Məlum olduğu kimi, Ukraynada prezidentliyə namizəd, şoumen Vladimir Zelenski ölkənin hazırki rəhbəri Petro Poroşenko ilə debata çıxmaqdan imtina edib. Belə ki, Zelenski Kiyevin "Olimpiya" stadionunda təşkil olunan debatdan son anda boyun qaçırıb. Şoumen Poroşenko tərəfindən ona qarşı təxribatın hazırlandığını iddia edərək, debatdan qaçmasını bununla əsaslandırıb.
Zelenskidən fərqli olaraq, Poroşenko yüzlərlə insanın qarşısına çıxıb və vətəndaşları maraqlandıran sualları cavablandırıb. Stadionda təkbaşına olan Poroşenko bu müddətdə jurnalistlərlə söhbətləşib. O, Zelenskini növbəti dəfə debata dəvət edib.
“Qorxmayın, debat elə də qorxulu deyil”, - deyə Poroşenko Zelenskiyə ismarıc göndərib. Sonra istehza ilə Zelenskinin prezident Emmanuel Makronla görüşmək üçün Parisə səfərindən sonra dincəlməyə ehtiyacı olduğunu əlavə edib.
Jurnalistlərdən birinin Zelenskinin qələbə çaldığı təqdirdə onunla əməkdaşlıq edib-etməyəcəyi haqda sualının cavabında Poroşenko deyib ki, “əgər Allah göstərməsin, o seçilsə, bu, Ukrayna xalqının seçimi olacaq və mən bu seçimə hörmət edəcəm”.
Poroşenko aprelin 21-də prezident seçkilərinin ikinci turunda Zelenski ilə mübarizə aparacaq. V.Zelenski bu ayın əvvəli seçkilərin birinci turunda böyük üstünlüklə irəli çıxıb. Rəy sorğuları onun final səsvermədə də üstünlük qazana biləcəyini proqnozlaşdırsa da, onun debatdan imtina etməsi müəyyən müzakirələrə səbəb olub.
Poroşenko seçkilərin qarşıdan gələn ikinci turundan əvvəl beynəlxalq dəstək qazanmaq məqsədilə aprelin 12-də Berlinə və Parisə səfər edib. Poroşenko Berlində Almaniya Kansleri Angela Merkellə görüşüb. Merkel Almaniya ilə Ukrayna arasında son illərdə “çox yaxın münasibətlərin” qurulmasını təqdir edib.
Zelenski Parisə səfər edərək, Prezident Emmanuel Makronla görüşüb.
Bütün bu deyilənlərin fonunda, Zelenski Poroşenko ilə debatdan niyə imtina etdi? Nəzərə alsaq ki, ikinci tura çox az vaxt qalıb, onun bu addımı keçiriləcək seçkilərin nəticələrinə necə təsir göstərəcək?
Məhəmməd Əsədullazadə: “Ukrayna xalqı artıq prosesləri yaxından izləyir və hesab edirəm ki, səsini daha təcrübəli siyasətçiyə verəcək”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə kontekstdən yanaşdı: “Ukraynada keçirilən prezident seçkiləri ilk öncə Qərblə Rusiya arasında siyasi qarşıdurma yarışıdır. Rusiya çalışır ki, Poroşenkonun mövqeləri kifayət qədər zəifləsin və öz namizədini yenidən hakimiyyətə gətirsin. Bununla yenidən Ukraynada öz mövqelərini bərpa etsin. Hesab edirəm ki, Ukraynada keçirlən prezident seçkilərinin birinci turunda Zelenski digər namizədlərdən daha çox səs toplasa da, ikinci turda Poroşenkoya qalib gəlmək şanslarını əldən verir. Birinci turda populizm və vətəndaşların ona simpatiyasına görə səs alsa da, ikinci turda siyasi baxımdan daha ciddi platforma ortaya qoymalıdır. Yalnız o halda qalib gələ bilər. Ancaq müşahidələr göstərir ki, Zelenskinin timsalında bu yoxdur. Poroşenko isə kifayət qədər təcrübəyə və siyasi platformaya malikdir. Ona görə də debat siyasətçilər üçün əsas sınaq meydanıdır və burada siyasi bilik mühüm rol oynayır. Bundan əlavə, Qərbin dəstəyi də mühüm amildir. Ancaq Zelenskinin debata gəlməməsi onun ziyanına işlədi. Zelenskinin öz təklifinə rəğmən, debatdan çəkinməsi onun siyasi təcrübəsizliyindən və Poroşenkonun yanında daha da zəif duruma düşmək qorxusundan irəli gəlir. Yəni dolayısı ilə bundan çəkinir. Məhz bu hal çox mühüm amildir və Poroşenkonun nüfuz qazanmasına müsbət təsir edir. Qeyd edim ki, Ukraynada aprelin 21-də Poroşenkonun qalib gəlmək şansları artır. Zelenski isə özünü daha zəif bənd halına gətirdi. Debatlar əsasən namizədlər arasında bir yarışdır və artıq Zelenski bu yarışda məğlub vəziyyətdədir. Ukrayna xalqı artıq prosesləri yaxından izləyir və hesab edirəm ki, səsini daha təcrübəli siyasətçiyə verəcək”.
Vidadi ORDAHALLI
