19/07/2019 12:49
728 x 90

Roma papası təcavüzkar Ermənistan rəhbərlərinin də ayağından öpərmi - Sudanda sülh üçün etdiyi kimi...

img

Erməni saytlarının yaydığı məlumata görə, Roma papası Frensisk Dinka və Nuer xalqları arasında sülhə nail olduğu üçün Cənubi Sudan liderləri Salv Kiir Mayarditin ayağını öpüb.

Qeyd edək ki, Roma Katolik Kilsəsinin rəhbəri Papa Frensisk Vatikanda qəbul etdiyi sudanlı qonaqların ayağını öpüb.

Qeyd edilənə görə, Cənubi Sudanın prezidenti Salva Kiir Mayardit və digər dövlət təmsilçiləri  Papanı ziyarət ediblər. 82 yaşlı Papa Sudanda sülh və barışın davam etməsi üçün heyətdəki liderlərin ayağını öpüb. Papa Cənubi Sudanda baş verən böhranın yenidən vətəndaş müharibəsinə çevrilməməsi üçün təcili hərəkətə keçməyə çağırıb.

Qeyd edək ki, 2013-ci ildə Dinka və Nuer xalqları arasında qanlı bir qarşıdurma baş verib, 2018-ci ilin sentyabrında isə siyasətçilər Cənub Sudan münaqişəsini sona çatdırmaq üçün razılaşma imzalayıb.

Roma papası bildirib ki, burada sülhün təmin olunacağına ümid bəsləyir. “Sülh müqaviləsini imzalayan üç nəfərdən, bir qardaş olaraq, sülh içində qalmağı xahiş edirəm. Qəlbimin dibindən soruşuram: davam edin, daha çox problem olacaq, amma qorxmayın. Gedin, problemləri həll edin! Atalarınız arasında bir mübarizə olacaq, ancaq xalqla birlikdə qalacaqsınız. Yəni adi vətəndaşlardan millətin ataları olacaqsınız “-deyən papa bu dəfə də onları müharibə odunu söndürməyə çağırıb.

Roma papası bu addımı Qarabağ məsələsində niyə atmır? O nə üçün ermənilərin ayağını öpmür ki, Azərbaycanla sülhə gedin və işğal etdiyini əraziləri geri qaytarın?

  • Aydın Mirzəzadə:“Doğrudan da, Roma papası Frensisk sülhün olmasını arzu edirsə, qoy Ermənistan rəhbərliyinə də müraciət etsin”

Məsələni baki-xeber.com-a şərh edən millət vəkili Aydın Mirzəzadənin sözlərinə görə, papa Frensisk bu addımı Qarabağ münaqişəsinin sülh yolu ilə həll edilməsi naminə də atmalıdır. “Çox istərdik ki, Qarabağ münaqişəsinin həlli istiqamətində də o bu addımı atsın. Doğrudan da, Roma papası Frensisk sülhün olmasını arzu edirsə, qoy Ermənistan rəhbərliyinə də müraciət etsin. Kaş ki, o, Ermənistanı öz qoşunlarını işğal etdiyi Azərbaycan torpaqlarından çıxarmağa, Xocalıda və digər ərazilərimizdə törətdikləri soyqırımlara, qanlı cinayətlərə görə Azərbaycan xalqından üzr istəməyə çağıraydı. Təəssüf ki, biz onun bu addımlarını görə bilmirik. Əgər o həqiqətən də ümumən dünyada sülhün olmasına çalışırsa, bu məsələni Ermənistan rəhbərliyi ilə müzakirə etməsi pis olmazdı”-deyə A.Mirzəzadə bildirdi.

  • Akif Nağı: “Roma papası Frensisk sülh naminə Cənubi Sudan prezidentinin ayağını öpübsə, mütləq bu səyi Azərbaycan torpaqlarının işğaldan azad edilməsi, bölgədə sülhə nail olunması naminə də göstərməlidir”

Qarabağ Azadlıq Təşkilatının sədri, politoloq Akif Nağı qeyd etdi ki, Cənubi Sudanda baş verən hadisə zamanı bu ölkənin xristian əhalisi Cənubi Sudandan ayrılmaq istəyirdi və buna görə də uzun illər mübarizə apararaq Sudanı parçalanmağa təhrik etdilər. Bütün xristian dünyasının bu qüvvələri müdafiə etdiyini deyən A.Nağının bildirdiyinə görə, həmişə Papanı müsəlman dünyasında baş verənlər deyil, xristian aləmində yaşananlar narahat edib.  “Bu isə bir dini lider üçün məqbul olmayan bir mövqedir. İslam dünyasında bu qədər qan tökülür lakin o heç bir reaksiya vermir. Yaxud Dağlıq Qarabağ probleminin həlli ilə bağlı heç bir təşəbbüs göstərmir. Xristian dünyasına aid bir xalq Qarabağda qətliamlar törədib, qan töküb, torpaqlarımızı işğal edib, ancaq bunu diqqətə almır, hətta Ermənistanın maraqlarına uyğun mövqe sərgiləyir. Bu da təəssüfedici haldır. Özünü dini lider hesab edən bir şəxs bütün dinlərin nümayəndələrinə eyni gözlə baxmalıdır. Təəssüf ki, bunu uzun illərdir görmürük. Yəqin ki, uzun illər də görməyəcəyik. Hesab edirəm ki, Roma papası Frensisk sülh naminə Cənubi Sudan prezidentinin ayağını öpübsə, mütləq bu səyi Azərbaycan torpaqlarının işğaldan azad edilməsi, bölgədə sülhə nail olunması naminə də göstərməlidir. O bu məsələyə obyektiv yanaşmalı, kimin işğalçı olduğunu, qətl törətdiyini, qan tökdüyünü öz adı ilə deməlidır. Papa Ermənistandan tələb etməlidir, bu ölkənin rəhbərliyinə müraciət etməlidir ki, Azərbaycana qarşı törətdiyi bu cinayətlərə görə həm üzr istəsin, həm də işğala son qoysunlar. Düşünürəm ki, papa bu istiqamətdə təşəbbüslər göstərməlidir”-deyə A.Nağı bildirdi.

İradə SARIYEVA

Son xəbərlər