Məhərrəm Zülfüqarlı: "Hesab edirəm ki, növbəti şansın Belarusa verilməsi müsbət göstəricidir"
Məlum olduğu kimi, 2019-cu ildə keçiriləcək II Avropa Oyunlarına Belarusun paytaxtı Minsk ev sahibliyi edəcək. Avropa Olimpiya komitələrinin Belarusun paytaxtı Minskdə keçirilən 45-ci Baş Assambleyasında 50 ölkənin Milli Olimpiya Komitəsi təmsil olunub. Həmin iclasda Minskin növbəti Oyunlara ev sahibliyi etməsinə dair qərar verilib.
Belarus prezidenti Aleksandr Lukaşenko Avropa Olimpiya Komitəsinin prezidenti vəzifəsini icra edən Janez Kosijancic ilə görüşdə deyib: "Biz sizinlə tarixi qərar qəbul etdik və 2019-cu ildə bu Oyunlarda Avropa idmançılarını bir yerə yığacağıq".
O həmçinin deyib ki, Belarusda neçə idman növü üzrə yarışların keçiriləcəyi ilə bağlı qərar qəbul etmək üçün tələsmək lazım deyil: "Mən burada mümkün qədər çox idmançının iştirak etməsinin tərəfdarıyam. Bu onların bayramıdır. Oyunların təşkilində Azərbaycanın təcrübəsindən istifadə etmək bizim üçün çox vacibdir. Dostum, Azərbaycan Prezidenti İlham Əliyev elə bir yüksək səviyyə müəyyən edib ki, Azərbaycanı ötüb keçmək heç kəsə müyəssər olmayacaq".
Bu arada gənclər və idman naziri Azad Rəhimov TASS-a açıqlamasında bildirib ki, bu məsələdə yardım etməyə hazırdırlar: "Azərbaycan topladığı təcrübəsini və sənədləşmə işlərini II Avropa Oyunlarının keçirilməsi üçün Belarusla bölüşməyə hazırdır. Bu bizim üçün böyük şərəf olardı. Nəyimiz varsa, Belarusa verməyə hazırıq".
Qeyd edək ki, İlk Avropa Oyunları 2015-ci ilin 12-28 iyununda Bakıda çox möhtəşəm keçirilib. Onu da qeyd edək ki, Birinci Avropa Oyunları Azərbaycanda keçiriləndə bəziləri buna dodaq büzür və bunun özünü doğrultmayacağını bəyan edirdilər. Yəni digər ölkələrin növbəti oyunların keçirilməsinə maraq göstərməyəcəyini bildirirdilər. Ancaq baş verənlər bunun tam əksini göstərir.
Sözügedən məsələni dəyərləndirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının fikrincə, Avropa Oyunlarına pessimist yanaşanların proqnozlarının özünü doğrultmayacağı gözlənilən idi: "Ona görə gözlənilən idi ki, bu cür yanaşmanın heç bir ciddi əsası yox idi. Əsası olmadığına görə də səslənən o cür fikirlər fiaskoya uğradı. Oyunlar başlamazdan əvvəl iddia edirdilər ki, yarışma yaxşı keçməyəcək. Ancaq yarışmanın möhtəşəm səviyyədə keçirilməsi bütün bu deyilənləri alt-üst etdi. Yarışmaya görünməmiş beynəlxalq diqqətin, marağın olduğunu müşahidə etdik. Zaman-zaman Azərbaycanda mötəbər tədbirlər, yarışmalar keçiriləndə bənzər mülahizələr səslənib. Bənzər açıqlamalar beynəlxalq mahnı yarışması ərəfəsində də səslənmişdi. Ancaq çox keçmədən bunların heç biri özünü doğrultmayıb. Hesab edirəm ki, növbəti şansın Belarusa verilməsi müsbət göstəricidir. Azərbaycan Belarusla bu yöndə təcrübəsini paylaşa bilər".
Vidadi ORDAHALLI
