Üzeyir Cəfərov: "Bununla bağlı konkret qanunvericilik bazası yaradılmalıdır ki, haqqı olanlar veteran adını ala bilsin, eyni zamanda sui-istifadə halları olmasın"
Ermənistanla gedən müharibədə özünümüdafiə dəstələrində döyüşənlərə veteran adının verilməsi proseduru müəyyənləşib. Nazirlər Kabineti "Müharibə veteranı, silahlı qüvvələr veteranı və əmək veteranı adlarının verilməsi qaydası və şərtləri haqqında Əsasnamə"də dəyişikliklər edib.
Dəyişiklik müharibə veteranı adının verilməsi qaydası ilə əlaqədardır. Dəyişiklik döyüş əməliyyatlarında özünümüdafiə dəstələrinin və birləşmələrinin tərkibində iştirak etmiş şəxslərə müharibə veteranı adı və vəsiqəsinin verilmə prosedurunun dəqiq müəyyənləşməsi və bu prosesdə yerli icra hakimiyyəti orqanlarının təsdiq etdikləri siyahıların bundan sonra əsas götürüləcəyi ilə bağlıdır. Bu qərar qüvvəyə mindiyi tarixdən 30 gün müddətində yerli icra hakimiyyəti orqanları Azərbaycan Respublikasının ərazi bütövlüyü uğrunda döyüş əməliyyatlarında iştirak etmiş şəxslərin siyahılarını təsdiq edərək, Səfərbərlik və Hərbi Xidmətə Çağırış üzrə Dövlət Xidmətinə təqdim etməlidir.
Özünümüdafiə dəstələrində döyüşənlərə veteran adının verilməsinə hərbi ekspertlərin münasibəti necədir?
Hərbi ekspert Üzeyir Cəfərov qəzetimizə açıqlamasında bildirdi ki, belə bir yeniliyin edilməsinin tərəfdarıdır: "Bilirsiniz ki, Azərbaycanın nizami ordusu hələ tam formalaşmayanda müharibənin bütün yükünü könüllülər üzərinə götürdü. Təəssüflər olsun ki, 90-cı illərin əvvəlində qanunvericilkdə olan boşluqlar həmin qəbildən olan əksər insanlara haqlarını almağa mane oldu. Sonradan bu istiqamətdə işlər görüldü. Ancaq hesab edirəm ki, yenə də, döyüş yolu keçənlərin sırasında dövlətin veteranlar üçün verdiyi güzəştlərdən yararlana bilməyən şəxslər var. Hazırda müharibə bitməyib. Müharibədə olan, döyüş yolu keçən hər vətəndaşımız qayğı ilə əhatə olunmalıdır ki, milli ruh, döyüş əzmkarlığı daha da yüksək olsun. Hesab edirəm ki, bununla bağlı konkret qanunvericilik bazası yaradılmalıdır ki, haqqı olanlar veteran adını ala bilsin, eyni zamanda sui-istifadə halları olmasın".
Məhəmmədəli QƏRİBLİ
