Artıq bir neçə gündür sosial şəbəkələrdə Azərbaycanın Türkiyənin Qars şəhərindəki baş konsulu Nuru Quliyevlə həmin bölgədə fəaliyyət göstərən Əsassiz Erməni İddiaları ilə Mücadilə Dərnəyinin (ASİMDER) rəhbəri, Azərbaycan cəmiyyətinə adı yaxşı tanış olan Göksəl Gülbəy arasında ciddi qalmaqalın baş qaldırdığının şahidi oluruq. Yayılan sənədlərin məzmunundan görünür ki, baş konsul İqdır Prokurorluğuna rəsmi şikayət eməyə məcbur olub.
Şikayətin mətnindən aydın olur ki, ASİMDER rəhbəri konsulluğun İqdırdakı nümayəndəsinə hansısa şəkli göstərərək, N.Quliyevi təhdid edib. Buna görə də N.Quliyev prokurorluğa müraciət etmək məcburiyyətində qalıb. Həmin vaxt Göksəl Gülbəy öz “Facebook” səhifəsində yaydığı məlumatda konsul tərəfindən barəsində şikayət edildiyini təsdiqləyib, ancaq şikayətdəki detalları tam əsassız sayıb. Əldə etdiyimiz məlumata görə, yaranmış bu vəziyyətdən narahat olan Azərbaycanın bəzi QHT rəhbərləri tərəfləri barışdırmaq missiyasını üzərlərinə götürərək, Qars və İqdıra səfər ediblər. Bildirilir ki, bu şəxslərdən biri də Qarabağ Azadlıq Təşkilatının sədri Akif Nağı olub.
Akif Nağı: “Söhbət Fətullah Gülənin olduğu hansısa məclisdə həm də Nuru Quliyevin guya iştirak etdiyinə dair fotodan gedirdi”
QAT sədri “Bakı-Xəbər”ə açıqlamasında məlumatı təsdiqlədi: “Bəli, çox üzücü bir vəziyyət yaranmışdı. Mən Göksəl Gülbəyi yaxından tanıyıram. Bir yerdə fəaliyyətimiz də mövcuddur. Bilirəm ki, Azərbaycanı sevən adamdır. Ötən həftə baş konsul N.Quliyevlə telefon danışığımız oldu. Bölgəyə səfər etmək zərurəti ortaya çıxdı. Mən ötən həftənin ortalarında orada oldum. İqdır və Qars şəhərlərində QHT və media nümayəndələri ilə görüşdüm. Onların da hamısı bildirdi ki, bu qalmaqala son qoyulmalıdır. Biz də belə hesab etdik ki, ASİMDER rəhbəri özünün əsası olmayan iddialarından geri çəkilməlidir. Çünki burada söhbət tək N.Quliyevin şəxsindən deyil, eyni zamanda, onun tutduğu vəzifənin önəmindən gedirdi. Gəlirəm sualınızın ikinci hissəsinə. Qalmaqala səbəb konsulumuzun montaj olunan bir foto ilə bağlı adını xoşagəlməz hadisələrdə hallandırmaq cəhdi olub. Söhbət Fətullah Gülənin olduğu hansısa məclisdə həm də N.Quliyevin guya iştirak etdiyinə dair fotodan gedirdi. Mən baxan kimi bildim ki, həmin foto montajdır. Bu aydın şəkildə sezilirdi. Hesab edirəm ki, bu narazılıqların aradan qaldırılması istiqamətində görülən səylər fayda vermək üzrədir. Əldə etdiyim məlumata görə, məndən sonra da bəzi QHT nümayəndələri barışıq təşəbbüsü ilə çıxış ediblər”.
İsmayıl Ağayev: “Bu narazılığın daha da qızışmasında həm Azərbaycan, həm də Türkiyə tərəfində maraqlı qüvvələr vardı”
Məlum oldu ki, Akif Nağıdan sonra Türkiyənin həmin bölgəsinə Beynəlxalq Diaspor Mərkəzinin rəhbərliyi də səfər edib. BDM nümyaəndəsi kimi həmin missiyada İsmayıl Ağayevlə Samir Adıgözəlli təmsil olunublar. BDM sədri İsmayıl Ağayev “Bakı-Xəbər”ə açıqlamasında bildirdi ki, ASİMDER başqanı ilə baş konsul arasındakı münaqişəyə tamamilə son qoyuldu: “Biz bunu alqışlayırıq. Ortada ciddi bir narazılıq vardı. Söhbət montaj olunan foto ilə konsulun şantaj edilməsi və N.Quliyevə qarşı Türkiyə mediasında qara piarın aparılmasından gedirdi. Bu narazılığın daha da qızışmasında həm Azərbaycan, həm də Türkiyə tərəfində maraqlı qüvvələr vardı. Biz burada olarkən araşdırma apardıq. Onları bir araya gətirdik. Tam məlum oldu ki, Göksəl Gülbəyin bu məsələlərdə heç bir əli yoxdur. Görüşdə N.Quliyev buna tam əmin oldu. Qərara gəlindi ki bundan sonra hər iki ölkənin ümumi maraqları naminə birgə fəaliyyəti davam etdirsinlər”.
Məhəmmədəli QƏRİBLİ
