Oktyabrın 1-i yaxınlaşdıqca İspaniyada, hakimiyyətin etirazlarına baxmayaraq, müstəqillik referendumuna hazırlaşan Kataloniya muxtar vilayətilə bağlı gərginlik yüksəlir.
Baki-xeber.com xəbər verir ki, İspaniya polisi və jandarma dünən rəsmi Madridin qanunsuz elan etdiyi müstəqilliyə dair mübahisəli referendum öncəsi Kataloniya hökumətinin binasında axtarış aparıb.
Kataloniya hökumətinin sözçüsü bildirib ki, ispan jandarması Barselonadakı Kataloniya muxtar vilayətinin bir sıra nazirliklərində də - İqtisadiyyat, Xarici İşlər, Əmək və Sosial İşlər və İdarə nazirliklərində axtarışlar aparıb. Polisin nazirlik və departament binalarında referendumla əlaqədar aparılan istintaq çərçivəsində dəlil topladığı bildirilir.
Katalonya vilayətinin başçısı Karles Puigdemont isə basqınlarla bağlı sərt bəyanat verərək, İspaniya dövlətinin “qırmızı cizgini” aşdığını deyib: "İspaniya dövləti qırmızı cizgini aşdı. Bütün qanunlar bir kənara qoyuldu. Koordinasiyalı bir hücumun qurbanlarıyıq. İspan dövləti demokratiya üçün bir utanc vaziyyətinə gəldi. Saxlanan bütün vəzifəli şəxsləri dəstəkləyirik".
O bəyan edib ki, referendum oktyabrın 1-də keçiriləcək və geri addım atmayacaqlar: "1 oktyabrda səsvermə ilə İspaniya dövlətinə cavabımızı verəcəyik. 1 oktyabra qədər də sakit və qətiyyətlə hərəkət edəcəyik. Bu gün Kataloniyada yaşananlar heç bir Avropa Birliyi ölkəsində yaşanmır".
Puigdemont həbs və axtarışlara etiraz edən nümayişçilərə də səslənərək, onları barışdırıcı olmağa və demokratiyanı müdafiə etməyə çağırıb.
Məlumatlara görə, jandarma Kataloniya vilayətində 22 rəsmi qurumun binasında axtarış aparıb, 17 nəfəri isə həbs edib.
Bu arada, 1 oktyabrda keçirilməsi nəzərdə tutulan referendumu dəstəklədiyinə görə istintaqa cəlb edilən bölgədəki bələdiyyə sədrləri ifadə vermək üçün prokurorluğa getməkdən imtina edib.
İspaniyanın baş prokuroru Jose Manuel Mazanın təlimatı ilə 712 bələdiyyə sədri barəsində iş açılıb. Üç bələdiyyə başçısı çağırışlara əsasən Barselona və Leridadakı prokurorluq binalarına gedib, ancaq prokurorun yönəltdiyi sualları cavabsız qoyaraq ifadə verməyi rədd ediblər. Prokurorluğun binası qarşısına isə onları dəstəkləyən müstəqillik tərəfdarları toplaşıb.
Katalonyadakı müstəqilliyi dəstəkləyən Bələdiyyələr Dərnəyindən bildirilib ki, digər bələdiyyə sədrləri də yaxın günlərdə bənzər üsulla prokurorluğa gedəcək, ancaq ifadə verməyi rədd edəcəklər. Katalonyadakı radikal solçu "Xalq namizədliyi Birliyi" (CUP) partiyası isə 30-a yaxın bələdiyyə sədrinin ümumiyyətlə prokurorluğa getməyəcəyini bəyan edib.
948 bələdiyyənin olduğu Kataloniyada referenduma dəstək verməyən və əksəriyyəti Kataloniya Sosialist Partiyasından (PSC) olan bələdiyyə rəhbərlərinə təzyiqlərin artdığı bildirilir.
TAHİR
