“Sözügedən təlimlərə ölkəmizin dəvət olunmasını Rusiya tərəfindən Azərbaycana verilən önəm kimi dəyərləndirirəm”
Rəsmi Moskva 2019-cu ilin sonunda keçirilməsi nəzərdə tutulan Rusiya-Çin genişmiqyaslı hərbi təlimlərinə Azərbaycanı da müşahidəçi qismində dəvət etmək niyyətindədir. Xəbər verildiyi kimi, bu barədə Rusiya Milli Qvardiya Qoşunlarının baş komandanı, general Viktor Zolotov deyib.
Onun sözlərinə görə, bu təlimlər Rusiya Qvardiya Qoşunlarının beynəlxalq fəaliyyətində ən böyük hadisələrdən biri olacaq: “2019-cu ilin sonunda çinli həmkarlarla keçirilməsi planlaşdırılan genişmiqyaslı təlim Rusiya Qvardiyasının beynəlxalq həyatında ən böyük hadisə olmalıdır. Təlimlərə Azərbaycan, Belarus, Qazaxıstan, Qırğızıstan və Özbəkistan müşahidəçi qismində dəvət olunacaqlar. Bu cür əməkdaşlıq son dərəcə aktualdır”.
V.Zolotov qeyd edib ki, Rusiya Qvardiyası tərəfdaşlarla uzunmüddətli əsasda əməkdaşlıq qurur. Onun fikrincə, Rusiya Qvardiyası terrorizm, cinayətkarlığa qarşı mübarizə, ictimai asayiş və təhlükəsizliyin təmin olunması sahələrində təcrübə mübadiləsi ilə yanaşı, birgə tədbirlərin, o cümlədən, beynəlxalq təlimlərin keçirilməsində də maraqlıdır: “Bu məqsədlə biz 2025-ci ilə qədər analoji vəzifələri yerinə yetirən xarici həmkarlarımızla əməkdaşlığa dair idarələrarası sazişlər bağlamağı planlaşdırırıq”.
Yeri gəlmişkən onu da qeyd edək ki, Azərbaycanın belə böyük bir təlimə dəvət olunacağı Ermənistanda ciddi narahatlığa səbəb olub. Erməni şərhçi Karen Ambartsumyan yazır ki, "bizim strateji müttəfiqlərimiz” Ermənistana xəyanət edirlər: “Azərbaycan bu təlimlərə tək ölkə kimi dəvət olunmur, lakin dəvət olunacaq ölkələr arasında Özbəkistan və Azərbaycanın Kollektiv Təhlükəsizlik Müqaviləsi Təşkilatına (KTMT) üzv olmaması bizi narahat etməyə bilməz”.
Görünən odur ki, Azərbaycanın inkişafı, regionda artan rolu ölkənin geosiyasi əhəmiyyətini, nüfuzunu artırır. Azərbaycanın strateji bir məkanda yerləşməsi bu baxımdan özünəməxsus rola malikdir. Bütün bunlarla yanaşı, Azərbaycanın Rusiya-Çin genişmiqyaslı hərbi təlimlərinə dəvət olunması nə deməkdir?
İbrahim Rüstəmli: “İki ölkə arasında hərbi sahədə əməkdaşlıqla bağlı müxtəlif müqavilələr imzalanıb”
Məsələyə münasibət bildirən hərbi ekspert, ehtiyatda olan polkovnik-leytenant İbrahim Rüstəmlinin sözlərinə görə, bu, Azərbaycanın roluna verilən önəmin göstəricisidir: “Ona görə də belə böyük hərbi təlimlərə Azərbaycan dəvət edilir. Azərbaycanla Rusiya arasında hərbi sahədə əməkdaşlıqla bağlı müxtəlif müqavilələr imzalanıb. Rusiya Azərbaycana bir sıra silahlar ixrac edir. Rusiya silahları dünyada bir sıra parametrlərə görə seçilir. Coğrafi şəraitə görə bu silahlardan istifadə səmərəlidir. Bununla yanaşı, iki ölkə arasında kadr hazırlığı ilə bağlı əlaqələr var. Rusiya Azərbaycanın regiondakı roluna xüsusi önəm verir. Bunun nəticəsidir ki, belə böyük təlimlərə Azərbaycan da dəvət edilir. Siyasi müstəvidə Azərbaycanla Rusiya arasında yaxşı münasibətlər mövcuddur. İki ölkədə mədəniyyət günləri keçirilir və s. Ona görə də sözügedən təlimlərə ölkəmizin dəvət olunmasını təsadüfi saymıram. Bunu Rusiya tərəfindən Azərbaycana verilən önəm kimi dəyərləndirirəm. Dəvət olunan ölkələrin siyahısına nəzər salsaq görərik ki, bir sıra postsovet dövlətləri təlimlərə dəvət edilməyib. Baxmayaraq ki, onların içində elə dövlətlər var Rusiya ilə hərbi sahədə çox yaxın əməkdaşlıq edirlər. Ancaq Azərbaycana bu məsələdə xüsusi diqqət göstərilib. O baxımdan, Azərbaycanın artan nüfuzu və bundan yaranan reallıq ortadadır”.
Vidadi ORDAHALLI
