Vasif Mirzəyev: "Akif Çovdarovun qanunsuz əməllərindən mənəvi baxımdan zərər görən iş adamları çoxdur"
Məlum olduğu kimi, ləğv olunmuş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin həbsdə olan sabiq rəisi Akif Çovdarovun sentyabrın 20-dən məhkəməsi gedir.
A.Çovdarov vəzifə səlahiyyətlərindən sui-istifadə, seçkinin (referendumun) nəticələrinə təsir məqsədilə cinayət törətmə və rüşvət almada ittiham olunur. O özü ötən il noyabrın 15-də həbs edilib. A.Çovdarova qarşı Cinayət Məcəlləsinin 308.2 (vəzifə səlahiyyətlərindən sui-istifadə), 311.3.1 (rüşvət alma ) və daha bir neçə ağır maddələr ilə ittiham irəli sürülüb.
Sözügedən rəsmi ittihamlar öz yerində. Qanuna müvafiq olaraq məhkəmə gedir və gərəkən cəzanı alacaq.
Bütün bunlarla yanaşı, məsələnin mənəvi tərəfi də var. Məsələ ondadır ki, A.Çovdarovun törətdiyi qanunsuz əməllər nəticəsində çoxlu sayda zərərçəkmiş mənəvi zərərə məruz qalıb. Belə ki, vətəndaşlara dəymiş mənəvi zərbələrin sağalması illərlə vaxt tələb edir. Zərərçəkmişlərin verdikləri ifadələrdən belə məlum olur ki, onlar bununla bağlı çox ciddi travmalara məruz qalıb. Eləsi olub ondan tələb olunan pulu vermədiyi və ya verə bilmədiyi üçün müxtəlif formada alçaldılıb. Məsələn, soyundurulub, şəkli çəkilib və ifadə edilməsi utancverici olan müxtəlif nalayiq psixoloji təzyiqlərə məruz qalıb. Bu baxımdan sözügedən mənəvi cinayətlərin məsuliyyətini hüquqşünaslar necə dəyərləndirir? Məsələyə münasibət bildirən hüquqşünas Vasif Mirzəyevin sözlərinə görə, zərərçəkmişlərə dəymiş mənəvi zərərə görə təzminat davası açmaq olar: "Məhkəmə prosesindən məlum olur ki, bir sıra iş adamları həm də mənəvi təzyiqə məruz qalıb. Psixoloji baxımdan müxtəlif formada basqıya, təzyiqə məruz qalıblar. Şübhəsiz ki, məhkəmə prosesi zamanı bu kimi məqamlar da nəzərə alınacaq. Ancaq onu da nəzərə almaq lazımdır ki, müşahidələrə əsasən, Akif Çovdarovun qanunsuz əməllərindən mənəvi baxımdan zərər görən iş adamları çoxdur. Sadəcə, bir çoxları utandığından və ictimai nüfuzuna ziyan dəyəcəyi üçün bunu deməkdən çəkinir. Çünki vəzifə səlahiyyətlərindən sui-istifadə edərək insanlara qarşı bu cür davranışlara yol vermək və bir sıra hallarda buna birbaşa rəvac vermək məsuliyyət yaradır. Hesab edirəm ki, bu işdə bir çoxlarının məruz qaldığı mənəvi təzyiq ayrıca araşdırılmalıdır".
Vidadi ORDAHALLI
