Qətərin paytaxtı Dohada keçirilən Beynəlxalq Parlamentlərarası İttifaqın 140-cı iclasında iştirak edən İran parlamentinin sədri Əli Laricani Ermənistan parlamentinin sədri Ararat Mirzoyanla görüşüb. Sözügedən görüşdə İran parlamentinin sədri Araz çayını çirkləndirdiyinə görə Ermənistana ciddi iradını bildirib.
Əli Laricani diqqətə çatdırıb ki, Ermənistan hökuməti ekoloji problemləri diqqətdə saxlamalı və Araz çayına çirkab suların axıdılmasına son qoymalıdır. İran parlamentinin sədri bildirib ki, çayın çirkləndirilməsi ekoloji problem yaratmaqla yanaşı, İranın kənd təsərrüfatına da ziyan vurur.
Ermənistan parlamenti sədrinin diqqətinə çatdırılıb ki, ümumi istifadədə olan Araz çayının çirkləndirilməsi beynəlxalq qanuna və normalara ziddir. Rəsmi İrəvandan qəti şəkildə tələb olunub ki, Araz çayının çirkləndirilməsi məsələsi aradan qaldırılsın.
Ermənistanın Araz çayını çirkləndirməsi uzun illərdir müşahidə olunur. Orada yerləşən mis və qızıl zavodlarından Araz çayına müxtəlif kimyəvi və digər tullantılar axıdılır. Nəinki mis, digər zavodların tullantıları Araz çayına yönəldilir. Tullantıların bir qismi Araz çayına tökülən çaylar vasitəsilə gəlir. Xüsusən də Azərbaycanın işğal olunmuş ərazilərindən keçərək Araza tökülən Oxçu çayında çirklənmənin səviyyəsi daha böyükdür. Bir sözlə, Ermənistan ərazilərindən təmizlənmədən birbaşa su obyektlərinə axıdılan məişət tullantılarının təsiri nəticəsində Araz çayında və onun qollarında biogen maddələrin miqdarının normadan dəfələrlə artıq olması müşahidə olunur.
Ermənistanın Araz çayını çirkləndirməsinə dəfələrlə Azərbaycan öz etirazını bildirib. Bir neçə dəfə müxtəlif beynəlxalq tədbirlərdə Azərbaycan bu məsələni qaldırıb. Azərbaycanın Ermənistanla münaqişə vəziyyətində olması səbəbindən, bir sıra hallarda beynəlxalq qurumlar bunun üstündən sükutla keçiblər. Araz çayı həm də İrandan keçir. Ancaq İran indiyə qədər Ermənistana Araz çayını çirkləndirdiyinə görə sərt etiraz etməmişdi. İlk dəfədir İranın ən yüksək səviyyəli rəsmi şəxslərindən biri Ermənistan rəsmisinə etiraz edir. O baxımdan, ekspertlər bunu necə dəyərləndirirlər?
Aydın Mirzəzadə: “İran özünün maraqlarını qorumaq üçün artıq ciddi addımlar atmağa məcbur olacaq”
Sözügedən məsələ ilə bağlı fikirlərini “Bakı-Xəbər”lə bölüşən millət vəkili Aydın Mirzəzadənin sözlərinə görə, İranın Arazın çirkləndirilməsi ilə bağlı Ermənistana rəsmi müstəvidə etiraz etməsi müsbət haldır: “Təəssüflər olsun ki, beynəlxalq qurumlar dəfələrlə Ermənistanın beynəlxalq hüquq normalarına zidd olaraq ekologiyanı çirkləndirən hərəkətlərinə göz yumublar. Baxmayaraq ki, Azərbaycan bununla bağlı kifayət qədər fakt ortaya qoyur və bu məsələnin diqqətdə saxlanmasına çalışır. Artıq vəziyyət o həddə gəlib çatıb ki, İran Araz çayının çirkləndirilməsi ilə bağlı Ermənistanla çox ciddi şəkildə danışmalı olur. Problem ondadır ki, Ermənistan həm öz ərazisində, həm də Azərbaycanın işğal olunmuş ərazilərində apardığı təsərrüfat işlərində zərərli maddələrdən çox istifadə edir. Ermənistan bir sıra hallarda bunu öz ağır iqtisadi vəziyyəti ilə əlaqələndirir. Bildirirlər ki, ətraf mühitə zərər vurmayan maddələr almaq üçün kifayət qədər vəsaitləri yoxdur. Bu baxımdan, ermənilər hesab edirlər ki, onların təsərrüfat fəaliyyətinin zərərini digər ölkələr öz üzərlərinə götürməlidirlər. Bu da artıq İran tərəfdə böyük narazılığa səbəb olub. Bu, Araz sahilindəki bölgələrdə kənd təsərrüfatı və insanların normal yaşaması üçün böyük təhlükə törədir. Laricaninin etirazı onu göstərir ki, Ermənistanın qeyri-sivil hərəkətlərinin artıq digər dövlətlər üçün də təhlükə yaratdığının şahidi oluruq. Fakt artıq ortadadır. İran Ermənistana ciddi etirazını bildirdi. Ermənistan bundan nəticə çıxarmayacaqsa, şübhəsiz, İran özünün maraqlarını qorumaq üçün artıq ciddi addımlar atmağa məcbur olacaqHHHHhh”.
Vidadi ORDAHALLI
