Aqşin Əliyev: "Yəqin ki, Rusiyanın hərbi münaqişə zamanı neytrallığını saxlamasının vacibliyi və bir sıra başqa məsələlər də sənəddə öz əksini tapıb"
Azərbaycan və Rusiya müdafiə nazirlikləri arasında 2017-ci il üçün əməkdaşlıq planı imzalanıb. Müdafiə Nazirliyinin mətbuat xidmətindən verilən məlumata görə, noyabrın 30-da Moskva şəhərində keçirilən MDB iştirakçı dövlətlərinin Müdafiə Nazirləri Şurasının növbəti iclasında iştirak edən Azərbaycan Respublikasının müdafiə naziri, general-polkovnik Zakir Həsənov Rusiya Federasiyasının müdafiə naziri, ordu generalı Sergey Şoyqu ilə görüşüb. Görüşdə ölkələrimiz arasında hərbi və hərbi-texniki əməkdaşlığın hazırkı vəziyyəti və inkişafı perspektivləri müzakirə edilib, eləcə də regional təhlükəsizliyin aktual məsələləri barədə fikir mübadiləsi aparılıb.
S.Şoyqu bildirib ki, hər iki ölkənin müdafiə nazirlikləri beynəlxalq terrorla mübarizəyə qarşı birgə fəaliyyət göstərir. O, həmçinin, hərbi əməkdaşlıq sahəsində nəzərdə tutulan planların yerinə yetirildiyini vurğulayıb.
General-polkovnik Z.Həsənov Azərbaycanla Rusiya arasında hərbi və hərbi-texniki sahədə əməkdaşlığın inkişaf etdiyini bildirib və bu görüşün hər iki ölkə üçün səmərəli olacağını qeyd edib. Görüşün sonunda iki ölkənin müdafiə nazirlikləri arasında 2017-ci il üçün əməkdaşlıq planı imzalanıb.
İmzalanan əməkdaşlıq planının hazırkı dönəm üçün nə kimi əhəmiyyəti var?
Ekspert Aqşin Əliyevin sözlərinə görə, Rusiya ilə Azərbaycan arasındakı münasibətlər çox böyük önəmə malikdir: "Bilirsiniz ki, Rusiya dünyanın qüdrətli dövlətlərindən biri olmaqla yanaşı, həm də bizim yaxın qonşumuzdur. Azərbaycan müharibə şəraitində yaşayan çox az ölkələrdəndir. Bizim üzləşdiyimiz problemə Rusiyanın təsir imkanları çox böyükdür. Eyni zamanda, onların Ermənistanla hərbi sahədə ciddi əməkdaşlığı var. Bu yaxınlarda hətta birgə ordunun yaradılması da həyata keçirildi. Bütün bu və bir sıra sadalanmayan faktorlar Rusiya ilə hərbi sahədəki münasibətləri normal məcraya salmağı tələb edir. Biz eyni zamanda Rusiyadan müasir hərbi silahlar alırıq. Gələcəkdə prosesin davamlı xarakter alması üçün belə təmaslara və müəyyən sənədlərin imzalanmasına ehtiyac var. Məhz hazırkı dönəmdə bu cür təmaslar zəruridir. Yəqin ki, bizim müdafiə naziri ölkəmizin maraqlarının nədən ibarət olduğunu bir daha rusiyalı həmkarının diqqətinə çatdırıb. İmzalanan əməkdaşlıq planı hər iki ölkənin üzərinə müəyyən öhdəliklər də qoymuş olur. Yəqin ki, Rusiyanın hərbi münaqişə zamanı neytrallığını saxlamasının vacibliyi və bir sıra başqa məsələlər də sənəddə öz əksini tapıb".
Məhəmmədəli QƏRİBLİ
