Azər Həsrət: "Azərbaycanın media məkanındakı vəziyyətə yaxından bələd olan adam kimi hesab edirəm ki, belə qərəzli hesabatla razılaşmamağa tam haqqımız var"
"Sərhədsiz reportyorlar" hüquq müdafiə təşkilatı noyabrın 2-də 2016-cı il üçün mətbuatla bağlı hesabatını dərc edib. Hesabatda qeyd edilir ki, ötən il ən çox Türkiyədə vəziyyət pisləşib, 130 jurnalist həbsdədir, 140-dan çox KİV bağlanıb. Hakimiyyət, demək olar ki, ölkənin bütün mətbuat məkanına nəzarət edir.
Hesabatda Azərbaycanla bağlı bildirilir ki, hazırda 8 jurnalist və bloger həbsdədir, onlarla KİV nümayəndəsi isə təqiblərdən xaricdə gizlənmək məcburiyyətindədir.
2015-ci il ilə müqayisədə Azərbaycan dünyada mətbuat azadlığı reytinqində 162-ci yerdən 163-cü yerə düşüb.
Ümumilikdə siyahıda 180 ölkə var. Ən azad mətbuat Finlandiya və Niderlandda, ən qeyri-azad mətbuat isə Eritreya və Şimali Koreyadadır.
Azərbaycan Mətbuat Şurasının sədri Əflatun Amaşov beynəlxalq jurnalist təşkilatının hesabatı ilə razılaşmır. O bildirir ki, Azərbaycanı Şimali Koreya ilə müqayisə etmək düzgün deyil: "Həmin ölkədə insanların adi internetə çıxışı yoxdur. Bir ölkədə ki, Ədliyyə Nazirliyinə müraciət etməklə, nazirliyin cavabını gözləmədən 7 gün ərzində qəzet açmaq olar, hər gün bir xəbər portalı açılır, insanlar sosial şəbəkələrdə fikrini sərbəst ifadə edir, onu reytinq cədvəlində 163-cü yerə qoymaq doğru deyil. Söz azadlığı üçün bu cür imkanlar olan ölkəni 163-cü yerə qoyasan, onun prezidentini mətbuatın düşməni elan edəsən, bu, olsa-olsa, qərəzdir. "Sərhədsiz reportyorlar"ın siyahısında nədənsə Azərbaycan həmişə arxa sıralarda olur. Bir şeyi anlamıram, bəzən elə dövlətlər reytinq cədvəlində Azərbaycandan öndə olur ki, orada söz və mətbuat azadlığından söhbət gedə bilməz. Bu, Latın Amerikası, Afrika, Asiya ölkələridir. Azərbaycan bu ölkələrdən də aşağıda olur. İndi də baxıram ki, burada eyni vəziyyətdir. Əlbəttə, Azərbaycanda söz və mətbuat azadlığı ilə bağlı bəzi nüansları müzakirə etmək olar, elə o hesabatda göstərilən məsələləri də. Ancaq 25 ildir müstəqillik qazanan Azərbaycanda hər kəsin fikrini ifadə edə biləcəyi hər cür mətbuat orqanı var. Ölkənin harasındasa bir hadisə baş verəndə, o elə yerli ictimaiyyətə də, dünya ictimaiyyətinə də asanlıqla çatdırıla bilər. Əhalinin 80 faizə yaxınının internetə çıxışı var, milyon yarımdan çox insan sosial şəbəkələrdə fikrini bölüşür və paylaşır".
Media məsələləri üzrə ekspert Azər Həsrət qəzetimizə açıqlamasında bildirdi ki, sözügedən təşkilat daim qərəzli mövqeyi ilə seçilir: "Xüsusilə də Azərbaycanla bağlı obyektivlikdən uzaq mövqe sərgiləyir. Məqsədləri bəllidir. Bizi gözdən salmağa çalışırlar. Məsələyə elə onların məntiqi ilə yanaşsaq, biz reytinqdə bir qədər irəliləməli idik. Çünki onların azadlığa çıxmasını təkidlə tələb etdikləri bir neçə jurnalist hazırda azadlıqdadır, başda Xədicə İsmayıl olmaqla. Ancaq görürsünüz ki, həmin təşkilat bizi daha da aşağı qiymətə layiq bilib. Azərbaycanın media məkanındakı vəziyyətə yaxından bələd olan adam kimi hesab edirəm ki, belə qərəzli hesabatla razılaşmamağa tam haqqımız var".
Məhəmmədəli QƏRİBLİ
