Dünya ictimaiyyəti hərbi münaqişə zonalarından narkotiklərin qanunsuz dövriyyəsi üçün istifadə olunmasından narahatlıq hissi keçirir. Azərbaycan da belə bir problemlə üzləşib. 25 ildən çoxdur ki, Azərbaycanın tarixi torpaqları olan Dağlıq Qarabağ və ətraf yeddi rayon Ermənistan silahlı qüvvələri tərəfindən işğal edilib. “Trend”in məlumatına görə, bunu Baş nazir Novruz Məmmədov Bakıda keçirilən Narkotiklərlə Mübarizə üzrə 36-cı Beynəlxalq Konfransda çıxışı zaman deyib.
N.Məmmədov bildirib ki, Azərbaycanın işğal altındakı ərazilərindən narkotik vasitələrin istehsalı və tranzit üçün istifadə edilməsi narkobiznesin və beynəlxalq terrorizmin genişlənməsinə münbit şərait yaradır: “Ermənistan tərəfindən işğal olunmuş ərazilərimizə cəlb edilən şirkətlərin qanunsuz iqtisadi fəaliyyəti işğalın davam etdirilməsinə, eləcə də narkotrafikə və digər cinayət hallarına şərait yaradır".
Baş nazir qeyd edib ki, bu halların aradan qaldırılması üçün işğal olunmuş ərazilərdə iqtisadi-maliyyə fəaliyyətlərinin, pul köçürmələrinin, sərmayə yatırımlarının qarşısı alınmalıdır: "Azərbaycan tərəfindən sözügedən vəziyyətə nəzarət edilməsi məqsədilə müvafiq qara siyahılar tərtib olunub. Bununla bağlı Azərbaycan işğal olunmuş ərazilərdə qanunsuz fəaliyyətə cəlb olunan fiziki və hüquqi şəxslərin mənsub olduğu ölkələri müvafiq tədbirlər görməyə çağırır”.
Azərbaycanda narkomanlığa və narkotik vasitələrin qanunsuz dövriyyəsinə qarşı ciddi mübarizə aparılır. Dövlət Gömrük Komitəsinin sədri Səfər Mehdiyev Bakıda keçirilən Narkotiklərlə Mübarizə üzrə 36-cı Beynəlxalq Konfransda çıxışı zamanı belə deyib.
S.Mehdiyev bildirib ki, Azərbaycanın bütün dövlət gömrük keçid məntəqələrində müasir avadanlıqlar quraşdırılıb və daşınan yüklər millimetrinə qədər yoxlanılır: "Görülən ciddi tədbirlər nəticəsində 2019-cu ilin ilk 3 ayı ərzində narkotik vasitələrin qanunsuz dövriyyəsi ilə məşğul olan 16 dəstə aşkar edilib və 520 kq narkotik vasitə dövriyyədən çıxarılıb. Dövlət Gömrük Komitəsi bütün mümkün vasitələrdən istifadə etməklə ölkənin digər hüquq-mühafizə orqanları ilə birgə fəaliyyət göstərir".
Əli Həsənov Azərbaycanın işğal olunmuş ərazilərində terrorçu qrupların yaradılaraq münaqişə zonalarına göndərilməsini bütün dünya üçün ciddi təhdid adlandırıb. Baş nazirin müavini, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının sədri Əli Həsənov Bakıda keçirilən Narkotiklərlə Mübarizə üzrə 36-cı Beynəlxalq Konfransda çıxışı zamanı deyib ki, Azərbaycanda narkomanlığa və narkotik vasitələrin qanunsuz dövriyyəsinə qarşı mübarizə sahəsində üç dövlət proqramı uğurla icra edilib və 4-cü proqram hazırlanaraq Prezident İlham Əliyevə təqdim edilib.
Baş nazirin müavini bildirib ki, Azərbaycan bu sahədə beynəlxalq təşkilatlarla sıx əməkdaşlıq münasibətləri qurub: "Azərbaycan mühüm coğrafi mövqedə yerləşir və əsas problemlərdən biri də ölkəmiz vasitəsilə narkotiklərin daşınmasına edilən cəhdlərdir".
O deyib ki, Azərbaycanda müasir texnologiyalar vasitəsilə narkotiklərin qanunsuz dövriyyəsinə qarşı ciddi mübarizə aparılır və son dövrlərdə külli miqdarda narkotik vasitə qanunsuz dövriyyədən çıxarılıb.
Ə.Həsənov qeyd edib ki, Ermənistanın Azərbaycana qarşı təcavüzü nəticəsində işğal olunmuş Azərbaycan ərazilərində narkotik vasitələrin əkilməsi, istehsalı və tranzit bazasının yaradılması, terrorçu qrupların yaradılması və onlara təlim keçərək digər ölkələrdə münaqişə zonalarına göndərilməsi təhlükənin miqyasının nə qədər böyük olduğunu göstərir və bunun təkcə region deyil, bütün dünya üçün ciddi təhdid yaratması aydın görünür.
