Azərbaycanın dövlət müstəqilliyinin bərpasının XXV ildönümü münasibətilə Azərbaycan Respublikasının Türkmənistandakı Səfirliyi tədbir keçirib. Tədbirdə Türkmənistanda yaşayan soydaşlarımız, ictimaiyyət nümayəndələri, ziyalılar və Səfirliyin əməkdaşları iştirak edib.
Tədbiri giriş sözü ilə açan fövqəladə və səlahiyyətli səfir Həsən Zeynalov 1991-ci il 18 oktyabr tarixində Azərbaycanın öz müstəqilliyinə yenidən qovuşduğunu və müstəqil Azərbaycan Respublikasının 1918-1920-ci illərdə mövcud olmuş Azərbaycan Xalq Cumhuriyyətinin varisi olduğunu bildirib. Müstəqilliyin ilk illərində xalqımızın çətin sınaqlarla qarşılaşdığını, həmin dövrdə ölkədə xaosun hökm sürdüyünü və Azərbaycanın bir dövlət kimi məhv olmaq təhlükəsi ilə üz-üzə qaldığını söyləyib.
Qeyd olunub ki, yalnız ümummilli lider Heydər Əliyevin xalqın təkidli tələbi ilə hakimiyyətə qayıdışından sonra onun müdrik rəhbərliyi altında bu çətinliklərin öhdəsindən məharətlə gəlinib və müasir Azərbaycan dövlətinin əsası qoyulub. H.Əliyevin müstəqil Azərbaycanın Prezidenti olduğu illərdə ölkəmizin bütün sahələrdə qüdrətinin artması yönündə yorulmadan çalışdığı, məhz onun xidmətləri sayəsində Azərbaycanda ictimai-siyasi sabitliyin bərpa olunduğu və ölkənin iqtisadi inkişaf dövrünə qədəm qoyduğu tədbir iştirakçılarının diqqətinə çatdırılıb.
Əsası ümummilli lider tərəfindən qoyulmuş siyasi və iqtisadi kursun hazırda Prezident İlham Əliyev tərəfindən layiqincə davam etdirildiyi vurğulanaraq, son illərdə Azərbaycan Respublikasının dünya miqyasında artıq özünü təsdiqləmiş, güclü iqtisadiyyata və qüdrətli orduya malik bir dövlətə çevrildiyi vurğulanıb. Fövqəladə və səlahiyyətli səfir qeyd edib ki, ölkəmizin regional enerji və nəqliyyat layihələrinin həyata keçirilməsində oynadığı vacib rol, əldə olunmuş iqtisadi və sosial nailiyyətlərin aparıcı beynəlxalq təşkilatlar tərəfindən tanınması, ölkəmizdə idman, mədəniyyət, humanitar, eləcə də digər sahələrdə keçirilən və artıq ənənə halını almış beynəlxalq əhəmiyyətli tədbirlər Azərbaycanın dünyada artan nüfuzundan xəbər verir. Prezident İ.Əliyevin düşünülmüş xarici və daxili siyasəti sayəsində Azərbaycandakı hərtərəfli inkişafın gələcəkdə də davam edəcəyinə inam ifadə edilib.
Azərbaycan Respublikasının dövlət müstəqilliyinin bərpasının XXV ildönümü münasibətilə tədbirlər silsiləsi Səfirlik tərəfindən davam etdirilir.
Xəbər xidməti
