İlqar Orucov: "İmzalanan memorandum ADA Universitetinin ilk yeniliyi və uğuru deyil"
Xəbər verildiyi kimi, ADA Universiteti və Kaunas Texnologiya Universiteti arasında razılaşma memorandumu imzalanıb. Yeni başlanan əməkdaşlığa görə ADA Universitetinin İctimai və Beynəlxlaq Münasibətlər fakültəsində Avropa İttifaqı (Aİ) Araşdırmaları üzrə yeni magistr təhsilinin verilməsi məsələsi tədqiq ediləcək.
Avropa İttifaqının 350 min avro dəyərində qrant ayırdığı bu layihə qarşısına bir sıra məqsədlər qoyub. Belə ki, gələn ilin sonuna qədər ADA Universitetində Aİ məsələləri üzrə ən azı səkkiz ixtisas kursları hazırlanıb sınaqdan keçirilməli, bu kursları aparan professor-müəllim heyəti müəyyənləşdirilməli, yeni magistratura proqramının akkreditasiyası üçün keyfiyyətin təminatı mexanizmi yaradılmalıdır. Layihə çərçivəsində bir sıra aparıcı Avropa universitetləri ilə əməkdaşlıq ediləcək. ADA Universiteti əsas tərəfdaşı olan Kaunas Texnologiya Universitetinin Avropa İttifaqı üzrə təklif etdiyi akademik proqramlar təcrübəsindən yararlanmaq niyyətindədir. Belə ki, Litvanın ali təhsil ocağında Avropaya inteqrasiya üzrə xüsusi şöbə hələ 1998-ci ildə yaradılıb. Bu gün isə onlar Avropaya inteqrasiya və Avropa araşdırmaları sahələri üzrə magistr və bakalavr təhsili verir.
Azərbaycan Gənc Alim, Aspirant və Magistrlər Cəmiyyətinin sədri, fəlsəfə doktoru İlqar Orucov "Bakı-Xəbər"ə açıqlamasında qeyd etdi ki, imzalanan memorandum ADA Universitetinin ilk yeniliyi və uğuru deyil. Adıçəkilən təhsil ocağı bu günə kimi bir sıra universitetlərlə, eyni zamanda, elmi mərkəzlərlə razılaşma memorandumu imzalayıb. Bütün bunlar Azərbaycan təhsilində yeni addımlar sayılır: "Hesab edirəm ki, imzalanan sonuncu memorandumun Azərbaycanda magistr hazırlığında böyük rolu olacaq. Avropa Birliyinə üzv olan ölkələrlə əməkdaşlıq və gənc kadrların hazırlanması rəqabətə davamlılığın tərkib hissəsidir. Universitetlər arasında imzalanan memorandum ciddi effekt verəcək. Biz gələcəkdə Azərbaycanda Avropa təhsilli gənc magistrlərin hazırlanmasının şahidi olacağıq. Bu, digər universitetlər üçün də bir nümunədir. Zənnimcə, digər universitetlərdə də bu tipli addımlar atılmalıdır. Müxtəlif mübadilə proqramları, eyni zamanda magistr hazırlığı proqramları üzrə qabaqcıl ölkələrin təcrübəsini tətbiq etmək lazımdır. Tək magistr proqramları üzrə deyil, bakalavr pilləsinə hazırlıqla da bağlı inkişaf etmiş ölkələrin təcrübəsini öyrənmək lazımdır".
Həmsöhbətimizin sözlərinə görə, Azərbaycan gənclərinin dünya səviyyəli mütəxəssis olması üçün dünyanın aparıcı ali təhsil ocaqları ilə bizim universitetlər əməkdaşlıq əlaqələri qurmalıdır.
Doktorantura pilləsində də bu cür əməkdaşlıq olduqca vacibdir. Gələcəkdə gənclərimizin diplomlarının xarici ölkələrdə tanınması və ciddi qəbul olunması üçün ali məktəblərimiz maraqlı olmalıdır. Ali məktəblər maraqlı olmalıdır ki, onun məzunu gələcək həyatında hansı nailiyyətlər əldə edə biləcək. Bunun üçün bizim təhsil ocaqlarının görəcəyi iş kifayət qədərdir".
Günel CƏLİLOVA
