarlıqlarını bildirdilər.
Sonda xatirə şəkli çəkdirildi.
