Gülər Cəfərova: "Oğlumun şəhid olduğuna hələ də inana bilmirəm, yolunu gözləyirəm..."
İyunun 12-də Mədəniyyət Nazirliyi Respublika Xatirə Kitabı Redaksiyasının Şəki Şəhər Heydər Əliyev Mərkəzində təşkil etdiyi "44 gün – Tarixi zəfər" adlı kitabın I və II cildinin təqdimat mərasimi çərçivəsində Şəki, Oğuz və Qəbələdən olan şəhid valideynlərindən övladları, Vətənin igid, ölməz oğulları barədə müsahibələr götürdük.
Budəfəki müsahibimiz 28 iyun 1994-cü ildə Oğuz rayonunun Xalxalqışlaq kəndində anadan olan Vətən müharibəsi şəhidi Şahin Şamil oğlu Cəfərlinin anası Gülər Cəfərovadır. Bildirək ki, iyunun 28-i şəhidimizin ad günüdür, yaşasaydı 30 yaşı tamam olacaqdı.
Qara libaslı, qara yaylıqlı analarımızdandır Gülər xanım, yeganə oğlu cəbhəyə gedib və şəhidlik zirvəsinə ucalıb. Ürəyi oğul yaralı ana bildirir ki, Şahin 2000-2011-ci illərdə şəhid İntizam Rəhimov adına Qumlaq kənd tam orta məktəbini bitirib. "Oğlum çox sadə, halal, zəhmətkeş idi. Uşaqlıqdan texnikaya, kənd təsərrüfatına xüsusi maraq göstərirdi, torpağı sevirdi. Atası traktorçu idi, özü də atası kimi traktorçu oldu. Bu işə həvəs onda atası traktorçu olduğu üçün yaranmışdı.
"Bütün Azərbaycan oğulları kimi mənim oğlumun da ən böyük arzusu torpaqlarımızın düşməndən azad edilməsi idi"
Bununla yanaşı çox vətənpərvər, zəhmətkeş bir bala idi.
Vətən müharibəsi başlamazdan əvvəl sentyabrın 21-də çağırışla gedib, sentyabrın 27-də də 44 günlük Vətən müharibəsi başlayıb.
Şahin 2012-2014-cü illərdə Gəncə şəhərində N saylı hərbi hissədə hərbi xidmətdə olub. Xidmətdə olarkən atasına dəfələrlə komandanlığın təşəkkür məktubları gəlirdi. Bütün Azərbaycan oğulları kimi mənim oğlumun da ən böyük arzusu torpaqlarımızın düşməndən azad edilməsi idi. Onu da deyim ki, Şahin 2016-cı ildə Aprel döyüşlərində sərrast atıcı kimi iştirak edib. Qeyd etdiyim kimi, 2020-ci ilin sentyabrında da səfərbərliklə bağlı hərbi təlim toplanışına cəlb edilib.
Azərbaycan Silahlı Qüvvələrinin müddətli həqiqi hərbi xidmət hərbi qulluqçusu olan oğlum Şahin Cəfərli 2020-ci il sentyabrın 27-də Azərbaycan və Ermənistan arasında başlanan İkinci Qarabağ müharibəsi zamanı Murovdağ döyüşlərində döyüşüb. Top alay atıcısı kimi çox fərqlənib.
Balam oktyabrın 1-də Murovdağ döyüşlərində qəhrəmancasına vuruşaraq şəhid olub, oktyabrın 2-də Xalxalqışlaq kəndində dəfn olunub".
Gülər ana dedi ki, oğlu 26 yaşında şəhdilik zirvəsinə ucalıb, özündən sonra Jasmin adlı bir qızı qalıb. Jasmin də bütün şəhid balaları kimi atasının bir gün qayıdacağı günü gözləyir, amma atası da, başqa şəhidlərimiz də Tanrının uca mərtəbəsindən övladlarına baxırlar, ruhları ilə onları qoruyurlar.
"Oğlum evli idi. Qızı Jasmin oğlumun şəhid olmasından sonra doğuldu. Atası oktyabrın 1-i şəhidlik zirvəsinə ucaldı, dekabrın 23-ü nəvəm dünyaya gəldi. Özümün bir qızım, bir oğlum vardı, Şahin həm sonbeşiyim, həm də yeganə oğlum idi. Şahinsiz yaşamaq çox çətindir, övladı da hər zaman atasının yolunu gözləyir. Yoldaşını özü sevib – seçmişdi, el adəti ilə ona gözəl toy etdik.
Hər dəqiqə Şahinin yolunu gözləyirəm, elə bilirəm ki, indi qapını açıb içəri girəcək. Harasa gedəndə də evə tez getməyə çalışıram ki, birdən Şahin gələr məni evdə tapmaz. Evimizin hər yanını oğlumun şəkilləri ilə bəzəmişik. Bilirsiz, çox çətindir. Oğlumun şəhid olduğuna hələ də inana bilmirəm, yolunu gözləyirəm..."
Ana deyir ki, bəzən ona elə gəlir, oğlu traktorla yer əkməyə gedib, özünü insanların harayına çatdırıb.
Bütün bununla yanaşı, ananın sözlərinə görə, acısı böyük olsa da, oğlunun şəhid adı ilə qürur duyur.
Ana qeyd etdi ki, Azərbaycanın ərazi bütövlüyünün bərpa edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Şahin Cəfərli ölümündən sonra "Vətən uğrunda", Azərbaycanın Kəlbəcər rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən ölümündən sonra "Kəlbəcərin azad olunmasına görə", Azərbaycan ərazilərinin işğaldan azad olunması zamanı döyüş tapşırıqlarını və xidməti vəzifələrini yerinə yetirərkən fərqləndiyinə görə Azərbaycan Prezidenti İlham Əliyevin 30.12.2020-ci il tarixli Sərəncamına əsasən ölümündən sonra "Hərbi xidmətlərə görə" medalları ilə təltif olunub.
Ana deyir ki, övladından yadigar qalan nə varsa hamısını göz bəbəyi kimi qoruyur, onlardan oğlunun ətrini alır. Dövlət başçısının oğlunun əməyinə böyük qiymət verdiyini deyən ana bildirdi ki, Şahinin böyük bir amal uğrunda şəhid olması ilə fəxr edir.
Ürəyi dəmirçi kürəsi kimi yanan Gülər ana danışdıqca kövrəlir, göz yaşlarını saxlaya bilmirdi. Gecə-gündüz ağlayıb-oxşamağı, balasının məzarının başına pərvanə kimi dolanmağı özünə peşə bilən ananın ağrı-acısı dünyaya sığmır. Respublika Xatirə Kitabı Redaksiyasının şəhidlərimizin adlarının əbədiləşdirilməsi istiqamətində gördüyü işləri təqdir edən şəhid anası bildirdi ki, oğlunun adı da bu kitablarda əks olunur, xatirəsi yaşadılır.
Gülər ana bu gün təsəllini balaca Jasmindən alır, deyir ki, balasının balası ona bəzən qüssəni, kədəri bir anlıq unutdurur. Nə yaxşı ki, şəhidlərdən yadigar qalan övladları var, o övladlar şəhid ataların bizlərə yadigarıdır...
İyunun 28-də 30 yaşı tamam olan şəhidimiz, igid döyüşçü Cəfərli Şahin Şamil oğlunu xatırladıq. Şahin kimi qəhrəmanlarımızın ruhu şaddır...
İradə SARIYEVAŞəki-Bakı
