Pandemiya ilə mübarizədə bir sıra ölkələrdə dövlət büdcəsindən vəsait ayrılsa da, həmin vəsaitlərin düzgün idarə olunmasında, xərclənməsində problemlər var. Elə ölkələr var ki, bununla bağlı bu il üçün ayrılan vəsaitlərin böyük hissəsi xərclənib. Bəzi ölkələrdə vəsaitlərin səmərəli istifadə olunmasında problemlər var və s.
Ancaq müşahidələr göstərir ki, Azərbaycanda bu sahədə işlər digər ölkələrə baxanda daha yaxşı tənzimlənir. Belə ki, indiyə qədər pandemiya ilə mübarizəyə ayrılan vəsaitin 53,4 faizi ilin birinci yarısında xərclənib. Bu ilin ilk yarısı ərzində pandemiya ilə mübarizə və onun ölkə iqtisadiyyatına mənfi nəticələrini azaltmaq məqsədilə tədbirlərin həyata keçirilməsi üçün dövlət büdcəsindən ayrılan 1 milyard 409 milyon manatdan 752 milyon manatın maliyyələşməsi təmin edilib. Bu mənbədən səhiyyə üçün ayrılan 250 milyon manatın 149 milyon manatı, sosial və iqtisadi dəstək tədbirlərinə ayrılan 570 milyon manatın 281 milyon manat, sosial təminat dəstəyinə ayrılan 309 milyon manatın 244 milyon manatı xərclənib. Dövlət şirkətlərinə maliyyə dəstəyi üçün ayrılan 280 milyon manatın 118 milyon manatından istifadə edilib.
Görünən odur ki, sözügedən məsələdə Azərbaycan daha ehtiyatlı və səmərəli siyasət yeridir.
“...vəsaitlər xərclənən zaman ünvanlılığın qorunması üçün əlavə işlər görülməlidir”
Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyevin sözlərinə görə, Azərbaycan bununla bağlı vəsaitləri qənaətlə istifadə edir: “Ümumiyyətlə, pandemiya ilə bağlı son dövrlər Azərbaycanda nəzərdə tutulan xərclərin qənaətlə, səmərəli xərclənməsi müşahidə edilir. Bunun başlıca səbəblərindən biri ondan ibarətdir ki, dövlət maksimum dərəcədə çalışır ki, bu vəsaitlərdən səmərəli istifadə edilsin. Eyni zamanda, şişirdilmiş rəqəmlərdən qaçmaq mümkün olsun, vəsaitlər nəzərdə tutulmayan sahələrə yönəldilməsin. Birbaşa ünvanlılıq nəzərə alınsın. Nəzərə almaq lazımdır ki, pandemiya hələ davam edir. Hələ bundan sonra qlobal iqtisadiyyatı hansı təzyiqlərin gözlədiyi məlum deyil. Hesab edirəm ki, buna da hazır olmaq lazımdır. Bu kimi məsələlər nəzərə alınaraq son dərəcə ehtiyatlı siyasət həyata keçirilir. Bütün bunlarla yanaşı, hesab edirəm ki, vəsaitlər xərclənən zaman ünvanlılığın qorunması üçün əlavə işlər görülməlidir. Hər bir kəs bu dəstəkdən yararlana bilirmi? Vəsaitlərin xərclənməsi dövründə də kimlərsə pulu yayındıra bilirlərmi? Fikrimcə, bütün bunlarla əlaqədar ictimai nəzarət gücləndirilməli və vəsaitlərin xərclənməsinin monitorinqi aparılmalıdır. Həmin monitorinqə ictimaiyyət də cəlb olunmalıdır ki, sonda bunun tam uğurlu olmasını deyə bilək”.
Ekspert hesab edir ki, sözügedən prosesdə ictimai nəzarət təmin edilsə, bu, ümumi işin xeyrinə olacaq.
Vidadi ORDAHALLI
