Alimpaşanın 11 il 6 aylıq həbsi qüvvədə saxlandısa, özünə qaytarılan 10 milyonluq əmlakın qanuni əsasları var...(?)
Şəmsəddin Əliyev: "Bu qərardan prokurorluq mütləq mənada protest verməlidir"
Şəmkirin sabiq icra başçısı Alimpaşa Məmmədov 11 il 6 ay müddətinə azadlıqdan məhrum edilib. Gəncə Ağır Cinayətlər Məhkəməsinin hökmü ilə eks-icra başçısının iki əmlakı üzərindən həbs qərarı götürülüb.
Bunlar bazar dəyəri 8 milyon 270 min manat qiymətləndirilən "Azfarel" MMC balıqyetişdirmə və emalı müəssisəsi və 1 milyon 335 min manatlıq "Abad Şəmkir" MMC-yə məxsus daşınan və daşınmaz əmlaklardır. A.Məmmədovun Bakıda yerləşən 676 min manatlıq iki mənzili isə dövlət nəfinə müsadirə edilib.
Çox maraqlıdır, sabiq icra başçısı barəsində ittiham hökmü çıxarılıbsa və o, ağır cəzaya məhkum edilibsə, onda onun bu əmlakı cinayət yolu ilə əldə etdiyinə də şübhə yeri qalmır. Belə olan təqdirdə, verilən cəza ilə dəyəri 10 milyon olan əmlaka verilən amnistiya arasında dərin ziddiyyət yaranmış olur. Bu barədə ekspetlər nə düşünür?
Hüquqşunas Şəmsəddin Əliyev "Bakı-Xəbər"ə açıqlamasında bildirdi ki, Şəmkirin sabiq icra başçısı ilə bağlı verilən məhkəmə qərarı onu da dərindən təəccübləndirdi: "Korrupsiya ilə bağlı cinayətlər kifayət qədər təhlükəlidir. Sadə dillə onun anlamı belədir ki, bu adamlar həm də dövlət başçısının onlara göstərdiyi etimada xəyanət ediblər. Çünki belə yüksək vəzifələrdə çalışan məmurlar birbaşa Prezidentin sərəncamı ilə vəzifəyə təyin olunurlar. Bu məmura məxsus olan, dəyəri on milyona çatan əmlak necə özünə qaytarıla bilər? Çünki bu əmlakın cinayət yolu ilə əldə olunması sübut olunmuşdu ki, onu müsadirə etmişdilər. Alimpaşa Məmmədova 11 il 6 ay cəza verilirsə, deməli onun cinayəti sübuta yetirilir. Barəsində ittiham hökmü çıxarılan bu şəxs elə korrupsiya cinayətlərinə görə həbs edilib. Verilən bu qərarda ciddi təzad mövcuddur. Bir tərəfdən adam cəzaya məhkum edilir, digər tərəfdən dəyəri on milyon olan əmlakı özünə qaytarılır. Alimpaşa Məmmədov bu əmlakı aldığı əmək haqqı ilə əldə edə bilməzdi. Təbii ki, səlahiyyətindən istifadə edərək, cinayət yolu ilə bu cür var-dövlətə sahib olur. Belə bir qərarın verilməsi absurddur. Bu, ölkədə qüvvədə olan Korrupsiya Haqqında Qanuna tamamilə ziddir və ona hörmətsizlikdir. Belə çıxır ki, bu qanun yalnız sıravi vətəndaşlar üçündür. Amma qanunvericilikdə göstərilir ki, sıravi vətəndaşlar yalnız vasitəçi kimi korrupsiya cinayətlərinin subyekti ola bilərlər. Belə yanaşma hüquqi nihilizmin bariz nümunəsidir, hüququn aliliyinə kölgə salır, dövlətin siyasətinə əngəl yaradır. Hesab edirəm ki, bu qərardan prokurorluq mütləq mənada protest verməlidir. Belə olacağı təqdirdə daha yuxarı instansiya məhkəmələri buraxılan bu səhvi düzəldə bilərlər. Bu hala ictimai təpki də güclü olmalıdır".
Məhəmmədəli QƏRİBLİ
%22%2C%22image%22%3A%22https%3A%2F%2Fwww.baki-xeber.com%2Fmedia%2Fuploads%2Fposts%2F2024-06%2F1719325084_alimpasa.webp%3Fv%3D1733900888%22%2C%22iframe_v2%22%3Afalse%2C%22iframe_v3%22%3Afalse%2C%22t%22%3A0%2C%22cg%22%3A%7B%22isPrivate%22%3Atrue%2C%22browserName%22%3A%22Chromium%22%7D%7D%2C%22config%22%3A%7B%22page_url%22%3A%22https%3A%2F%2Fwww.baki-xeber.com%2Fsosial%2F212954.html%22%2C%22referrer%22%3A%22%22%2C%22user_id%22%3A%22f2bf2b5e-9784-49e3-a102-547c2a0d915b%22%2C%22iframe_user_id%22%3Atrue%7D%7D&cb=0.20310494161290338){kind=spacer}