Məhərrəm Zülfüqarlı: "Rusiya da şərait yaratmalıdır ki, bu ölkədə Azərbaycan dilinin tədrisi yüksək səviyyədə olsun"
Prezident İlham Əliyev Rusiya Federasiyasının təhsil və elm naziri xanım Olqa Vasilyevanı qəbul edib. Görüş zamanı bir sıra məsələlər müzakirə olunub.
Təhsil sahəsində əlaqələrin ənənəvi xarakter daşıdığına toxunan dövlət başçısı bildirib ki, çox mühüm olan odur ki, ötən 25 il ərzində ölkələrimiz bu ənənələri nəinki qoruyub, hətta daha da möhkəmləndirib.
İki ölkə arasında orta, ali və elmi təhsil sahəsində əlaqələrə toxunan rusiyalı nazir Lomonosov adına Moskva Dövlət Universitetinin və Seçenev adına Birinci Moskva Dövlət Tibb Universitetinin Bakı filiallarının uğurla fəaliyyət göstərdiyini deyib. Həmçinin, rusiyalı nazir qeyd edib ki, Azərbaycanda rus dilində təhsil aparılan məktəblərdə oxuyan xeyli sayda şagirdlərin olduğunu nəzərə alaraq, misal üçün, Lomonosov adına Moskva Dövlət Universitetinin tərkibində filoloji qrupun açılmasını təklif edib. Görüşdə Azərbaycanda rus dilinin və Rusiya Federasiyasında azərbaycanlıların sıx yaşadığı ərazilərdə Azərbaycan dilinin tədrisinə texniki dəstək göstərilməsinin vacibliyi qeyd olunub.
Ümumilikdə, MDU-da filoloji fakültənin yaradılmasına və Rusiyada Azərbaycan dilinin tədrisinin genişləndirilməsinə ekspertlər necə baxır? Məsələyə münasibət bildirən təhsil eksperti Məhərrəm Zülfüqarlının fikrincə, bu sahədə işlərin görülməsi faydalı ola bilər: "Nəzərə almalıyıq ki, bu gün Rusiya ilə Azərbaycan çox yaxşı münasibətlərə malikdir. İki ölkə arasında bir sıra sahələrdə əlaqələr inkişaf edir. Onlardan biri də təhsil sahəsidir. Belə ki, bir sıra postsovet ölkələrində rus sektoruna aid olan məktəblərin sayı kəskin azaldığı halda, Azərbaycanda xeyli sayda belə məktəb fəaliyyət göstərir. Həmin məktəblərə hər cür maddi-texniki şərait yaradılıb. Belə olan halda, Rusiya da şərait yaratmalıdır ki, bu ölkədə Azərbaycan dilinin tədrisi yüksək səviyyədə olsun. Ona görə ki, Rusiyada milyonlarla azərbaycanlı yaşayır. Rusiyanın elə yerləri var ki, orada azərbaycanlılar kompakt yaşayır. Həmin ərazilərdə məktəblər açmaq olar. Yəni hər iki ölkə təhsil sahəsində ciddi əməkdaşlıq edə bilər". Vidadi ORDAHALLI
