Prezident İlham Əliyev noyabrın 27-də Rusiya Federasiyasının təhsil və elm naziri xanım Olqa Vasilyevanı qəbul edib.
Baki-xeber.com-un president.az saytına istinadən xəbərinə görə, görüşdə Rusiya Federasiyasının təhsil və elm naziri Olqa Vasilyevanıın ölkəmizə səfərinin maraqlı keçəcəyinə ümidvar olduğunu bildirən dövlət başçısı təhsil və elm sahələrində əməkdaşlıqla bağlı məsələlərin müzakirəsi üçün çoxlu mövzuların olduğunu deyib. Prezident İlham Əliyev ikitərəfli münasibətlərimizin müxtəlif istiqamətlərdə, o cümlədən təhsil sahəsində uğurla inkişaf etdiyini vurğulayıb.
Təhsil sahəsində əlaqələrin ənənəvi xarakter daşıdığına toxunan dövlət başçısı bildirib ki, çox mühüm olan ötən 25 il ərzində ölkələrimizin bu ənənələri nəinki qoruması, hətta daha da möhkəmləndirməsidir. Prezident İlham Əliyev bunun həm orta, həm də ali təhsil sahələrini əhatə etdiyini deyib. Rusiya təhsil ocaqlarında Azərbaycanlı tələbələrin təhsil aldıqlarını qeyd edən dövlət başçısı artıq Azərbaycanda da Rusiya ali məktəblərində təhsil almaq imkanının olduğunu vurğulayıb. Rusiyanın iki ali təhsil müəssisəsinin filiallarının Azərbaycanda uğurla fəaliyyət göstərməsinin önəmini qeyd edən dövlət başçısı nazirin Azərbaycanda olduğu dövrdə bu proseslərlə yaxında tanış olmaq imkanı olacağını deyib. Prezident İlham Əliyev ikitərəfli əməkdaşlıq çərçivəsində əlaqələrin daha da möhkəmləndirilməsi ilə bağlı təhsil nazirlikləri arasında səmərəli müzakirələrin aparılacağına ümidvar olduğunu bildirib.
Rusiya Federasiyasının Təhsil və Elm naziri xanım Olqa Vasilyeva ona Azərbaycana səfər etmək imkanı yaradıldığına görə minnətdarlığını bildirib”.
Prezident İlham Əliyevin fikirlərinin təsdiqi olaraq Olqa Vasilyeva da təhsil sahəsində ənənəvi əməkdaşlığımızın hazırda da inkişaf etdirilməsinin əhəmiyyətini vurğulayıb. Ölkələrimiz arasında orta, ali və elmi təhsil sahəsində əlaqələrə toxunan rusiyalı nazir Lomonosov adına Moskva Dövlət Universitetinin və Seçenev adına Birinci Moskva Dövlət Tibb Universitetinin Bakı filiallarının uğurla fəaliyyət göstərdiyini deyib. Rus dilinin inkişaf məsələlərinə toxunan nazir bunu ölkələrimizi və xalqlarımızı bir-birinə daha da yaxınlaşdıran faktorlardan biri kimi dəyərləndirib. Xanım nazir qeyd edib ki, Azərbaycanda, o cümlədən rus dilində təhsil aparılan məktəblərdə oxuyan xeyli sayda şagirdin olduğu nəzərə alınaraq, misal üçün, Lomonosov adına Moskva Dövlət Universitetinin tərkibində filoloji qrupun açılması təklif olunur.
Görüşdə Azərbaycanda rus dilinin və Rusiya Federasiyasında azərbaycanlıların sıx yaşadığı ərazilərdə Azərbaycan dilinin tədrisinə texniki dəstək göstərilməsinin vacibliyi qeyd olunaraq, Rusiya-Azərbaycan Universitetləri Assosiasıyasının Bakıda keçiriləcək konfransının əhəmiyyətindən danışılıb, universitetlərrası əməkdaşlığın genişləndirilməsinin önəmi qeyd olunub. Söhbət zamanı ölkələrimiz arasında bir çox istiqamətlərdə, o cümlədən kənd təsərrüfatı sahəsində kadr hazırlığı ilə bağlı qarşılıqlı təcrübə mübadiləsinin zəruriliyi qeyd edilib.
