Xarici işlər naziri Elmar Məmmədyarov ölkəmizdə rəsmi səfərdə olan İtaliya Respublikasının xarici işlər və beynəlxalq əməkdaşlıq naziri Paolo Gentiloni ilə görüşüb
Xarici İşlər Nazirliyinin mətbuat xidmətindən baki-xeber.com-a verilən məlumata görə, görüş zamanı tərəflər Azərbaycan və İtaliya arasında ikitərəfli münasibətlərin səviyyəsi və müxtəlif sahələr üzrə hərtərəfli əməkdaşlıqdan məmnunluq ifadə edilib. Ölkələrimiz arasında siyasi və iqtisadi münasibətlərin yüksək səviyyəsini təqdir edərək, bu əlaqələrin daha da gücləndirilməsi üçün birgə səylərin davam etdirilməsinin vacibliyini qeyd edilib. “Azərbaycan Respublikası ilə İtaliya Respublikası arasında strateji tərəfdaşlıq haqqında Birgə Bəyannamə”nin ikitərəfli siyasi əlaqələrimizin fundamental əsasını təşkil etdiyini vurğulayıblar”.
Nazir Elmar Məmmədyarov İtaliya xarici işlər nazirinin Azərbaycana ilk rəsmi səfərini yüksək qiymətləndirib, ölkələrimiz arasında sabit siyasi, iqtisadi, enerji, neft-kimya, nəqliyyat, turizm, humanitar sahələrdə əməkdaşlığın uğurla inkişaf etdiyini qeyd edib və iqtisadi əməkdaşlıq üzrə Hökumətlərarası Komissiyanın fəaliyyətinin əhəmiyyətinə toxunub.
İtaliyalı nazir Paolo Gentiloni qeyd edib ki, ölkələrimiz arasında möhkəm və etibarlı tərəfdaşlıq mövcuddur, əlaqələrimizin möhkəm siyasi əsası vardır və mükəmməl iqtisadi əməkdaşlığa malikik. O, həmçinin vurğulayıb ki, onun ölkəsi Azərbaycanla Avropa İttifaqı arasında əlaqələrin yeni müstəvidə inkişafını dəstəkləyir.
Nazir Elmar Məmmədyarov Azərbaycan Respublikasının Birinci xanımı Mehriban Əliyevanın rəhbərlik etdiyi Heydər Əliyev Fondunun İtaliyada həyata keçirdiyi layihələrin iki ölkə arasında humanitar sahədə əməkdaşlığa xüsusi töhfələr verdiyini qeyd edib. Tərəflər Avropanın enerji təhlükəsizliyinin təmin edilməsində əhəmiyyətli rol oynayacaq TAP layihəsinin icrası ilə bağlı həyata keçirilən işlər və qarşıda duran məsələlər ətrafında fikir mübadiləsi aparıblar . Nazirlər beynəlxalq təşkilatlar və forumlar çərçivəsində əməkdaşlığın inkişaf etdirilməsi və qarşılıqlı dəstəyin göstərilməsinin əhəmiyyətindən söz açıblar. Görüşdə Azərbaycan-İtaliya parlamentlərarası əlaqələrin inkişafından razılıq ifadə olunub, nümayəndə heyətlərinin qarşılıqlı səfərlərinin iki ölkə arasında siyasi münasibətlərə töhfə verdiyi vurğulanıb. Nazir Elmar Məmmədyarov Azərbaycanın təşəbbüsü və iştirakı ilə həyata keçirilən nəqliyyat layihələri, o cümlədən Bakı-Tbilisi-Qars dəmir yolu barədə məlumat verib, İtaliya şirkətlərinin bu layihənin imkanlarından faydalana biləcəyini deyib.
İtaliyanın ATƏT-in Minsk Qrupunun üzv dövlətlərindən biri olduğunu və Ermənistan-Azərbaycan münaqişəsinin həlli istiqamətində son vəziyyətlə bağlı həmkarına məlumat verən Elmar Məmmədyarov münaqişənin yalnız beynəlxalq hüququn norma və prinsiplərinə uyğun olaraq BMT Təhlükəsizlik Şurasının qətnamələri əsasında Azərbaycanın ərazi bütövlüyü, suverenliyi və beynəlxalq səviyyədə tanınmış sərhədləri çərçivəsində həll olunmalı olduğunu vurğulayıb. Nazir həmçinin ATƏT-in Minsk Qrupunun həmsədr ölkələrinin dövlət başçıları səviyyəsində mövcud status-kvonun qəbuledilməz və qeyri davamlı olması faktını qəbul etdiklərini bildirib və güc tətbiqi yolu ilə dövlətlərin beynəlxalq səviyyədə tanınmış sərhədlərinin pozulmasının qəbuledilməz olduğunu vurğulayıb. O, Vyana və Sankt-Peterburq görüşlərindən sonra Ermənistanın müxtəlif təxribatlara əl ataraq münaqişənin həlli üzrə aparılan danışıqları və müzakirə olunan məsələləri pozmağa çalışdığını bildirib.
Görüşdə həmçinin, İtaliya şirkətlərinin Azərbaycanda, xüsusən enerji sektorunda uğurlu fəaliyyəti qeyd edilərək, bu uğurlu əməkdaşlığın qeyri-neft sektoru, xüsusilə kənd təsərrüfatı, tekstil-trikotaj, dəri emalı, tikinti materialları istehsalı, turizm, mədəniyyət və elmi-texniki əməkdaşlıq sahəsində də davam etdirilməsi üçün zəruri addımların atılmasının vacibliyi bildirilib.
“Ermənistan Dağlıq Qarabağ münaqişənin həllini ləngidir”
“Təəssüf ki, Dağlıq Qarabağ münaqişənin həllində ləngimə var”. APA-nın məlumatına görə, bu sözləri Azərbaycan xarici işlər naziri Elmar Məmmədyarov italiyalı həmkarı ilə keçirdiyi mətbuat konfransında deyib.
O bildirib ki, Sankt- Peterburq görüşündən sonra irəliləyişə ümid var idi: “Bizdə ümid yaranmışdı ki, düz istiqamətdə işləyirik və nəticə ola bilər. Təəssüf ki, Ermənistan tərəfi irəliləyişə hazır deyil. Özləri də deyirlər ki, status-kvonu dəyişməyə hazır deyillər. Hazırda Hamburqda görüş planlaşdırılır. Həmsədrlərin belə bir təklifi var. Azərbaycan tərəfi Hamburqda görüşə razılıq verib. İstəyərdim ümidverici söz deyim, amma görünür Ermənistan tərəfi məsələni ləngidir"
"TAP layihəsi vaxtında fəaliyyətə başlayacaq"
Nazir deyib ki, TAP üzrə işlər gündən günə artır və inanırıq ki vaxtında öz fəaliyyətinə başlayacaq: “TAP layihəsi müsbət inkişaf edir. Layihənin icrasında müəyyən ləngimələr olmuşdu. Lakin hazırda bütün ölkələrdən artıq cavab almışıq ki, əsas məsələlər həll olunub. Planlaşdırırıq ki, 2018-ci ilin sonu 2019-cu ilin əvvəlində layihəni icra edək".
O, italiyalı həmkarı ilə energetika sahəsinə müzakirələr apardığını deyib: “İtaliya gələn ildən ATƏT üçlüyündə təmsil olunacaq. Hökumətlərarası komissiyanın növbəti iclası barədə də danışdıq. Həmçinin Heydər Əliyev Fondu İtaliyada geniş layihələr həyata keçirir. Bu da çox önəmlidir. İnanırıq ki, bu ay Brüsseldə Avropa İttifaqı strateji tərəfdaşlığa dair mandatı təsdiqləyəcək və biz danışıqlara başlayacağıq. Bu barədə müzakirə aparmışıq. Beynəlxalq təşkilatlarda iki ölkə daim əlaqədədir. İnanırıq ki, bunu davam etdirəcəyik".
“İtaliya Dağlıq Qarabağ məsələsində vasitəçilərin rolunu sürətləndirməyə çalışacaq”
"Biz ATƏT-də sədrliyimiz dövründə və BMT TŞ-də qeyri daimi üzv olarkən dondurulmuş münaqişələr adlandırdığımız məsələlərlə məşğul olacağıq”. Bu sözləri isə mətbuat konfransında İtaliyanın xarici işlər naziri Paolo Gentiloni deyib.
O bildirib ki, İtaliya xüsusilə Dağlıq Qarabağ məsələsində vasitəçilərin rolunu sürətləndirməyə çalışacaq: "Həmçinin digər prioritet sahələr də mövcuddur. ATƏT-də digər ölkələrlə miqrasiya məsələsinə toxunacağıq. Bu gündəmdə olan məsələdir".
“TAP və TANAP kimi layihələr münasibətlərimizi daha da möhkəmləndirəcək”
Nazir deyib ki, İtaliya və Azərbaycan arasında güclü və möhkəm əlaqələr var. O bildirib ki, Azərbaycan İtaliya üçün enerji təminatı baxımından ön yerlərdən birindədir: “TAP və TANAP kimi layihələrin icrası üçün üzərimizə öhdəlik götürmüşük. Layihə yalnız Azərbaycandan qaz gətirməyəcək, həm də bir neçə ölkə arasında əlaqə yaradacaq. Bu Avropada ən əhəmiyyətli layihə kimi qiymətləndirilir. Bu layihələr münasibətlərimizi daha da möhkəmləndirəcək. Azərbaycan iqtisadiyyatının şaxələndiriıməsi ilə bağlı ciddi layihələr var. İnanıram ki, İtaliya texnologiyaları bu sahədə ciddi təcrübə ola bilər”.
