Məhəmməd Əsədullazadə: “Prezidentin regionlara mütəmadi səfərləri beynəlxalq birlik tərəfindən xalqla dövlətin milli vəhdəti kimi qəbul olunur”
Prezident İlham Əliyevin bölgələrə mütəmadi səfərləri regionların inkişafına stimul verir. Mövcud problemlər yerindəcə həll edilir və yaxud da onların həlli istiqamətində konkret tədbirlər görülür. Bunun sayəsində ötən illər ərzində rayonlarda bir sıra işlər görülüb və hazırda da bu işlər davam etdirilir.
Məsələn, dövlət başçısının tapşırığına uyğun olaraq, rayonlar üzrə ixtisaslaşma aparıldı, ənənəvi kənd təsərrüfatı sahələrinin - tütünçülüyün, baramaçılığın, üzümçülüyün, şərabçılığın, çayçılığın inkişafı istiqamətində zəruri addımlar atıldı. Atılan bu addımların əsasında dayanan əsas məqsədlər ərzaq təhlükəsizliyinin təminatı, idxalı azaltmaq, ixracı artırmaqdır.
Bütün bunların nəticəsidir ki, regionların mənzərəsi əhəmiyyətli dərəcədə dəyişib. Artıq regionların sosial-iqtisadi inkişafına dair üçüncü Dövlət Proqramının icrası başa çatmaqdadır. Son 15 ilin sosial-iqtisadi göstəricilərinə qısa nəzər salsaq görərik ki, çox böyük işlər görülüb. Ötən dövrdə ölkədə 1,9 milyon iş yeri yaradılıb ki, onlardan 1,4 milyonu daimi iş yeridir. Ölkə iqtisadiyyatına 250 milyard dollar sərmayə qoyulub. Bunun yarısı xarici sərmayədir. İşsizlik və yoxsulluq 5 faiz səviyyəsindədir. Müqayisə üçün qeyd edək ki, birinci proqramın icrasına başlayanda ölkəmizdə yoxsulluğun səviyyəsi 50 faiz idi. Maaşlar, pensiyalar 10 dəfəyə yaxın artıb. Davamlı inrkişafa stimul verən əsas amillərdən biri də bölgələrdə və ümumən ölkədə şəffaflığın təmin edilməsidir. “ASAN xidmət” mərkəzlərinin yaradılması şəffaflığa xidmət edən addımlardandır. Prezident İlham Əliyevin rayonlara səfəri çərçivəsində açılışında və təməlqoyma mərasimində iştirak etdiyi sosial obyektlərə istinadən belə bir ümumiləşdirmə apara bilərik ki, bölgələrdə yerli xammala əsaslanan sənaye müəssisələrinin fəaliyyətinin keyfiyyətcə müasir səviyyədə qurulması və yeni müəssisələrin yaradılması istiqamətində tədbirlər davamlılığı ilə diqqət çəkir. Azərbaycanda güclü sahibkarlar sinfi formalaşıb və fəaliyyət göstərir. Bütün bunlar həm də beynəlxalq miqyasda Azərbaycanın nüfuzunun artmasına öz müsbət təsirini göstərir. Bütün bu deyilənlərin fonunda, Prezident İlham Əliyevin bölgələrə mütəmadi səfərlərinin hansı iqtisadi, siyasi və beynəlxalq əhəmiyyəti var?
Məsələyə münasibət bildirən politoloq Məhəmməd Əsədullazadə buna bir neçə kontekstdən yanaşdı: “Hər bir dövlət başçısı ölkəsinin iqtisadi inkişafı üçün müəyyən proqramlar hazırlayır və onun yerlərdə icrası ilə tanış olmaq üçün bölgələrə səfər edir. Qeyd edim ki, regionların sosial inkişafı ilə əlaqədar qəbul edilən dövlət proqramları regionların inkişafında mühüm rol oynayır. Eyni zamanda, həmin proqramlar sözügedən məsələlərlə bağlı islahatlar paketidir. Bu gün ölkəmizin yol-nəqliyyat infrastrukturu durmadan inkişaf edir. Regionlarda müxtəlif obyektlər tikilir və ölkə başçısı şəxsən onların açılışında iştirak edir. Dövlət başçısının mütəmadi səfərləri, görülən işlərlə bağlı tapşırıqları bir daha sübut edir ki, Prezident işlərin icrası ilə yerində tanış olur. Bunun mühüm siyasi əhəmiyyəti ondan ibarətdir ki, vətəndaşlarla birbaşa təmasın qurulması dövlət və xalq arasında bağlılıq yaradır. İlham Əliyevin regionlara səfəri daim yeniliklərlə xarakterizə olunur. Prezidentin regionlara mütəmadi səfərləri beynəlxalq birlik tərəfindən xalqla dövlətin milli vəhdəti kimi qəbul olunur. Bu da, öz növbəsində, kənar güclərin müdaxilə imkanlarını sıfıra endirir. Çünki dünyada müəyyən mərkəzlər xalqın ictimai mövqeyindən istifadə edib ölkələrdə xaosa yol açırlar. Bu gün Azərbaycan xalqının dövlətinə sədaqəti milli birliyin təntənəsidir. Bu gün regional kontekstdə Azərbaycan xalqı sülhə və təhlükəsizliyə töhfə verən xalqdır. Bu da imkan verir ki, dövlət siyasəti və aparılan islahatlar ölkədə səmərəli şəkildə öz töhfəsini versin”.
Vidadi ORDAHALLI
