Azər Həsrət: "AZAL da bu məsələyə görə cavab verməlidir ki, necə olur..."
Özünü sosial şəbəkə fenomeni və ekstrasens kimi təqdim edən Bayram Nurlu barədə mətbautda yeni ilginc məlumat yayılıb. Yerli KİV-in yazdığına görə, bu yaxınlarda Bayram Nurlu xarici səfərdən Bakıya qayıdarkən Heydər Əliyev adına Beynəlxalq Aeroportun "VİP" xidmətlərindən istifadə edib.
"Bu zaman onun dalınca Azərbaycanın nüfuzlu nazirliklərindən birinə təhkim olunmuş AA seriyalı "BMW" markalı avtomobil göndərilib. Bayram Nurlu həmin avtomobilə əyləşərək, müvafiq ünvana gedib"- deyə mətbuatda qeyd edilib.
Bizim işimiz onun arxasınca avtomobil göndərən yüksək çinli dövlət məmurunun kimliyini araşdırmaq, B.Nurlunun şəxsi həyatını müzakirə etmək deyil. Diqqətimizi çəkən məsələ başqadır. B.Nurlunun hansı yolla "VİP" Xidmətindən istifadə etdiyi müxtəlif suallar doğurur. "VİP" elə bir xidmət məkanı deyil ki, istənilən şəxs əlinə çemodanını götürüb ora daxil olsun, xaricə gedəndə və xaricdən gələndə ondan istifadə etsin. Bildiyimiz qədər, təyyarənin "VİP" xidmətindən istifadə edən adamların siyahısı Prezidentin sərəncamı ilə təsdiqlənir. Yəni biz belə bilirik. Onu da bilmirik ki, Bayram Nurlunun adı o siyahıda var, yoxsa yoxdu, onu həqiqətən də "VİP"-ə buraxıblar, yaxud buraxmayıblar. Amma mətbuatda belə bir məlumat yazılıbsa, onda B.Nurlu ora necə daxil olub? AZAL-ın indiyə qədər bununla bağlı heç bir açıqlaması yoxdur. AZAL bu barədə açıqlama verməyib. Hər halda, qurumun açıqlama verməsini ictimaiyyət də, mətbuat da gözləyir.
B.Nurlunu "VİP"-ə salan nazir müavini kimdirsə, onun da adı açıqlanmır, amma ictimaiyyət tərəfindən qınanılır. İctimaiyyət hesab edir ki, onun "VİP"-ə buraxılmasında AZAL-ın rəhbəri məsuliyyət daşıyır. Əgər Prezidentin təsdiq etdiyi siyahıda onun adı yoxdursa, bəs o ora necə düşüb? Bu AZAL-ın məsuliyyətidir. Yaxud o siyahıda varsa, adı o siyahıya necə düşüb? Bizi məsələnin şou tərəfi maraqlandırmır. Nəzərə alsaq ki, "VİP" çox mühüm bir dövlət institutudur və çox əhəmiyyətli şəxslərin xaricə gedib-gələndə istifadə etdiyi strateji bir keçid məntəqəsidir, o halda Bayram Nurlu kimdi "VİP"-dən istifadə etmək imkanı əldə etsin? "VİP"-dən istifadə etməyibsə və məlumat yalandırsa, o informasiya təkzib olunmalıdır. Yəni ictimaiyyətin gözündə "VİP"i belə rüsvayçı duruma salmaq olmaz.
Məsələyə əvvəlcə AZAL-ın mövqeyini öyrənmək istədik. Qurumun mətbuat xidmətindən bildirdilər ki, sualın cavablandırılması üçün Heydər Əliyev Beynəlxalq Aeroportunun mətbuat xidmətinə müraciət edin. Biz də Heydər Əliyev Beynəlxalq Aeroportunun mətbuat xidmətinə müraciət etdik və sorğu göndərdik, qurumdan rəsmi cavab gələn kimi onu da təqdim edəcəyik.
Məsələyə ekspert rəyi öyrəndik.
"...Düşünürəm ki, məsələnin üzərinə cəmiyyət olaraq getməliyik, bunun axırına çıxmalıyıq..."
Siyasi şərhçi Azər Həsrət bildirdi ki, dövlət vəzifəsində, dövlət qulluğunda təmsil olunmaq, eyni zamanda o vəzifənin, o qulluğun verdiyi səlahiyyətlərdən istifadə şəxsi ləyaqət göstəricisidir. "Yəni bir dövlət vəzifəlisi ona tapşırılan səlahiyyətləri icra edərkən eyni zamanda konkret əxlaq dairəsi çərçivəsində də davranmaq öhdəliyini götürür. Dövlət vəzifəsində olmaq daha üstün ləyaqət sahibi olmaq deməkdir. Hələ nazir müavini olmaq daha əxlaqlı, daha şərəfli, daha vicdanlı, dövlətə daha bağlı insan olmaq deməkdir. Amma yayılan informasiyadan belə görünür ki, hansısa nazir müavini dövlət əxlaqını bir üzdəniraqın ayaqları altına atıb. Yəni şübhəli kimliyi və çılpaq desək, əxlaqsızlığı ilə ad çıxarmış bir adamı bu cür yüksək səviyyədə hörmətə mindirən adam dövlət vəzifəsi daşımamalıdır. Əgər o nazir müavini özü də həmin əxlaqsızlığın girdabına yuvarlanıbsa, vəzifəsindən cəhənnəm olub getməlidir. Bu cür adamlar dövlət vəzifəsinə yaxın buraxılmamalıdır. Cəmiyyətin əxlaqını korlayan, pis örnək təşkil edən adamlara bu cür dəstək olmaq, onları qaldırıb başımızın üzərinə qoymaq bir dövlət adamına yaraşacaq davanış deyil. Bu əxlaqsızlığa qahmar çıxan adam dövlət vəzifəsi daşımamalıdır. Eyni zamanda AZAL da bu məsələyə görə cavab verməlidir ki, necə olur elə əxlaqsız, tərbiyəsiz adamlar yüksək dövlət vəzifəsi tutan, yaxud da cəmiyyətdə öz çəkisi ilə fərqlənən adamların istifadə etməli olduğu xidmətdən belə rahatlıqla istifadə edə bilir? Kimdir onlara bu izni verən? Niyə bu izn verilir? Niyə bu adamlar dövlət vəzifəsi tutduqlarına görə hər cür əxlaqsızlığı edə biləcəklərini düşünürlər? Ona görə də, düşünürəm ki, məsələnin üzərinə cəmiyyət olaraq getməliyik, bunun axırına çıxmalıyıq, bu tərbiyəsiz, əxlaqsız, pis örnək təşkil edən adama lütfü göstərən o əxlaqsız nazir müavininin kimliyi də iştimailəşdirilməlidir. Ümumiyyətlə, heç vaxt dövlət qulluğu tuta bilməyəcəyi ilə bağlı qərar verilməlidir. Təbiidir ki, o vəzifəsindən dərhal rədd edilməlidir. Özü də bunu Prezident İlham Əliyev xüsusi qərarla elan etməlidir ki, başqalrına da görk olsun. Bu nədir, Azərbaycan cəmiyyətində bu cür tərbiyəsiz, əxlaqsız adamları gətirib dövlət vəzifəli şəxslər başımıza çıxarırlar. Bu, cəmiyyətin təməllərinin məhv edilməsidir. Bunu da bir nazir müavini edirsə, AZAL edirsə cəmiyyət olaraq belə məsələyə heç də dözüm göstərməli deyilik"-deyə müsahibimiz vurğuladı.
Məsələ ilə bağlı sorğumuza cavab verərsə, Heydər Əliyev Beynəlxalq Aeroportunun mətbuat xidmətinin də mövqeyini işıqlandıracağıq...
Əli TURABOV
