Mehman Muradlı: "Belə əlavə təzyiqlərlə məhkəməyə təsir etmək mümkün deyil"
Ləğv edilmiş Milli Təhlükəsizlik Nazirliyinin (MTN) həbsdə olan sabiq generalı Akif Çovdarovun hazırda məhkəməsi gedir. Maraqlıdır ki, sabiq general öz açıqlamaları ilə daha çox medianın diqqətini cəlb etməyə çalışır.
Bəzən ölüm aclığı etdiyini deyir, bəzən isə ağlına gələn absurd fikirləri dövriyyəyə buraxır. Bir neçə gündür ki, onun vəkili Kamandar Nəsibov vasitəsilə Antiterror Mərkəzinin rəis müavini İlqar Əliyevin ölümü ilə bağlı verdiyi açıqlama gündəmin əsas mövzusuna çevrilib.
A.Çovdarovun vəkili K.Nəsibov keçirdiyi mətbuat konfransında generala istinadən deyib ki, İ.Əliyev intihar etməyib, öldürülüb: "A.Çovdarov dünən bizimlə görüşdü. Getdik rəisin yanına. A.Çovdarov rəisə dedi ki, İ.Əliyevi döyüb, sonra asıb öldürmüsünüz...".
A.Çovdarovun bu açıqlamasını hakimiyyətə yönəlik şantaj cəhdi kimi qiymətləndirmək olar. Bu cür metoda əl atmaqla Çovdarov nəyə nail olmaq istəyir?
Xatırladaq ki, az öncə onun təcridxanada xəstələndiyi və müalicə müəssisəsinə köçürülmək istədiyi barədə xəbərlər yayılsa da, sonradan onun müayinə ilə tam sağlam olduğu təsdiqlənmişdi.
Hüquqşünas Mehman Muradlı qəzetimizə açıqlamasında bildirdi ki, A.Çovdarov açıqlaması ilə diqqəti məsələnin əsl mahiyyətindən yayındırmaq istəyir: "A.Çovdarova qarşı konkret maddələrlə cinayət işi qaldırılıb. Hazırda iş məhkəmə baxışındadır. Mediadakı məlumatlardan da görünür ki, ona açılan cinayət işində kifayət qədər epizodlar var. Hətta həmin adamlar başlarına gətirilən oyunlarla bağlı geniş açıqlamalar da verib. Bəlli olur ki, A.Çovdarov bir çox qanunsuzluqlara imza atıb. Onun İ.Əliyevin ölümü ilə bağlı səsləndirdiyi versiya tamamilə absurddur. Bununla A.Çovdarov hakimiyyətə mesaj verir ki, guya onun türmənin içində də çox detaldan xəbər tutmaq imkanı var. İstintaq Təcridxanası belədir ki, bir-birilə əlaqəli olan adamlar ayrı-ayrı kameralarda, hətta korpuslarda saxlanır. Belə olan təqdirdə, A.Çovdarov İ.Əliyevin döyülərək asıldığını necə görə bilər? Görmədiyi detal barədə danışırsa, demək ki, fərziyələrə əsaslanır. Ancaq fərziyələrə əsaslanaraq dövləti şantaj etmək yaxşı əlamət deyil. Məqsəd bəllidir, diqqəti yayındırmaq və özünə balaca da olsa güzəşt əldə etmək. Düşünürəm ki, məhkəmə işə mahiyyəti üzrə baxır. Belə əlavə təzyiqlərlə məhkəməyə təsir etmək mümkün deyil".
Məhəmmədəli QƏRİBLİ
