Şimali Koreyanın XİN başçısı Li En Xo deyib ki, KXDR səmasından kənarda da ABŞ təyyarəsi görsələr vurmaq səlahiyyətləri var:”Çünki Tramp artıq bizə müharibə elan edib”.
Baki-xeber.com bu barədə RİA”Novosti”yə istinadən xəbər verir. Xəbərə görə, Pentaqonun rəsmisi Robert Menninq isə deyilənləri təkzib edib və Pxenyanı provokasiyadan əl çəkməyə çağırıb. “Pxenyan provokativ hərəkətlərindən əl çəkməzsə, biz ona necə cavab veriləcəyini bilirik”- deyə Menninq brifinqdə jurnalistlərə bildirib.
Əslində isə, təbii ki, ABŞ Şimali Koreyaya müharibə elan etməyib. Lakin BMT Baş Assambleyasında çıxışı zamanı Tramp onun ünvanına bir neçə diplomatik leksikondan uzaq ifadə işlədib. O deyib ki, “raket adam” (Kim Çen In) özü və rejimi üçün suisid hazırlayıb və ABŞ bu missiyanı yerinə yetirməyə hazırdır, lakin ümid edirlər ki, buna qədər gedilməyəcək. KXDR lideri isə Trampın çıxışını “axmaq sərsəmləmə” adlandırıb və ABŞ-ı cavabla hədələyib.
Maraqlıdır ki, sözügedən sessiyada ABŞ-ın BMT-dəki daimi nümayəndəsi Nikki Heyli Trampın çıxışından öncə bildirib ki, KXDR məsələsində Vaşinqton artıq bütün diplomatik vasitələri istifadə edib. “Bundan sonra mən bu məsələnin həllini general Mettisə həvalə edərdim, çünki onun əlində çözüm üçün bir sıra hərbi variantlar var”- Heyli deyib.
Dövlət Departamentindən Pxenyanla müharibənin gündəmdə olmadığı bildirilib.
