Osman Gündüz: "Sərgi-konfransın gələcəkdə formatını dəyişmək olar"
Məlum olduğu kimi, noyabrın 29-dan etibarən Bakı Ekspo Mərkəzində informasiya və kommunikasiya texnologiyaları (İKT) sahəsi üzrə ixtisaslaşmış tədbir - "Bakutel-2016" XXII Azərbaycan Beynəlxalq Telekommunikasiya və İnformasiya Texnologiyaları Sərgi və Konfransı işə başlayıb. Qeyd edək ki, sərgi dekabrın 2-dək davam edəcək.
Regionun ən böyük tədbirlərindən biri olan "Bakutel" sərgisi 20 ildən artıqdır hər il telekommunikasiya bazarının aparıcı iştirakçılarını öz platformasında bir araya toplayır.
Builki sərgidə Azərbaycan, ABŞ, Almaniya, Türkiyə və digər ölkələri təmsil edən 200-dən artıq şirkət iştirak edir. Məlumat üçün bildirək ki, iştirakçıların 40 %-i "Bakutel" sərgisinin daimi eksponentləridir.
Beynalxalq Telekommunikasiya və İnformasiya Texnologiyaları Sərgisinin Bakıda keçirilməsinin əhəmiyyəti və bu sərginin nəyi ifadə etməsi barədə ekspertlə söhbət etdik.
İKT sahəsi üzrə mütəxəssis Osman Gündüz "Bakı-Xəbər"ə açıqlamasında qeyd etdi ki, Cənubi Qafqaz regionunda bu sərgi yeganə olaraq Azərbaycanda keçirilir: "Əksər ölkələrin İKT sahəsində məşhur olan nümayəndələri, birinci şəxsləri "Bakutel-2016" XXII Azərbaycan Beynəlxalq Telekommunikasiya və İnformasiya Texnologiyaları Sərgisində iştirak etmək üçün ölkəmizə gəlib. Təcrübə mübadiləsi, yeniliklərlə tanış olmaq və Azərbaycanın tanıtımı üçün gözəl fürsətdir. Burada tək sərgilər nümayiş olunmur, həmçinin, konfranslar, görüşlər təşkil olunur. Mənim üçün xoş hadisə sərgidə iştirak edən məmurlar və nümayəndələrin uzun müddətdir dondurulan "Tasim" layihəsini yenidən müzakirəyə gətirməsi oldu. "Tasim" layihəsini Avropadan Asiyaya qədər olan ölkələri birləşdirən pilot layihədir. Bu layihənin əsas operatorlarından biri də Azərbaycandır. Təəssüf ki, bu layihə son illər dondurulub. Ancaq sevindirici haldır ki, adıçəkilən layihə ilə bağlı müzakirələr aparılır. "Tasim" reallaşarsa, Azərbaycan üçün müsbət əhəmiyyəti olar".
Həmsöhbətimiz hesab edir ki, bu sərgi-konfransın gələcəkdə formatını dəyişmək olar: "Belə bir sərgini hər il deyil, bir neçə ildən bir keçirmək olar. Hər il keçirildiyi üçün şirkətlər tərəfindən tələskənliyə yol verilir. Şirkətlər nümayiş etdirdiyi məhsulu normal şəkildə təqdim edə bilmir. Sərgidə olan zaman "Delta Telecom", "Ultra Technologies" və digər şirkətləri görmədim. Sərgini bir neçə ildən bir keçirməklə istənilən nəticə əldə oluna bilər".
Ekspertin fikrincə, bu sərgi-konfransda kütləviliyi təmin etmək üçün "Facebook", "Twitter", "Google" və digər sosial media resurslarını cəlb etmək lazımdır.
Günel CƏLİLOVA
