Tanrı sovqatı olan çörək, milliyyətindən və dini mənsubiyyətindən asılı olmayaraq, bütün insanlar üçün müqəddəs nemətdir. Azərbaycanlılar çörəyi hər şeydən üstün tutur, onu duz ilə birlikdə süfrəyə birinci gətirir və süfrədən də axırda aparırlar.
Çörəyə hörmət hər bir azərbaycanlının qanında və canındadır. Bəlkə də elə həmin səbəbdən çörəyə and içir, kiminsə səhlənkarlığı ucbatından yerə düşmüş çörək parçasını qaldırıb öpür və gözün üstünə qoyuruq. Bu, çörəyin müqəddəsliyinə böyük inamdan irəli gəlir. Çörək xalqın və bütövlükdə ölkənin sərvəti olmaqla yanaşı, həm də qüdrətidir. Hər yerdə çörəyə, onun müqəddəsliyinə xüsusi hörmət var.
Onu da qeyd edək ki, qidalanmada çörəkdən çox istifadə edən ölkələr arasında Azərbaycan ön sırada dayanır. Hesablamalara görə, bir azərbaycanlı gün ərzində təxminən 300-350 qram çörək yeyir. Ölkəmizdə bir çox çeşiddə çörək hazırlanır. Ancaq Azərbaycanda qida təhlükəsizliyi ciddi problemlərdən biri kimi qalmaqdadır. Belə ki, son zamanlar istehlakçıların dükan və ya bazardan aldıqları yeyinti məhsullarının içərisindən xoşagəlməz nəsə çıxır. Gah bulkanın içərisindən şurup çıxır, gah tortun içərisində sellofan torba olur, ya da dəmir qırığı. Bu günlərdə "Çörəkçi" zavodunun istehsal etdiyi çörəyin içərisindən bolt çıxıb. Bu barədə jurnalist Amil Hacıyev sosial şəbəkədə məlumat verib. O qeyd edib ki, "Al market" mağazasından aldığı çörəyin içindən tikinti materialına aid bolt çıxıb.
Qeyd edək ki, zamanla çörəkdən müxtəlif növ yad cismlərin çıxması haqqında məlumatlar yayılıb.
AQTA: “Araşdırmalar aparılacaq və araşdırmaların nəticələri ilə bağlı…”
Məsələ ilə bağlı Azərbaycan Qida Təhlükəsizliyi Agentliyindən (AQTA) bildirildi ki, bununla bağlı məlumat mediadan götürülərək araşdırılması üçün AQTA-da aidiyatı üzrə yönləndirilib: “Araşdırmalar aparılacaq və araşdırmaların nəticələri ilə bağlı ətraflı məlumat veriləcək. Vətəndaşlardan xahiş edirik ki, bu kimi hallarla rastlaşdıqda konkret faktları - məhsulun adı, istehsalçısı, satış obyekti, istehsal tarixi və s. göstərməklə Agentliyin 1003 "Çağrı Mərkəzi"nə zəng edib məlumat versinlər".
Eyyub Hüseynov: “Çörəyin içərisindən kənar cisim çıxırsa, demək, burada heç bir gigiyenadan söhbət gedə bilməz”
Azad İstehlakçılar Birliyinin sədri Eyyub Hüseynov bildirdi ki, Nazirlər Kabinetinin 95 saylı qərarına əsasən, bütün mallar, əsasən də ərzaq məhsulları qablaşdırılmalıdır: "Malın büküldüyü kağızın üzərində isə məhsul istehsal edən şirkətin adı, ünvanı və əlaqə telefonu yazılmalıdır. Çox təəssüf ki, zavod çörəkləri qablaşdırılmır və açıq satılır. Həmin müəssisələrin əlaqə vasitələri də gizli qalır. Bu da istehlakçıların hüquqları və Nazirlər Kabinetinin qərarının pozulması deməkdir. Bu halda, istehlakçı mütləq lazımi orqanlara məlumat verməlidir. Çörəyin içərisindən kənar cisim çıxırsa, demək, burada heç bir gigiyenadan söhbət gedə bilməz. Belə müəssisələr bağlanmalı, ya da müasir texnologiyalarla işləməlidirlər. Bunun qarşısı mütləq alınmalıdır. Əks halda, insanlar arasında xəstəliklər artar".
Məsələ ilə bağlı "Çörəkçi" ilə əlaqə saxlamağa çalışdıq. Lakin "Çörəkçi" firmasının saytında qeyd olunan nömrə işləmirdi.
Günel CƏLİLOVA
