Üzeyir Cəfərov: "Bütün bu addımlar ölkənin müdafiəsi və təhlükəsizliyi üçün nəzərdə tutulub"
Azərbaycanın "2017-ci ilin dövlət büdcəsi haqqında" qanun layihəsinin xərclər hissəsinə dəyişiklik edilib. Yenilənmiş layihədə müdafiə xərcləri 63,6 % və yaxud 1,027 mlrd. manat artırılaraq 1,615 mlrd. manatdan 2,642 mlrd. manata çatdırılıb.
Bu vəsaitin 1 269,9 mln. manatı müdafiə qüvvələri, 111,9 mln. manatı milli təhlükəsizlik, 2,6 mln. manatı müdafiə və təhlükəsizlik sahəsində tətbiqi tədqiqatlar, 1 257,6 mln. manatı isə digər kateqoriyalara aid edilməyən sahələrin payına düşüb.
"Müharibə şəraitində yaşayan dövlətimizin müdafiə qabiliyyətinin və milli təhlükəsizliyinin təmin edilməsi xərclərinə 2017-ci ilin dövlət büdcəsi xərclərinin 16,7 %-i həcmində və ya 2,8 mlrd. manat vəsait nəzərdə tutulub ki, bu da cari illə müqayisədə 77,0 mln. manat və ya 2,9 % çoxdur", - deyə layihənin təqdimatında qeyd olunub.
Daha sonra "Azərbaycan Respublikasının 2016-cı il dövlət büdcəsi haqqında" Qanuna dəyişikliklər edilib və Azərbaycan 2016-cı ildə müdafiə xərclərini 391 mln. manat və ya 21,3 % artırıb. Buna səbəb müdafiə qüvvələrinə xərclənəcək vəsaitin 391 mln. manat artırılması olub.
Azərbaycanın hərbi büdcəni artırması bəzi dairələrin narahatlığına səbəb olub. Xüsusilə də Ermənistan və bəzi beynəlxalq qurumlar Azərbaycanın büdcəsinin Ermənistanın ümumi büdcəsini üstələməsindən narahatlıq keçirdiyini ifadə edib.
Bu iradları necə qiymətləndirmək olar?
Ekspert Üzeyir Cəfərov qəzetimizə açıqlamasında bildirdi ki, Azərbaycanda hərbi büdcənin artırılması tamamilə ictimai maraqlara uyğun həyata keçirilir: "Nə qədər ki, Azərbaycan torpaqları işğal altındadır, o zamana qədər də Azərbaycan hökuməti hərbi xərclərini artırmağa məcburdur. Bütün bu addımlar ölkənin müdafiəsi və təhlükəsizliyi üçün nəzərdə tutulub. Burada hansısa qeyri-adi bir şey görmürəm. Əlbəttə, biz də istərdik ki, büdcədən sosial-iqtisadi sahəyə daha çox vəsait ayrılsın. Ancaq reallıq onu tələb edir ki, Azərbaycan daha çox orduya vəsait ayırmalıdır və işğal altındakı torpaqları azad etməlidir. Sosial şəbəkə istifadəçilərinin bəziləri sosial xərclərin azaldılıb hərbi xərclərin artırılmasına etiraz edir. Vətəndaşlarımıza bir qədər səbrli olmağı məsləhət görərdim. Ermənistan ordusu Rusiya tərəfindən qanunsuz yolla silahlandırılır. Bütün bunlar isə yaxın zamanlarda Qarabağ cəbhəsində genişmiqyaslı əməliyyatların başlamasına zəmin yaradır. Həm cəbhə xəttində yaşanan atəşkəs pozuntuları, həm də sülh danışıqlarının nəticəsiz qalması fonunda Azərbaycanla Ermənistan arasında istənilən an münaqişə başlaya bilər. Ölkə başçısının da Nazirlər Kabinetinin sonuncu iclasında qeyd etdiyi kimi, müdafiə və təhlükəsizliyimizlə bağlı nə lazımdırsa, edilir və bundan sonra da ediləcək".
Məhəmmədəli QƏRİBLİ
