İlqar Hüseynli: "Belə bir çətin, qarışıq dövrdə Azərbaycanda bir sıra forumların keçirilməsi ölkənin imici baxımından müsbət göstəricidir"
Bakıda Azərbaycan-Rusiya Regionlararası Forumu keçiriləcək. Sayca yeddinci olan forum noyabrın 1-nə təyin edilib. Bununla bağlı yayılan məlumatda o da bildirilir ki, forumda Azərbaycan və Rusiyanın dövlət rəsmiləri, parlament nümayəndələri iştirak edəcək.
Foruma habelə hər iki ölkənin sənaye, turizm, kənd təsərrüfatı, tikinti, ticarət, konsaltinq, logistika, əczaçılıq və maliyyə sahəsində çalışan sahibkarlar qatılacaq.
Tədbir çərçivəsində forumun plenar iclası, sənaye, turizm, aqrar və humanitar sahələr üzrə "dəyirmi masa"lar keçiriləcək və Azərbaycan-Rusiya biznes forumu təşkil ediləcək.
Forumda bir sıra sənədlərin imzalanması nəzərdə tutulur.
O da məlumdur ki, Azərbaycan tez-tez bənzər forumlara ev sahibliyi edir. Müşahidələr də göstərir ki, sözügedən tədbirlər çox yüksək səviyyədə keçirilir. Bir sıra dövlətlərin tanınmış siyasi xadimləri, işgüzar dairələri bu tədbirlərdə iştirak edir. Bu kimi forumların Azərbaycan üçün nə kimi əhəmiyyəti var? Sözügedən məsələni dəyərləndirən ekspert İlqar Hüseynli buna bir neçə prizmadan yanaşır: "Müasir dövrdə dünya ölkələrini birləşdirməyə nail olan Azərbaycan regionun və bütövlükdə dünyanın böyük dövlətlərlə mehriban, səmimi, dostluq münasibətlərini inkişaf etdirməkdədir. Azərbaycanın əməkdaşlıq etdiyi ölkələr və beynəlxalq təşkilatlarla yüksək etimad və siyasi dialoq fonunda əməkdaşlığın gücləndirilməsi dövlətlərarası əlaqələrin inkişafına möhkəm zəmin yaradır. Hazırda dünyada çox mürəkkəb siyasi-iqtisadi proseslər gedir. Yaxın Şərqdə baş verənlərin nə ilə nəticələnəcəyi aydın deyil. Belə bir çətin, qarışıq dövrdə Azərbaycanda bir sıra forumların keçirilməsi əlbəttə ki, ölkənin imici baxımından müsbət göstəricidir. Sivilizasiyaların kəsişdiyi məkanda yerləşən, mədəniyyətlərarası dialoqa töhfələrini əsirgəməyən Azərbaycanda qlobal forumların keçirilməsi əlbəttə ki, yaxşı haldır. Dünyada humanitar dialoq, elm, mədəniyyət və incəsənətin inkişafı ilə bağlı məsələlərin müzakirəsi üçün belə məkanlar olduqca azdır. Bənzər forumlar digər dövlətlərdə də keçirilir, amma Bakıda təqdim edilən layihələr, irəli sürülən təşəbbüslər, həyata keçirilən tədbirlər özünəməxsusluğu ilə fərqlənir. Bu baxımdan hesab edirəm ki, bunun ölkəmiz üçün müəyyən əhəmiyyəti var". Vidadi ORDAHALLI
