Səudiyyə şahzadəsi Salman bin Əbdül Əziz əl-Səidin Moskva səfəri Kreml sarayında maraqlı dəyişikliklərlə yadda qalıb.
Baki-xeber.com-un xəbərinə görə, bu barədə “kommersant.ru” saytı xəbər verib. Xəbərdə deyilir ki, Kreml tarixində ilk dəfə olaraq sarayın dəhlizlərində şahzadənin rahatlığı üçün onun yığcam elektromobillə hərəkətinə şərait yaradılıb. Beləliklə, tədbir anları və telekameraların işə düşmədiyi vaxtlarda Səudiyyə şahzadəsi məhz bu nəqliyyat vasitəsində və sürücüsü ilə hərəkət edib. Pilləkənlərə isə onun rahat qalxa bilməsi üçün əlavə vasitələr quraşdırılıb. Maraqlıdır ki, qaydalara görə, ətrafı ona bu anlarda yardım edə bilməz, o üzdən də bu vasitələrin quraşdırılması vacib sayılıb. Şahzadə pilləkənləri qalxdıqdan sonra isə elektromobil onu liftə kimi aparıb.
Medianın xəbərinə görə, Kremlin dəhlizlərində bu günə kimi hər hansı nəqliyyat vasitəsi hərəkət etmədiyindən, baş verənlər ölkə başçıları arasında gedən danışıqları arxa plana atıb.
Qeyd edək ki, Səudiyyə kralı 100 nəfərlik heyətlə Moskvaya 3 günlük səfərə gəlib və tərəflər arasında bir çox sahələr üzrə razılaşmalar nəzərdə tutulur. Əsas mövzuların isə enerji, Orta Şərq və Suriya savaşı, eləcə də İranla bağlı olacağı xəbər verilir.
