Məhərrəm Zülfüqarlı: "İndi Rusiyada çalışan azərbaycanlılar əvvəlkinə baxanda daha yaxşı fəaliyyət göstərir"
Qərbin Rusiyaya tətbiq etdiyi sanksiyalar bu ölkənin iqtisadiyyatına ciddi təsir edib. Etiraf edilməlidir ki, Rusiya iqtisadiyyatında müşahidə olunan geriləmə bu ölkə ilə ticarət dövriyyəsində olan qonşu dövlətlərə də təsirsiz ötüşməyib.
Ancaq sanksiyaların təsiri daha çox 2015-ci ildə özünü göstərdi. Sonrakı dövrlərdə müəyyən sabitləşmə meylləri müşahidə olundu. Məlumat üçün qeyd etməliyik ki, 2 milyona yaxın soydaşımız Rusiya Federasiyasının müxtəlif bölgələrində çalışaraq öz ailəsini dolandırır.
Bu arada yayılan söz-söhbətlərə görə, Rusiyadan azərbaycanlıların geri qayıtması halları artıb. Halbuki, ölkələrimiz arasında münasibətlər çox yüksək səviyyədədir. Bu ilin yanvar-avqust aylarında ticarət dövriyyəsi 1 milyard dollardan bir qədər çox olub. Baxmayaraq ki, 2015-ci ilin eyni dövrü ilə müqayisədə bu göstəricidə 40 faiz azalma müşahidə olunur. Bu da neftin ucuzlaşması səbəbindən dünyada yaranan iqtisadi böhranla bağlıdır. Ancaq buna rəğmən, Rusiya Azərbaycanın ən böyük ticarət tərəfdaşları siyahısında üçüncü yeri tutur. Azərbaycan mallarının ixracının fiziki göstəriciləri 16,3 faiz olub. Xidmətlərin dövriyyəsi isə yarım milyard dollar təşkil edib. Rusiyanın Azərbaycana yatırdığı sərmayə 3 milyard dollardır. Ümumilikdə, ölkədə Rusiya kapitallı 600 şirkət fəaliyyət göstərir. Azərbaycan isə Rusiya iqtisadiyyatına 1 mlrd. dollardan çox birbaşa investisiya yönəldib.
Bütün bunların fonunda, azərbaycanlıların Rusiyadan geri qayıtması barədə səslənən fikirlər nə dərəcədə reallığa uyğundur?
Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, deyilənlərin heç bir əsası yoxdur. O bunu bir sıra arqumentlərlə əsaslandırdı: "Sözügedən məsələ iki il əvvəl aktual idi, indi yox. Bunu da bir sıra faktorlar şərtləndirir. Məsələ ondadır ki, Ukrayna məsələsinə görə Rusiyaya qarşı iqtisadi sanksiyalar tətbiq olundu, neftin qiyməti düşdü, rus rublu dəyər itirməyə başladı. Bütün bunlar ölkə iqtisadiyyatına ciddi mənfi təsir etməyə başladı. Nəticədə orada əmək fəaliyyəti ilə məşğul olan azərbaycanlılar bundan əziyyət çəkməyə başladılar. Azərbaycanlıların orada işləyib pul qazanması çətinləşdi. Bəziləri işini buna görə itirdi və Azərbaycana gəldi. Elələri də oldu ki, digər xarici ölkələrə üz tutdu. Ancaq indiki dövrdə bu kimi söz-söhbətlərin heç bir əsası yoxdur. Ona görə ki, indi Rusiyada çalışan azərbaycanlılar əvvəlkinə baxanda daha yaxşı fəaliyyət göstərir. Eyni zamanda, onlara qarşı münasibət daha yaxşıdır. Bunu iki ölkə münasibətlərindən də görmək mümkündür. Ona görə də səslənən fikirləri real hesab etmirəm".
Vidadi ORDAHALLI
