24/04/2019 02:37
728 x 90

Zaxarovanın Rusiya XİN adından yeni antiazərbaycançılığı, ya erməni mediasının uydurması – Qarabağın hava məkanına beynəlxalq açılış (?)...

“Dağlıq Qarabağdakı hansısa bir eks separatçı məmurun təklifi nə vaxtdan müzakirə üçün əsas sayılıb?”

img

Rusiya Xarici İşlər Nazirliyinin sözçüsü Mariya Zaxarova Dağlıq Qarabağda separatçı qurumun eks məmurunun səsləndirdiyi cəfəng fikrə reaksiya verib. Erməni KİV-inin verdiyi məlumata görə, qondarma qurumun sabiq “baş naziri” Araik Arutunyan Azərbaycanla əməkdaşlıq perspektivi üçün iki təklif irəli sürüb.

Bunlardan biri Sərsəng su  anbarının birgə istismarı və Dağlıq Qarabağın hava məkanını beynəlxalq uçuşlar üçün açmaq məsələsidir. Nə qədər qəribə olsa da, Rusiya XİN-in rəsmisi Zaxarova ənənəvi mətbuat konfransında bu sərsəm təklif barədə danışıb: "Hesab edirəm ki, bu və ya digər təklif və təşəbbüsləri ilk növbədə, sözsüz ki, münaqişə tərəfləri qiymətləndirməlidirlər. Sonra isə bu və digər ölkənin və ya həmsədr ölkələrin iştirakına ehtiyac olarsa, bu məsələyə baxıla bilər. Hesab edirəm ki, bu və digər məsələlərə Moskvada keçiriləcək görüşdə baxılması üçün yaxşı imkan olacaq".

Çox maraqlıdır ki,  Mariya Zaxarova Ermənistanın rəsmi şəxsi olmayan bir adamın səsləndirdiyi lazımsız təklifi müzakirə edir, hətta bunun mümknülüyünə dair ümid toxumu da səpir.  Rusiyanın rəsmi şəxsinin bu davranışını necə qiymətləndirə bilərik?

  • Elşən Həsənov: “Onlardan necə istifadə ilə bağlı qaydaları və icazəni Azərbaycan dövləti müəyyənləşdirir”

Təhlükəsizlik məsələləri üzrə ekspert Elşən Həsənov qəzetimizə açıqlamasında bildirdi ki,  edilən təklifin özü qeyri-ciddidir: “Dağlıq Qarabağdakı hansısa bir eks separatçı məmurun təklifi nə vaxtdan müzakirə üçün əsas sayılıb? Mən Ermənistan KİV-ində gedən məlumatları nəzərdən keçirdim. Onlar bunu toy-bayramla qarşılayıblar. Təqdimatı da belə edirlər ki, Zaxarova filankəsin təklifinə reaksiya verdi. Bu məsələyə müxtəlif aspektlərdən yanaşmaq lazımdır. Əvvəla həmin adam kimdir ki, münaqişə tərəflərinə hansısa təklif təqdim etsin? İkincisi, Dağlıq Qarabağdakı hava məkanı və Sərsəng su anbarı birbaşa Azərbaycanın ərazisinə aid olan subyektlərdir. Onlardan necə istifadə ilə bağlı qaydaları və icazəni Azərbaycan dövləti müəyyənləşdirir. Üçüncüsü, Rusiya kimi böyük ölkənin XİN-i adından bələ məsuliyyətsiz bəyanata niyə şərh verilir? Zaxarova deyə bilər ki, o, kiminsə bəyanatını şərh etməyib, sadəcə, jurnalistin sualına cavab verib. Amma belə deyil. Çünki Zaxarovanın bəyanatının özündə bir qərəz və ermənilərə dəstək notları var. Deyir ki, bunun mümkünlüyü müzakirə olunacaq. Biz ilk dəfə deyil ki, Rusiya XİN-i adından Moskva ilə Bakının münasibətlərinə adekvat olmayan bəyanatların verildiyinin şahidi oluruq. Sanki Rusiya XİN-də ayrıca bir ermənipərəst qanad var ki, bu prosesləri belə gərginləşdirməklə məşğuldur. Zaxarovanın bəyanatını başqa bir ölkənin daxili işinə müdaxilə kimi dəyərləndirirəm. Hesab edirəm ki, rəsmi Bakı buna öz etirazını bildirməlidir”.

Məhəmmədəli QƏRİBLİ

Son xəbərlər