Bu ilin 15 aprel tarixində Moskva şəhərində, Rusiya tərəfinin təşəbbüsünə əsasən, Rusiya xarici işlər naziri Sergey Lavrovun iştirakı ilə Azərbaycan xarici işlər naziri Elmar Məmmədyarov və Ermənistan xarici işlər naziri Zöhrab Mnatsakanyan arasında görüş keçirilib.
Xarici İşlər Nazirliyinin mətbuat xidməti idarəsindən baki-xeber.com-a verilən məlumata görə, görüşdə, həmçinin, ATƏT-in Minsk Qrupunun həmsədrləri və ATƏT-in fəaliyyətdə olan sədrinin şəxsi nümayəndəsi iştirak edib.
Görüş zamanı Ermənistan-Azərbaycan Dağlıq Qarabağ münaqişəsinin həlli üzrə başlıca məsələlərə dair ətraflı fikir mübadiləsi aparılıb. Bu xüsusda, cari ilin 29 mart tarixində Vyanada baş tutmuş Azərbaycan Prezidenti və Ermənistan Baş nazirinin görüşünün nəticələri diqqətə alınmaqla, münaqişə üzrə danışıqlar prosesinin irəli aparılması perspektivləri nəzərdən keçirilib.
Görüşdə, həmçinin, münaqişə zonasında gərginliyin azaldılmasına dair tədbirlər, habelə humanitar sahədə mümkün birgə fəaliyyət üzrə fikir mübadiləsi aparılıb. Nazirlər, KİV nümayəndələrinin qarşılıqlı səfərləri də daxil olmaqla, insanlararası təmasların qurulması istiqamətində praktiki addımların atılmasına razılıqlarını ifadə ediblər.
Görüş iştirakçıları yaxın gələcəkdə təmasların davam etdirilməsini razılaşdırıblar.
Görüş nəticəsində Azərbaycan, Ermənistan və Rusiya xarici işlər nazirlərinin və ATƏT-in həmsədrlərinin birgə bəyanatı qəbul edilib.
Bəyanatda qeyd edilir ki, aprelin 15-i Rusiya, Azərbaycan və Ermənistanın xarici işlər nazirləri - Sergey Lavrov, Elmar Məmmədyarov və Zöhrab Mnatsakanyan arasında Moskvada Rusiya tərəfinin təşəbbüsü ilə işçi görüşü keçirilib: "Onlara ATƏT-in Minsk Qrupunun həmsədrləri (İqor Popov – Rusiya, Stefan Viskonti – Fransa, Endrü Şofer – ABŞ), həmçinin ATƏT-in fəaliyyətdə olan sədrinin şəxsi nümayəndəsi Anjey Kasprşik də qoşulublar".
Sənəddə bildirilir ki, Azərbaycan Prezidenti İlham Əliyev və Ermənistan baş naziri Nikol Paşinyan arasında Vyana sammitində əldə olunmuş razılığa uyğun olaraq görüş iştirakçıları sərhəddə və təmas xəttində vəziyyət, həmçinin humanitar sahədə əlaqələrin perspektivinə dair müzakirə aparıblar. Münaqişənin həlli ilə bağlı əsas aspektlər istiqamətində ətraflı fikir mübadiləsi aparılıb.
Qeyd edilir ki, Azərbaycan və Ermənistanın xarici işlər nazirləri tərəflərin siyasi və diplomatik vasitələrlə Dağlıq Qarabağ münaqişəsinin nizamlanması üzrə səylərini davam etdirmək niyyətlərini təsdiqləyiblər: "Nazirlər münaqişə zonasında, xüsusilə kənd təsərrüfatı fəaliyyətində vəziyyətin gələcək sabitləşməsində maraqlı olduqlarını vurğulayıblar. Onlar həmçinin ailələrə tərəflərin müvafiq mərkəzlərində həbsdə saxlanılan qohumları ilə görüşmək imkanı vermək üçün qarşılıqlı əsasda tədbirlər görməyə razılaşıblar. Nazirlər KİV nümayəndələrinin qarşılıqlı səfərləri də daxil olmaqla insanlar arasında əlaqələrin qurulmasına dair konkret işə başlamağa hazır olduqlarını bildiriblər".
Bildirilir ki, Rusiyanın xarici işlər naziri və ATƏT-in Minsk qrupunun həmsədrləri regionda davamlı sülhə nail olunması istiqamətində vasitəçilik missiyasına sadiq olduqlarını bir daha bəyan ediblər.
Görüş iştirakçıları yaxın vaxtlarda əlaqələri davam etdirmək barədə razılığa gəliblər.
