İraq hökuməti Kürdüstan Muxtariyyətinin rəhbərliyinə qarşı təzyiqləri daha da sərtləşdirir. Baki-xeber.com xəbər verir ki, rəsmi Bağdad bu dəfə, bütün dünyanın çağırışlarını qulaqardına vuraraq separatçı referendum keçirən Məsud Bərzani rəhbərliyinin beynəlxalq aləmə çıxışlarını məhdudlaşdırmağı hədəfləyib.
Belə ki, İraq hökuməti bölgə sərhədlərinə nəzarətin 3 gün ərzində Bağdada verilməsini tələb edib. İraq baş naziri Heydər əl-İbadi, əks halda İraq Kürd Regional Muxtariyyətinin ikitərəfli bütün beynəlxalq aviareyslərinə qadağa qoyulacağını bəyan edib. "Hava limanlarına nəzarəti 3 gün içində təhvil verin" — deyə əl-İbadi bildirib.
Baş nazir bütün quru və hava sərhədlərinə nəzarətin mərkəzi hakimiyyətin nəzarətinə verilməsi barədə qərar qəbul etdiklərini deyib.
"İraq Kürd Regional Muxtariyyətinin rəsmiləri yerli, regional və beynəlxalq dairələrin referendumun qanunsuz olması barədə çağırışlarını dinləmədi. Bölgədəki sərhəd-keçid məntəqələri İraq Sərhəd Nəzarəti İdarəsinin tabeliyinə keçməlidir. Sərhədə nəzarət 3 gün ərzində Bağdada verilməsə, bölgəyə bütün beynəlxalq uçuşları dayandıracağıq. Bu barədə qərar Nazirlər Kabinetində qəbul edilib. Muxtariyyətin sərvəti nəzarətdən kənar idarə edilir, onun gəlirləri isə xaricdəki şəxsi hesablara gedir" – deyə baş nazir bildirib.
Bundan əvvəl İraqın Nazirlər Kabineti xarici ölkələrdən muxtar bölgə ilə neft sahəsində əməkdaşlığa son qoymağı tələb edib.
Xatırladaq ki, sentyabrın 25-də İraqın şimalındakı kürd muxtariyyətində müstəqillik referendumu keçirilib. İraq hökuməti referendumu qeyri-legitim elan edib. Referenduma qarşı həmçinin Türkiyə, İran, ABŞ və BMT çıxış edib.
