Qırğız Respublikasının rus dilində çap olunan əsas və ən çox oxucu kütləsinə sahib dövlət qəzeti olan "Slovo Kırqızstana" qəzetinin baş redaktorunun müavini, bu ilin sentyabr ayının 29-30-da Bakı şəhərində keçirilən V Bakı Beynəlxalq Humanitar Forumunda iştirak edən xanım Kifayət Əskərovanın Azərbaycana səfəri ilə bağlı təəssüratları həmin qəzetin 21 oktyabr 114 nömrəli, 11 noyabr 122 nömrəli və 25 noyabr 127 nömrəli saylarında, qəzetin rəngli və mərkəzi səhifələrində dərc edilib.
Kifayət xanım qəzetin 21 oktyabr 114 nömrəli sayındakı yazısını "Bişkekdən Bakıya təyyarələr uçmur. Təəssüf..." adı altında təqdim edib. O, birbaşa reys olmadığı üçün tranzit uçuşlardan istifadə etməli olduğundan, həmçinin birbaşa reys rentabelli olmaması üzündən 2 dəfə ləğv olunduğuna görə məqaləyə bu adı verməyi qərara alıb.
Müəllif məqalədə Bakı Humanitar Forumunun tarixi, yüksək səviyyəli qonaqları haqqında geniş məlumat verir. O, həmçinin, xarici qonaqların Bakının gözəlliyindən heyrətini gizlədə bilməməsini, xalqın qonaqpərvərliyini, möhtəşəm yeni tikililərin əzəmətini xüsusilə qeyd edir. Jurnalist Forumun keçirildiyi Heydər Əliyev Mərkəzinin tarixi haqqında da bilgi verir. O, Forumda Prezident İlham Əliyevin və xanımı Mehriban Əliyevanın iştiraklarının tədbirə xüsusi önəm verdiyini, Azərbaycan Prezidentinin Forumda dərin məzmunlu geniş nitqini, Ermənistan-Azərbaycan, Dağlıq Qarabağ münaqişəsi haqqında fikirlərini qəzet oxucularının diqqətinə çatdırır.
Kifayət xanım qəzetin 11 noyabr 122 nömrəli və 25 noyabr 127 nömrəli saylarında "Dənizin və insanların qayıtdığı şəhər..." adı altında geniş yazıları Azərbaycanın şəhər və rayonlarının, xüsusən də Bakının gözəlliyinə həsr edir.
Əslən Azərbaycandan olan jurnalist, bir çox həmyerlilərimiz kimi, 1933-1937-ci illərdə sürgün olunmuş ziyalı azərbaycanlı ailələrin nümayəndələrindəndir. Onun atası Lerik rayonun Zuvand kəndində anadan olub. O, məqaləsində atasının doğulduğu yeri ikinci İsveçrə adlandırır.
Müəllif Bakının ən qədim hissəsi olan İçəri Şəhər haqqında da geniş məlumat verir. O, memarlığı, gözəlliyi və təzə tikililəri ilə hər bir turisti heyran qoyan möhtəşəm yeni şəhərin içində qədim və çox böyük tarixi olan İçəri Şəhərin Bakının gözəlliyinə gözəllik qatdığını xüsusilə qeyd edir.
Jurnalist qəzetin hər sayında yazı ilə bərabər özünün çəkdiyi şəkilləri də oxucuların diqqətinə çatdırır.
Məqalədə müəllifin imzasından sonra qəzetin redaksiyasının K.Əskərovanın Bakı şəhərinə səfərinin hazırlığına və onun V Bakı Beynəlxalq Humanitar Forumunda iştirakına görə Azərbaycan Respublikasının Qırğız Respublikasındakı Səfirliyinə təşəkkürü çap olunub.
Xəbər xidməti
