"Görünən odur ki, demək olar, hər kəs xoşgörünü dəstəkləyir"
Bir neçə gün əvvəl Azərbaycan Prezidenti İlham Əliyev Qurban bayramı münasibətilə Azərbaycan xalqını təbrik edərkən islam dininin önəminə toxunub. Dövlət başçısı təbrikində xüsusi olaraq qeyd edib ki, multikultural mühitin yaranmasında islam dininin müstəsna rolu var:
"Azərbaycan müsəlman dünyasının ayrılmaz parçası kimi tarix boyu islam mədəniyyətinin inkişafına misilsiz töhfələr bəxş edib. Eyni zamanda məmnuniyyət hissi ilə qeyd etmək istəyirəm ki, çoxmillətli və çoxkonfessiyalı Azərbaycan cəmiyyətində qarşılıqlı hörmət və etimada əsaslanan nümunəvi birgəyaşayışın, əminamanlığın və multikultural mühitin yaranmasında islam dininin də müstəsna rolu olub.
Azərbaycan xalqı həmişə milli-mənəvi dəyərlərə və ənənələrə sədaqət və qayğı ilə yanaşıb, dini mərasimləri, o cümlədən, Qurban bayramını böyük ruh yüksəkliyi ilə qeyd edib. Bu günlər ölkəmizin hər yerində xalqımızın və dövlətimizin əminamanlığı və firavanlığı üçün Allaha dualar səslənir, Vətən uğrunda həyatından keçən şəhidlərimizin ölməz xatirəsi ehtiramla yad olunur. Əminəm ki, bu sözügedən məsələ ilə bağlı Qurban bayramı da cəmiyyətimizdə milli-mənəvi həmrəyliyin, xeyirxah əməllərin, şəfqət və mərhəmət duyğularının təntənəsinə çevriləcək".
Azərbaycan tarix boyu multikultural dəyərlərə önəm verib. Bunda da islam dininin mühüm rolu olub və indinin özündə də bu belədir.
Sözügedən məsələ ilə bağlı fikirlərini "Bakı-Xəbər"lə bölüşən şərqşünas Seyid Camal Əzimbəylinin sözlərinə görə, bu faktor danılmaz həqiqətdir: "Yəni hər zaman islam dini bu məsələdə əsas faktorlardan biri olub. Multikultural dəyərlərin formalaşmasında islam dininin özünəməxsus rolu var. Digər tərəfdən, siyasi əqidəsindən asılı olmayaraq, istənilən ölkə vətəndaşı cənab İlham Əliyevin Azərbaycanda milli, mənəvi, dini dəyərlərimizin təəssübkeşi olduğu faktını gizlətmir. Bu bir daha dünyada tolerantlığın, xoşgörünün, birlik və bərabərliyin göstəricisi, nümunəsi olaraq Azərbaycan modelini ortaya qoyub. Azərbaycan dünyəvi ölkə olsa da, həqiqətən də islami dəyərlərə dövlətin sahib olması, onu mühafizə etməsi nümunəsidir. Digər tərəfdən, bu il Prezidentin sərəncamı ilə ölkədə Multikulturalizm ili elan edilib. Bu da bir daha bütün dünyaya və səmavi din daşıyıcısı olan ölkə vətəndaşlarına örnəkdir. Ona görə də hesab edirəm ki, bu təqdir olunası və alqışlanasıdır. İki gün əvvəl cəbhə bölgəsində hərbçiləri ziyarət etdik. Görünən odur ki, demək olar, hər kəs xoşgörünü dəstəkləyir. Ona görə də hesab edirəm ki, dövlət başçısının vurğuladığı məqamlar tamamilə reallığa söykənir".
Vidadi ORDAHALLI
