Yadigar Məmmədli: "Hesab edirəm ki, sözügedən "dəyirmi masa" ümumən işin xeyrinədir"
Xəbər verildiyi kimi, Azərbaycan Respublikasının Müdafiə Nazirliyinin Təlim və Tədris Mərkəzində "Silahlı Qüvvələr və media: informasiya qarşıdurması şəraitində əlaqəli əməkdaşlıq fəaliyyəti" mövzusunda "dəyirmi masa" keçirilib.
Müdafiə Nazirliyi ilə Azərbaycan Mətbuat Şurasının birgə təşəbbüsü ilə keçirilmiş toplantıda mövzu ilə bağlı bir sıra məsələlər müzakirə olunub. Müdafiə nazirinin müavini, general-leytenant Kərim Vəliyev bildirib ki, media ilə silahlı qüvvələrin daimi təmasda olması müharibə şəraitində yaşayan ölkə üçün son dərəcə önəmlidir: "Bu həm də onunla əsaslandırılır ki, hazırda müharibənin informasiya cəbhəsi daha çox aktual əhəmiyyət daşıyır. İnformasiya texnologiyalarının geniş vüsət aldığı dövrdə qarşı duran tərəflər fəaliyyətlərini əsasən medianın gücündən yararlanaraq qururlar".
Mətbuat Şurasının sədri, Milli Məclisin deputatı Əflatun Amaşov isə ordu-media əməkdaşlığının davamlılığına ehtiyacın duyulduğunu əsaslandırarkən bir neçə məqam barədə söz açıb.
2014-cü ilin avqustunda cəbhə xəttində gərginlik yaranan zaman medianın məsələyə lazımi peşəkarlıqla yanaşmadığını deyən Ə.Amaşov qeyd edib ki, bu da, öz növbəsində, problemlərə yol açıb: "Ancaq 2016-cı ilin aprel müharibəsi dönəmində medianın fəaliyyət tərzi baxımından kifayət qədər peşəkar mənzərə var idi. Belə bir müsbət durumun yaranması isə qarşılıqlı əməkdaşlığın, aparılan məqsədyönlü işlərin nəticəsi idi".
Ə.Amaşov çıxışında medianın cəbhə xəbərlərini işıqlandırması məsələlərinin daim diqqətdə saxlanmasına ehtiyacın duyulduğunu qeyd edərək "dəyirmi masa"nın bu baxımdan da müstəsna əhəmiyyət daşıyacağına əminliyini bildirib.
Prezident Administrasiyasının ictimai-siyasi məsələlər şöbəsinin müdir müavini Ərəstun Mehdiyev bildirib ki, Milli Ordu quruculuğunun dərinləşməsi istiqamətində görülən işlərin, cəbhə xəttində yaşananların təqdimatı ilk növbədə peşəkarlığa söykənən fəaliyyət olmalıdır. Peşəkarlıq isə vətənpərvərliyə əsaslanmalıdır.
Digər iştirakçılar da bununla bağlı fikirlərini səsləndirib.
Məsələyə münasibət bildirən Demokratik Jurnalistlər Liqasının rəhbəri Yadigar Məmmədlinin sözlərinə görə, bu kimi tədbirlərin keçirilməsi faydalıdır: "Məlum aprel döyüşlərindən sonra baş verən lokal müharibədən sonra bu məsələ aktuallaşdı. Bu kimi hadisələr zamanı jurnalistlər son dərəcə diqqətli olmalı və düzgün məlumat verməlidir. Xüsusən də belə situasiyalarda jurnalistlərin əsas mənbəyə istinad etməsi vacibdir. Azərbaycan müharibə şəraitində olduğu üçün, verilən informasiya dəqiq olmalıdır. Ən yaxşısı o olardı ki, mənbə olaraq Müdafiə Nazirliyinə istinad olunsun. Keçirilən tədbir də bu kimi missiyaya xidmət edir. Həmçinin nəzərə almaq lazımdır ki, bu sahədə ixtisaslaşmış jurnalistlər, işi bilənlər formalaşır. Bu da bizim ümumi işimizin xeyrinədir. Hesab edirəm ki, sözügedən "dəyirmi masa" ümumən işin xeyrinədir. Bundan sonra da analoji tədbirlərin keçirilməsi işin xeyrinə olacaq". Vidadi ORDAHALLI
