27/06/2019 09:26
728 x 90

Ermənistandan Putinə “qatil” ittihamına rəsmi Moskvanın cavabı gecikir – dilavər Zaxarovanın da səsi çıxmır...

img

Məlum olduğu kimi, erməni KİV-i Milli Şuranın Müdafiə və təhlükəsizlik məsələləri üzrə daimi komissiyasının iclası barədə sensasion məlumat yayıb. Məlumatda qeyd olunur ki, iclas 27 oktyabr 1999-cu il hadisələrinə həsr olunub.

İclasda Ermənistanın baş naziri Nikol Paşinyaının yaxın silahdaşı, hakim partiyanın deputatı, parlamentin Müdafiə və təhlükəsizlik məsələləri komitəsinin sədri Andranik Köçəryan sensasion açıqlama verib. O, Putini sözügedən hadisələrlə bağlı ittiham edib: “27 oktyabr cinayəti açılıb. Sifarişçilər məlumdur. Bu cinayəti Vladimir Putinin tapşırığı ilə Rusiya xüsusi xidmət orqanları törədiblər”.

Məlumat üçün bildirək ki, o zaman bir neçə terrorçu Ermənistan parlamentinin binasına daxil olaraq, spiker Karen Dəmirçyanı, baş nazir Vazgen Sərkisyanı, spikerin müavinləri Yuri Baxşyanı və Ruben Miroyanı, operativ məsələlər üzrə nazir Leonard Petrosyanı, deputatlar Armenak Armenakyanı, Henrix Abramyanı və Mikael Kotanyanı güllələyiblər.

Məlum hadisə baş verəndə V.Putin Rusiyanın baş naziri idi. Artıq o, avqust ayından bu vəzifəyə təyin olunmuşdu. Ondan əvvəl isə Putin Federal Təhlükəsizlik Xidmətinin rəisi idi. 

Məsələnin maraqlı tərəfi odur ki, Rusiya hələ də buna hansısa rəsmi münasibət bildirməyib. Nəzərə alsaq ki, bu fikirləri Ermənistanın hansısa müxalifət partiyasının nümayəndəsi deyil, hakim partiyanın deputatı səsləndirib, o zaman buna bir reaksiya olmalı idi. Ancaq Rusiyadan buna reaksiya yoxdur. Digər tərəfdən, adətən, Rusiya XİN təmsilçisi Mariya Zaxarova keçirdiyi ənənəvi mətbuat konfranslarında, demək olar, istənilən məsələyə toxunur, müəyyən fikirlər səsləndirir. Qəribədir ki, Zaxarova da indiyə qədər sözügedən məsələyə hansısa reaksiya verməyib. Bütün hallarda, Rusiyadan niyə bununla bağlı reaksiya yoxdur?

  • Mübariz Əhmədoğlu: “Ola bilsin publik reaksiya verməsinlər, amma münasibət olacaq

Məsələyə münasibət bildirən Siyasi İnnovasiya və Texnologiyalar Mərkəzinin rəhbəri Mübariz Əhmədoğlunun sözlərinə görə, hələ bu məsələ yeni olduğu üçün reaksiya gecikir: “Əvvəla iki gündür belə bir məlumat yayılıb. Bu o demək deyil ki, Rusiyanın buna rəsmi reaksiyası olmayacaq. Fikrimcə, reaksiya mütləq olacaq. Zaxarovanın da bunun üstündən sükutla keçməsi, görünür, müəyyən səbəblərlə bağlıdır. Ancaq onun keçirdiyi mətbuat konfransında bununla bağlı ona sual verilsə, Zaxarovanın cavabı olacaq. Hesab edirəm ki, bizim Moskvada olan media təmsilçilərimiz bununla bağlı Zaxarovaya sual ünvanlamalıdırlar. Bütün bunlara rəğmən, Rusiyanın buna hansısa formada reaksiyası olacaq. Ola bilsin publik reaksiya verməsinlər, amma münasibət olacaq. Başqa bir tərəfdən, ola bilsin, Rusiyanın bu məsələyə reaksiyası sərt olsun. O səbəbdən bu gecikir”.

  • Əli Əliyev: “Rusiyanın hələ də bu məsələyə reaksiya verməməsi razılaşdırılmış oyundur”

Vətəndaş və İnkişaf Partiyasının sədri Əli Əliyevin fikrincə, Rusiyanın bu məsələyə reaksiya verməməsi razılaşdırılmış oyuna bənzəyir: “Ermənistanda bu kimi məsələlər əlaqəli şəkildə təşkil olunur. Çünki bu ölkə Rusiyanın forpostudur. Ermənistanda rollar bölünüb. Bəzən hakimiyyətin deyə bilmədiyini müxalifət deyir. Andranik Köçəryanın Putinlə bağlı açıqlamalarına gəldikdə isə, Ermənistanda hakimiyyətin müxtəlif qanadları var. Ermənistan hakimiyyəti şüurlu surətdə öz komandasını iki hissəyə bölüb. Bu yolla Rusiyaya təzyiq edirlər ki, bu ölkə Ermənistana daha çox güzəşt etsin. Yəni Putinə təzyiq etməklə çalışırlar ki, daha çox güzəşt qoparsınlar. Ancaq Rusiyanın hələ də bu məsələyə reaksiya verməməsi razılaşdırılmış oyundur. Fikrimcə, Paşinyanın komandasından olan bir şəxsin belə söz deməsi hakimiyyətlə razılaşdırılıb. Formal görüntü yaradırlar ki, guya Paşinyan hakimiyyəti müstəqil siyasət yeridir. Fikrimcə, bu səbəbdən reaksiya yoxdur”.

Vidadi ORDAHALLI

Son xəbərlər