Təxminən iki il əvvələ qədər Azərbaycanda Həcc ziyarətinə getmək bir dəb halını almışdı. Elə şəxslər vardı ki, bir deyil, bir neçə dəfə Həcc ziyarətinə gedirdilər. Son zamanlar Həcc ziyarətinə gedənlərin sırası seyrəlməyə başlayıb.
Qafqaz Müsəlmanları İdarəsindən (QMİ) verilən məlumata görə, bu il Azərbaycandan Həcc ziyarətinə getmək üçün 1400 nəfərlik kvota qoyulub. Ötən il isə Azərbaycandan Həcc ziyarətinə getmək üçün 1440 nəfərlik kvota qoyulmuşdu.
QMİ-dən bildirilənə görə, Azərbaycandan Həcc ziyarətinə getmək üçün 1000-ə yaxın insan müraciət edib. Qeyd edilənə görə, hazırda sənədlərin qəbul olunması prosesi davam edir. İdarədən bildirilib ki, sənəd qəbulu kvota dolana qədər davam edəcək.
Xatırladaq ki, zəvvarların avqustun 1-dən 6-na qədər Həcc ziyarətinə yola düşmələri, avqustun 21-dən 25-nə qədər isə Azərbaycana dönmələri planlaşdırılır. Zəvvarlar 8 təyyarə reysi ilə yola salınacaq.
Məlumatlara görə, bu il Həcc ziyarətinin qiyməti 4285 ABŞ dolları təşkil edir.
Azərbaycandan Həcc ziyarətinə gedənlərin sayı niyə azalıb?
İsmayıl Əhməd: “Həccə gedənlərin sayının azalması...”
Dinşünas İsmayıl Əhmədin sözlərinə görə, başqa ölkələrlə müqayisədə Azərbaycana qoyulan kvota daha çoxdur: “Əslində, Azərbaycana qoyulan kvota daha çoxdur. Bu rəqəm 4500-dən tədricən indi göstərilən rəqəmə düşüb. Bunun bir neçə əsas səbəbi var. Ən başlıca səbəb insanlarda maddi imkanın olmamasıdır. Məsələn, mən 500 manat əməkhaqqı alaraq Həcc barədə düşünə də bilmirəm. Bir vaxtlar imkamlı şəxslər onlarla şəxsi göndərirdi, amma indi onlarda da vəziyyət yaxşı deyil. Təxminən 10 il əvvəl sənətçilər arasında Həccə getmək dəb idi, amma indi artıq dəbdən düşüb. Əvvəllər avtobusla iki dəfə ucuz qiymətə getmək olurdu, lakin indi yalnız təyyarə ilə getmək lazımdır. Yəni Həccə gedənlərin sayının azalması bu kimi bir sıra səbəblərlə bağlıdır”.
Hacı Təyyar Hüseynli: “Həcc ziyarətinə gedənlərin azalmasını biz insanların iqtisadi durumu ilə də əlaqələndirə bilərik”
Dinşünas Hacı Təyyar Hüseynli bizimlə söhbətində bildirdi ki, Həcc ziyarətinə getmək nəinki dünyada yaşayan müsəlmanların, hətta qeyri-müsəlmanların da arzusudur. “İldə bir dəfə milyonların bir şəhərə axışıb getməsi, birgə Həcc ziyarəti ritualını icra etməsi bütün dünya insanlarının həqiqətən də marağındadır. Həcc ziyarəti, həmçinin, müsəlmanlara müqəddəs kitabda göstəriş kimi gəlib. Bir insanın öz halal qazancından Həcc ziyarətinə getmək üçün xərclədiyi vəsait onun yaşayışına ancaq müsbət təsir göstərə bilər. Azərbaycanda insanlar Həcc ziyarətinə çox böyük maraq göstərirlər. İllər idi ki, Həcc ziyarətinə zəngin insanlar gedirdilər, yaxud da kimlərsə imkanlı şəxslər tərəfindən ora göndərilirdi. Yaxud elə insanlar olurdu ki, səhhəti Həccə getməyə imkan vermirdi, o öz yerinə başqa birisini naib olaraq göndərirdi. Eyni zamanda, gərək bu ziyarət üçün tələb olunan bütün şərtlər insanda yerində olsun. Yəni səhhəti, həyat tərzi bu ziyarətə adekvat olmalıdır. Qaldı ki, kvota məsələsinə, hər ölkənin əhalisinin sayına görə kvota nəzərdə tutulur. 10 milyonluq əhalisi olan ölkə üçün 10 min, 70-80 milyon nəfər əhalisi olan ölkə üçün kütləvi ibadət nəzərdə tutulub. Ziyarət Qurban bayramında olduğu üçün ildə bir dəfə kütləvi xarakter alır. İldən-ilə Azərbaycan üçün Həcc ziyarəti üçün kvotanın azaldılmasına gəlincə, deyə bilərəm ki, ola bilsin, gələn il say bir az da az olsun. Bu da müşahidə edilə bilər. Mən bunu ilk növbədə Həcc ziyarətinin baha olması ilə əlaqələndirirəm. Bu xüsusən də devalvasiyadan sonra baş verdi. Bilirsiniz ki, Həcc ziyarəti üçün təşkil edilən turpaket xarici valyuta ilədir. Həcc ziyarətinə gedənlərin azalmasını biz, eyni zamanda, insanların iqtisadi durumu ilə də əlaqələndirə bilərik. Həcc ziyarəti missiyasının ödənişlərinin xüsusilə ABŞ dolları ilə olması da insanların qarşısını kəsir. Onlara bundan əlavə cibxərcliyi də lazım olur. Bu xərcləri üst-üstə gələndə xeyli vəsait edir. Bir insanın Həcc ziyarətinə getməsi üçün orta hesabla 10 min manata yaxın vəsait lazımdır. Bu da çox böyük məbləğdir. Yəni səfər böyük xərclər tələb edir”.
İradə SARIYEVA
